សិល្បៈជាតិ៖ យប់មិញនេះ តារាសម្ដែង ជេស៊ីកា បានធ្វើឱ្យមហាជនអ្នកលេងបណ្ដាញសង្គមភ្ញាក់ផ្អើលព្រាត បន្ទាប់ពីកញ្ញាបានបង្ហោះសារសង្ខើញទារលុយពីផលិតករភាពយន្តអ្នកនាង ព្រំ រដ្ឋា ឱ្យចេញមុខដោះស្រាយលុយដែលជំពាក់ខ្លួនអស់រយៈពេល ២ ឆ្នាំមកហើយ។
តារាសម្ដែង ជេស៊ីកា បានបង្ហោះសារនៅថ្ងៃទី ១១ ខែមិថុនា ឆ្នាំ ២០២៣នេះថា ៖ «បងម៉េចហើយរឿងលុយខ្ញុំកាលបានបងគិតសងខ្ញុំ ចង់អោយខ្ញុំចាំដល់ពេលណាទៀត ចង់គិតម៉េច ពេលខ្ញុំផុសរូបតាំងថាខ្ញុំអាក្រក់ហើយចុះពេលដែលអ្នកឯងកហុកបោកប្រាស់ខ្ញុំនឹងម៉េវិញ Ratha Prom ជួយសងលុយខ្ញុំផង។
ការបង្ហោះរបស់តារាស្រីនេះ គឺជាលើកទី ២ ហើយ បន្ទាប់ពីកញ្ញាធ្លាប់បានបង្ហោះសារកាលពីឆ្នាំ ២០២២ ឱ្យអ្នកនាង ព្រំ រដ្ឋា ចូលខ្លួនដោះស្រាយលុយចំនួន ៥ ពាន់ដុល្លារដែលអ្នកនាងឱ្យកញ្ញាទៅខ្ចីគេបន្ត ដោយសន្យាថាសងវិញនៅក្នុងរយៈពេល ៥ អាទិត្យ ប៉ុន្តែក៏ស្ងាត់សញ្ញាសងរហូតដល់សព្វថ្ងៃនេះ។
ជុំវិញរឿងរ៉ាវខាងលើនេះដែរ អ្នកនាង ព្រំ រដ្ឋា ក៏បានបង្ហោះសារបកស្រាយ ដោយមិនប្រកែកពីរឿងខ្ចីបំណុលរបស់កញ្ញា ជេស៊ីកា តែម្ដង។ ដោយអ្នកនាងបានរៀបរាប់អំពីភាពក្ស័យធនក្នុងក្រុមហ៊ុនរបស់អ្នកនាង ដោយនិយាយថា ៖ «រយៈពេល2ឆ្នាំ ហើយដែលខ្ញុំបានបាត់បង់គ្រប់យ៉ាងកិត្តិយសការងារទ្រព្យសសម្បត្តិសឹងទាំងជីវិតដោយការទទួលមិនបាន កូវីតបានបំផ្លាញខ្ញុំ🥹ឆ្នាំ2019 ការចាប់ផ្ដើមកូវីតទោះមិនទាន់មកដល់ប្រទេសយើង តែយើងគ្រប់គា្នគឺខ្លាច….ការងាររបស់ខ្ញុំចាប់ផ្ដើមជួបបញ្ហា ព្រោះតួមួយចំនួនគាត់ខ្លាច ទោះជាយើងមានវិធីការពារ..ខាងtv ក៏តម្រូវអោយខ្ញុំកាត់សាច់ព្រោះគាត់ខ្លាចខ្ញុំថតមិនចប់ព្រោះរឿងកំពុងចាក់ផ្សាយ…ទាំងដែលខ្ញុំថតជិតចប់…ខ្ញុំចាប់ផ្ដើមខាតបង់…ខ្ញុំតស៊ូធ្វើការងារដែលជាបេះដូងរបស់ខ្ញុំ…ទីបំផុតខ្ញុំត្រូវបាត់បង់ការងារមួយនេះនៅចុងឆ្នាំ2021..ខាងអ្នកធ្វើការឲ្យទូរទស្សន៍លើកឡើងថា ខ្ញុំធ្វើលើសកុងត្រា 5ខែ ត្រូវបញ្ចប់កុងត្រា ទាំងដែលប្រទេសត្រូវបិទក្រុង…ចុះការខាតបង់របស់ខ្ញុំដែលគិតថា ចប់កូវីតនីងប្រីងប្រែងជាថ្មី…ខ្ញុំគិតថា មិននិយាយតែពេលនេះខ្ញុំមានអារម្មណ៍ថាហេតុអីពេលដែលយើងស្លូតត្រូវគេធ្វើបាបបែបនេះ🥹🥹…តែយ៉ាងណាខ្ញុំក៏សូមអរគុណប្អូនស្រី Thyda Pnn ខាងទូរទស្សន៍PNN ដែលនៅតែផ្តល់ឪកាសនិងខ្វល់ខ្វាយពីសុខទុក្ខខ្ញុំ បានផ្តល់ការងារដល់ខ្ញុំ….ខ្ញុំពិតជាចង់ Live និយាយរឿងក្នុងចិត្តនឹងភាពអយុត្តិធម៌ដែលខ្ញុំជួបបានបៀមទុក្ខ2ឆ្នាំមកនេះណាស់»។
ប៉ុន្តែក្រោយការបកស្រាយរបស់អ្នកនាង ព្រំ រដ្ឋា តារាសម្ដែងស្រី ជេស៊ីកា នៅតែប្រតិកម្មតបវិញទៀតថា ៖ «បងកុហកខ្ញុំក៏ជិត2ឆ្នាំដែរ បងមកខ្ចីលុយខ្ញុំ ហើយអោយខ្ញុំចាំ ចាំមកដល់ពេលនេះ បងបានធ្វើកិច្ចសន្យាមុខច្បាប់ហេីយ នៅតែបំពាន បងដឹងហើយថា តាមច្បាប់បងត្រូវជួបនឹងអ្វីខ្លះ… តាំងពីបងធ្វើកិច្ចសន្យាជាមួយខ្ញុំមក 5ខែដែលហើយ បងដឹងខ្លួនឯងហើយថា មនុស្សដូចខ្ញុំស្រួលណាស់»។
ជុំវិញរឿងរ៉ាវនេះ គេនៅចាំបានថា កញ្ញា ជេស៊ីកា ក៏ធ្លាប់បានដាក់ពាក្យបណ្តឹងប្តឹងអ្នកនាង ព្រំ រដ្ឋា ជាកូនបំណុលដោយទាមទារទឹកប្រាក់ចំនួន៥ពាន់ដុល្លារ រួមនឹងសំណងជំងឺចិត្តទៀតផង៕
