សិល្បៈជាតិ៖ រឿងខ្លីរបស់កវីនិពន្ធ សុខ ចាន់ផល ដែលមានចំណងជើងថា «កាបូបលុយ» ត្រូវបានជ្រើសរើសបកប្រែសម្រួល និងបោះពុម្ពផ្សាយជាភាសាចិន ជាមួយនឹង “China-Cambodia Mutual Translation Project” ក្នុងនាមជាអ្នកនិពន្ធខ្មែរនាជំនាន់ក្រោយនេះ។
លោក សុខ ចាន់ផល បានលើកឡើងថា ដំណឹងដ៏រំភើបរីករាយមួយនេះ បានធ្វើឱ្យលោកចាត់ទុកថា គឺជាភ័ព្វសំណាងមួយក្នុងជីវិតជាអ្នកនិពន្ធរបស់លោក។ លោកថា ស្នាដៃមួយនេះ ក៏កំពុងតែត្រៀមខ្លួនចូលរួមនៅក្នុងកម្មវិធីពិព័រណ៍សៀវភៅនៅទីក្រុងប៉េកាំង «Beijing International Book fair» នៅថ្ងៃទី ១៥ ខែមិថុនា ឆ្នាំ ២០២៣ នេះ។ អាស្រ័យហេតុនេះ ចំពោះបងប្អូនខ្មែរដែលរស់នៅទីនោះ ក៏អាចទៅចូលរួម និងស្វែងរកបានផងដែរ។
លោក សុខ ចាន់ផល ពិតជាអគុណដល់អ្នកជ្រោមជ្រែងបង្កើតនូវសមិទ្ធិផលដ៏មានអត្ថន័យខ្លឹមសារ ជួយពាំនាំអក្សរសិល្ប៍ខ្មែរទៅកាន់ប្រទេសចិន និងសូមដឹងគុណដល់អក្សរសិល្ប៍ ដែលផ្ដល់ឱកាសឱ្យលោកបានសរសេរចែករំលែកបទពិសោធន៍អារម្មណ៍ទៅកាន់មនុស្សផងគ្នា។
សូមជម្រាបថា រឿង «កាបូបលុយ» គឺរៀបរាប់ពីការធ្វើអំពើល្អរបស់ក្មេងស្រីលក់កម្រងផ្កាតាមចិញ្ចើមផ្លូវម្នាក់ ទៅកាន់បុរសអ្នកមានម្នាក់។ នាងរើសបានកាបូបលុយរបស់បុរសនោះ ហើយនាងក៏បានប្រគល់ឲ្យបុរសនោះវិញដោយមិនទាមទារការតបស្នង។ ព្រោះនេះគឺជាអំពើល្អដែលនាងចង់បង្ហាញទៅសង្គម និងឱ្យមនុស្សដទៃទៀតយកគំរូតាម។ រឿងខ្លីនេះលោកបាននិពន្ធនៅឆ្នាំ២០០៨ និងបានផលិតជាភាពយន្តដើម្បីចូលរួមប្រកួតក្នុងមហោស្រពភាពយន្តខ្លាតខ្លីចតុម្មុខនៅចុងឆ្នាំ២០១៦៕
