នៅយប់ទី១៤ ខែកក្កដា តារាចម្រៀង Original ដ៏មានប្រជាប្រិយភាពមួយរូបក្នុងស្រទាប់យុវវ័យ កញ្ញា ចិត្ត កញ្ចនា បានបង្ហោះរូបភាពដើរកម្សាន្តរបស់កញ្ញានៅលើបណ្ដាញសង្គម ជាមួយនឹងរូបថតទេសភាពជ្រោះប៊ូស្រា អមដោយធម្មជាតិខៀវស្រងាត់នាទឹកដីខេត្ត មណ្ឌលគិរី ធ្វើឱ្យអ្នកដែលបានឃើញហើយនឹកជ្រោះប៊ូស្រា និង ចង់ទៅឃើញទិដ្ឋភាពទេសភាពទាំងនេះផ្ទាល់ភ្នែក។
យោងតាមការបង្ហោះរបស់កញ្ញា ចិត្ត កញ្ចនា កញ្ញាបានទៅដល់ទឹកដីនាខេត្តភាគឥសានប្រទេសតាំងពីថ្ងៃទី១៣ ខែកក្កដា មកម៉្លេះ តែកញ្ញាទើបតែឆ្លៀតឱកាសបានផុសរូបភាពស្អាតៗ និងសម្រស់ទឹកជ្រោះប៊ូស្រា ចែករំលែកជូនអ្នកគាំទ្រ និង មិត្តភក្ដិបានទស្សនានៅយប់ទី១៤ ម្សិលមិញ។
កញ្ញា ក៏បានផុសសួររបៀបលេងសើចជាមួយនឹងហ្វេនៗដែរថាតើរូបមួយណាស្អាតជាងគេ? ដោយក្នុងនោះមានការចូលមកឆ្លើយតបខាងក្រោមផុសរបស់កញ្ញាយ៉ាងច្រើន ជាពិសេសក្នុងចំណោមមតិជាច្រើន ក្រៅពីអួតសរសើរទេសភាពជ្រោះប៊ូស្រាថាមានទេសភាពស្អាត គួរឱ្យចង់ទៅដើរលេងកម្សាន្តខ្លាំងហើយនោះ ក៏បានសរសើរពីសម្រស់ តារាចម្រៀងរូបនេះថាស្អាតនិងគួរឱ្យគយគន់មិនចាញ់ទេសភាពប៉ុន្មាននោះទេ៕
