សិល្បៈជាតិ៖ តាមការប្រកាសជាផ្លូវការនៅលើហ្វេសប៊ុកផេក Miss Grand Cambodia នៅថ្ងៃទី ៨ មិថុនា ២០២៣ នេះ បានឱ្យដឹងថា ស្ថាប័នប្រកាសដកបេក្ខភាពឈ្មោះ កែវ ស្រីលីន ដែលតំណាងឱ្យខេត្តកំពត ចេញពីកម្មវិធីប្រកួត Miss Grand Cambodia 2023 នេះ។
ស្ថាប័ន Miss Grand Cambodia បានចេញសេចក្ដីប្រកាសថា ៖ «ជាដំបូងស្ថាប័នយើងខ្ញុំសូមអភ័យទោសដល់ទស្សនិកជន ខាងស្ថាប័នយើងខ្ញុំពិតជាមិនចង់អោយមានបញ្ហាកើតឡើងឡើយ ប៉ុន្តែក្រោយពីទុកឱកាសដល់កញ្ញាច្រើនដង ប៉ុន្តែនៅតែមិនមានការកែប្រែ ស្ថាប័នយើងខ្ញុំខ្លាចមានបញ្ហាដល់ពេលប្រឡងថ្ងៃខាងមុខ យើងសូមប្រកាសដកកញ្ញាពី Miss Grand Cambodia តំណាងខេត្ត កំពត ជាផ្លូវការតែម្តង ។ បញ្ជាក់យើងនឹងប្រកាសបេក្ខភាពដែលមកតំណាងខេត្តកំពត ក្នុងពេលឆាប់ៗនេះ ។ សូមអរគុណ សង្ឃឹមពុកម៉ែបងប្អូននឹងយោគយល់ដល់ខាងស្ថាប័ន»។
ការដកបេក្ខភាពតំណាងខេត្តកំពតនេះធ្វើឡើងតាមរយៈហេតុផលចំនួនពីរគឺ
១- កញ្ញាមិនគោរពតាមគោលការណ៍ និងលក្ខខណ្ឌកុងត្រារបស់ក្រុមហ៊ុន
២- កញ្ញាមិនគោរពពេលវេលា ពិបាកក្នុងការទំនាក់ទំនង
គួររំលឹកផងដែរថា កញ្ញា កែវ ស្រីលីន ធ្លាប់បានចូលរួមប្រកួតនៅក្នុងកម្មវិធី Miss Grand Cambodia ឆ្នាំ ២០២២ ដែលនៅពេលនោះកញ្ញាទទួលបានតំណែងត្រឹម លំដាប់រងទី ៣ ឬ The 3rd Runner-Up ពីកម្មវិធី។ ហើយកញ្ញាធ្លាប់បានចូលរួមប្រកួតក្នុងកម្មវិធី Miss Cambodia ឆ្នាំ២០២០ ទទួលបានតំណែងលំដាប់រងទី ២ ឬ The 2nd Runner-Up ។