សិល្បៈជាតិ៖ កាលពីរាត្រីថ្ងៃទី១១ ខែមិថុនា ម្សិលមិញនេះ តារាសម្ដែងរូបសង្ហា ប៊ុន លីម៉ា ទើបតែត្រូវបានប្រកាសតែងតាំងជា BA តំណាងឱ្យផលិតផលរបស់ក្រុមហ៊ុនឧកញ៉ា ទ្រី ដាណា។
ថ្វីត្បិត ប៊ុន លីម៉ា មិនមែនជាតារាសម្ដែងដែលលេចធ្លោខ្លាំង នៅក្នុងវិថីសិល្បៈ ប៉ុន្តែតារាសម្ដែងរូបនេះក៏អាចចាត់ចូលជាតារាដែលមានការនិយមគាំទ្រច្រើនពីសំណាក់មិត្តយុវវ័យផងដែរ។ អតីត Freshie Boys and Girls ឆ្នាំ២០០៨ រូបនេះ បានហក់មកមានសន្ទុះគាំទ្រខ្លាំងកាលពីឆ្នាំ២០១៨ តាមរយៈការសម្ដែងបទចម្រៀងមនោសញ្ចេតនាពីរបទរបស់ផលិតកម្មថោន គឺបទ «មនុស្សស្រីធម្មតាម្នាក់ឲ្យខ្ញុំខូចចិត្ត» និងបទ «មនុស្សស្រីធម្មតាម្នាក់មិនសមឲ្យបងខូចចិត្ត»។
ឈានមកដល់បច្ចុប្បន្ន បុរសសង្ហារូបនេះ តែងតែត្រូវផលិតករនិងអ្នកដឹកនាំជ្រើសរើសឱ្យសម្ដែងតួអង្គក្បត់ចិត្តនិងសាវ៉ា នៅក្នុងភាពយន្តអប់រំ ប៉ុន្តែតួអង្គនេះក៏ជាគ្រឹះសំខាន់មួយដែរ ដែលធ្វើឱ្យកេរ្តិ៍ឈ្មោះរបស់លោកបន្តរក្សាបាននូវល្បីល្បាញ និងមានការចាប់អារម្មណ៍ពីសំណាក់អ្នកគាំទ្រ។
ជាមួយនឹងមូលហេតុទាំងអស់នេះហើយ ទើបធ្វើឱ្យលោកទទួលបានឱកាសនិងទំនុកចិត្តពីឧកញ៉ា ទ្រី ដាណា ជ្រើសរើសជា BA ប្រចាំក្រុមហ៊ុន ដាណា ទ្រី ដូច្នេះនេះក៏ជាសក្ខីភាពមួយបញ្ជាក់ពីប្រជាប្រិយភាពរបស់លោកដែលអាចឈរទន្ទឹងរៀមច្បងក្នុងរង្វង់សិល្បៈល្បីល្បាញជាច្រើនដួងទៀតដែលកំពុងតែដើរតួនាទីជា BA ប្រចាំក្រុមហ៊ុន ដាណា ទ្រី ផងដែរ៕
