សិល្បៈជាតិ៖ ដោយសារតែរឿង ទំពាំង ដែលកំពុងតែផ្ទុះការវែកញែកនៅលើបណ្ដាញសង្គមអស់មួយប្រ៉ាវនោះ គេស្រាប់តែឃើញអតីតតារាសម្ដែងស្រី សួង សុខារ៉ានីត ចេញមុខមកវែកញែកដូចគ្នាឱ្យមហាជនពិចារណា។ នៅក្នុងនោះ អតីតតារាសម្ដែងរូបនេះបានសរសេរជាចំណងជើងរៀបរាប់ថា៖ « សូមផ្ញើទៅអ្នកដែលអាណិតចោរ»។
នៅពេលដែលឃើញមតិរបស់អ្នកលេងបណ្ដាញសង្គមមួយចំនួនវែកញែកគាំទ្រអាណិតចោរលួចទំពាំងនោះ អ្នកនាង សួង សុខារ៉ានីត ក៏បាននិយាយនៅក្នុងវីដេអូខ្លីបង្ហោះនៅលើបណ្ដាញសង្គមថា អ្នកនាងថា ក៏ចេះធ្វើបុណ្យដូចគ្នា ប៉ុន្តែអ្នកនាងបានធ្វើបុណ្យតាមរយៈជួយកុមារកំព្រា ជួយដល់មនុស្សចាស់ជរា អ្នកដែលមានជំងឺ និងជួយអ្នកដែលខ្វះខាតពិតប្រាកដ ហើយការជួយនោះ បើទោះបីជាអ្នកនាងអត់យ៉ាងណា នោះក៏អ្នកនាងត្រូវបេះបោចពីមាត់ពីកមកជួយដែរ។ យ៉ាងណាមិញ អ្នកនាងក៏មិនគាំទ្រចំពោះទង្វើចោរដែលលួចរបស់គេទាល់តែសោះ សូម្បីតែមើលរូបរាងកាយរបស់ចោរមួយនេះរឺងមាំមានមាឌធំ។
អ្នកនាង សួង សុខារ៉ានីត បានបន្តនិយាយសង្កត់ធ្ងន់ទៀតថា តើដោយសារតែក្រទើបទៅលួចគេមែនទេ? អីចឹងឱ្យតែអ្នកក្រដឹងតែលួចគេហ្មងឬយ៉ាងណា ទាំងមិនបាច់រកស៊ី ឬធ្វើការធ្វើសំណង់អីទេមែនទេ?។ អ្នកនាងបន្តថា អ្នកនាងក៏មិនគាំទ្រចំពោះអ្នកដែលជួយជាថវិកាដោយសារតែអាណិតចោរក្រនោះទេ បើចង់ជួយក៏មិនបាច់បង្ហោះ ឬបង្ហាញគេនោះដែរ។ អ្នកនាងថា អាចជួយជាអាថ៌កំបាំងទៅ មិនបាច់លើកទឹកចិត្តដល់ចោរដោយបើកចំហរបែបនេះនោះដែរ។ អ្នកនាងបន្តថា អ្នកនាងមិនគាំទ្រជាដាច់ខាតចំពោះការជួយដោយគ្មានការគិតពិចារណាបែបនេះ។
អតីតតារាសម្ដែងស្រីបានបន្តលើកជាឧទារហណ៍ទៀតថា នេះចោរមានជីវភាពក្រីក្រ ចុះបើចោរជាក្មេងទៀតនោះ តើមិនរឹតតែលែងប្រកាន់ លែងប្រដៅទៀតមែនទេ? ចុះបើកូនអ្នកលួចរបស់គេ តើអ្នកមិនប្រដៅកូនមិនឱ្យលួចរបស់គេទៀតទេមែនទេ? អ្នកនាងនៅតែនិយាយដដែលៗថា អ្នកនាងមិនគាំទ្រទង្វើរបស់ចោរជាដាច់ខាត ហើយរឿងនេះពិតជាធ្វើឱ្យអ្នកនាងក្ដៅក្រហាយខ្លាំង។
បន្ទាប់ពីឃើញការបកស្រាយរបស់អតីតតារាសម្ដែងស្រីរូបនេះដូចខាងលើហើយនោះ គេក៏សង្កេតឃើញមានអ្នកលេងបណ្ដាញសង្គមមួយចំនួនក៏បញ្ចេញមតិគាំទ្រ ដោយអ្នកខ្លះលើកឡើងស្រដៀងៗគ្នាថា ៖ «បងនិយាយត្រូវ ពាក្យក្រ នឹង ពាក្យចោរ គឺខុសគ្នា » «បងក៏មិនទ្រំទ្រដែលអូន» «មែនហ្នឹងចែ ខ្ញុំទើសដែរនឹង» «ខ្វះអីអ្នកវេទនាដែលត្រូវជួយចាំបាច់ច្រើនណាស់» ជាដើម។
ប៉ុន្តែទោះជាយ៉ាងណាមិញ ក៏មានអ្នកលេងបណ្ដាញសង្គមមួយចំនួនទៀតក៏បានបង្ហាញក្ដីបារម្ភថា បញ្ហាទំពាំងនេះ កំពុងតែក្លាយជាប្រធានបទបំពុលសង្គមទៅវិញ ដោយពួកគេចាត់ទុកថា រឿងនេះគឺមិនប្រយោជន៍ឬផ្ដល់ពុទ្ធិអ្វីនោះទេ គួរតែទុកឱ្យអ្នកមានជំនាញពាក់ព័ន្ធជាអ្នកដោះស្រាយទៅ ព្រោះថា អ្នកលេងហ្វេសប៊ុកមិនមែនជាតុលាការដែលអាចកាត់សេចក្ដីថា ខុស ឬត្រូវនោះទេ។ ចុះអ្នកវិញយល់យ៉ាងណាចំពោះបញ្ហានេះ?