អ៊ុយក្រែនបានព្រមានថា រុស្ស៊ីអាចនឹងរៀបចំផែនការបំផ្ទុះរោងចក្រថាមពលនុយក្លេអ៊ែរដ៏ធំបំផុតនៅអឺរ៉ុប បន្ទាប់ពីការផ្ទុះនៅទំនប់វារីអគ្គិសនីដ៏ធំមួយបានបង្កឲ្យមានការជន់លិចយ៉ាងខ្លាំង នៅក្នុងតំបន់ Kherson និង បង្កជាមហន្តរាយមនុស្សធម៌។ នេះបើយោងតាមការចេញផ្សាយដោយសារព័ត៌មាន Daily mail នាថ្ងៃ ព្រហស្បតិ៍ ទី៨ ខែមិថុនា ឆ្នាំ២០២៣។
ការផ្ទុះជាបន្តបន្ទាប់កាលពីព្រឹកថ្ងៃ អង្គារ កាលពីម្សិលមិញបានបណ្តាលឲ្យទំនប់ Nova Kahkovka ដ៏សំខាន់ដែលស្ថិតនៅតាមដងទន្លេ Dnieper ក្នុងទឹកដីដែលគ្រប់គ្រងដោយរុស្ស៊ីបានដួលរលំផ្នែកខ្លះ ហើយនាំឲ្យមាន «គ្រោះមហន្តរាយទឹកជំនន់»។
ទីប្រជុំជនរាប់សិបកន្លែង ត្រូវបានជន់លិចដោយទឹកជំនន់ ជាមួយនឹងវីដេអូដ៏គួរឲ្យភ្ញាក់ផ្អើលពីតំបន់ដែលបង្ហាញពីទិដ្ឋភាពនៃភូមិទាំងមូល ត្រូវបានលិចទឹក ហើយផ្ទះត្រូវបានទឹកហូរគួចទៅ។
ប្រធានាធិបតីអ៊ុយក្រែន លោក Volodymyr Zelenskyy បានចោទប្រកាន់រុស្ស៊ីថា បានបំផ្ទុះគ្រាប់បែកនៃការបំផ្លិចបំផ្លាញបរិស្ថានដ៏ធំធេង ដោយនិយាយថា «ឧក្រិដ្ឋកម្មនេះនាំមកនូវការគំរាមកំហែងយ៉ាងសម្បើម ហើយនឹងមានផលវិបាកធ្ងន់ធ្ងរដល់ជីវិតមនុស្ស និងបរិស្ថាន» ខណៈមន្ត្រីសន្តិសុខអាមេរិកបានព្រមានថា ទំនងជានឹងមានមនុស្សស្លាប់ជាច្រើន ដោយសារទឹកជំនន់។
ទន្ទឹមនឹងនោះ វិមានក្រឹមឡាំងបានស្តីបន្ទោសអ៊ុយក្រែនចំពោះការបំផ្ទុះនេះ ដោយអះអាងថា វាគឺជាការប៉ុនប៉ងរបស់ទីក្រុង Kyiv ដើម្បីបង្វែរអារម្មណ៍ពីការបើកការវាយលុកដ៏ធំដែលក្រុងម៉ូស្គូ និយាយថាកំពុងធ្លាក់ចុះ។
យ៉ាងណាម៉ិញ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានពណ៌នាការវាយប្រហារលើទំនប់វារីអគ្គិសនីថាជា «ទង្វើព្រៃផ្សៃ»។ ប៉ុន្តែមន្ត្រីសន្តិសុខកំពូលរបស់ Zelensky លោក Oleksiy Danilov បានច្រានចោលការចោទប្រកាន់នេះ ហើយបាននិយាយថា ជំហានបន្ទាប់របស់ពូទីន អាចជាការវាយប្រហារទៅលើរោងចក្រថាមពលនុយក្លេអ៊ែរ Zaporizhzhia ដែលស្ថិតនៅចម្ងាយត្រឹមតែជាង ១២៨គីឡូម៉ែត្រពីទន្លេ Kakhovka ហើយពឹងផ្អែកលើទឹកពីទំនប់ដើម្បីធ្វើឲ្យរ៉េអាក់ទ័ររបស់វាត្រជាក់។
លោក Danilov បានប្រាប់កាសែត Times ថា «ចាប់តាំងពីប្រតិបត្តិការវាយលុករបស់លោក ពូទីន បានឈានចូលដំណាក់កាលថ្មី ហើយចាប់តាំងពីគាត់បានបំផ្ទុះរោងចក្រវារីអគ្គិសនីតាមតម្រូវចិត្តរបស់គាត់មក គាត់ត្រៀមខ្លួនធ្វើអ្វីគ្រប់យ៉ាង»៕