សិល្បៈអន្តរជាតិ៖ ឈ្មោះនិងប្រវត្តិរូបសង្ខេបរបស់ G-Dragon ត្រូវបានផលិតកម្ម YG ដកចេញវែបសាយ និងរបាយការណ៍ពាណិជ្ជកម្ម ធ្វើឱ្យផ្ទុះដំណឹងចចាមអារ៉ាមជុំវិញការចាកចេញពីទ្រនំចាស់របស់កំពូលតារាចម្រៀងរូបនេះ។
ដំណឹងចាកចេញរបស់លោកកាន់តែលេចឮខ្ចរខ្ចាយខ្លាំងថែមទៀតដោយសារប្រវត្តិរូបសង្ខេបរបស់លោកស្រាប់តែបាត់ចេញពីវែបសាយរបស់ផលិតកម្ម YG ខណៈដែលឈ្មោះរបស់លោកក៏បានបាត់ចេញពីរបាយការណ៍ពាណិជ្ជកម្មរបស់ក្រុមហ៊ុននៅដើមត្រីមាសទីមួយក្នុងឆ្នាំ២០២៣ផងដែរ។
ប៉ុន្តែផលិតកម្ម YG Entertainment បានចេញមកបញ្ជាក់ចំពោះករណីនេះថាការដែល G-Dragon បាត់ឈ្មោះនិងប្រវត្តិរូបពីក្រុមហ៊ុនដោយសារតែបញ្ហាបច្ចេកទេស ចំណែកកុងត្រារបស់ G-Dragon ជាមួយក្រុមហ៊ុនក៏អស់សុពលភាពហើយដែរ។
តំណាងរបស់ផលិតកម្ម YG Entertainment បានចេញមកទម្លាយពីការផុតកុងត្រា G-Dragon ព្រោះទាំងលើកថាក្រុមហ៊ុនកំពុងពិភាក្សាជាមួយនឹងលោកឡើងវិញដើម្បីធ្វើកុងត្រាថ្មី ប្រសិនបើតារាចម្រៀងរូបនេះមានបំនងចង់ត្រលប់មកចាប់អាជីពសិល្បៈចម្រៀងឡើងវិញ។
ខណៈដែលកុងត្រារយៈពេល១៧ឆ្នាំរបស់ G-Dragon និងទ្រនំចាស់ YG Entertainment បានអស់សុពលភាពក្ដី ប៉ុន្តែការចរចាកុងត្រាថ្មីជាមួយនឹងក្រុមហ៊ុនចាស់ ឬចូលរួមជាមួយនឹងក្រុមហ៊ុន ឬក៏ដើរតួជាតារាឯករាជ្យនៅមិនទាន់មានសេចក្ដីរាយការណ៍ណាមួយបានបញ្ជាក់ជាសាធារណៈនៅឡើយទេ។
តើនៅពេលនេះសមាជិក Big Bang ដទៃទៀតនៅឯណា?
ដើមឆ្នាំនេះ T.O.P បានបញ្ជាក់ពីការចាកចេញពីភាពជាសមាជិកក្រុម ខណៈដែល Taeyang និង Daesung ស្ថិតក្រោមការគ្រប់គ្រងរបស់ផលិតកម្ម The Black Label ដែលជាបុត្រសម្ព័ន្ធរបស់ YG Entertainment៕