អតីតប្រធានាធិបតីអាមេរិក លោក ដូណាល់ ត្រាំ មិនបានសារភាពទោសកំហុសនៅថ្ងៃអង្គារសប្ដាហ៍នេះ ចំពោះការចោទប្រកាន់ពីបទឧក្រិដ្ឋកម្មសហព័ន្ធដែលថាលោកបានរក្សាទុកឯកសារសន្តិសុខជាតិដោយខុសច្បាប់ នៅពេលដែលលោកចាកចេញពីតំណែង និង កុហកមន្ត្រីដែលស្វែងរកឯកសារទាំងនោះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃ ពុធ ទី១៤ ខែមិថុនា ឆ្នាំ២០២៣។
ការសារភាពរបស់លោក ត្រាំ ដែលបានចូលនៅចំពោះមុខចៅក្រមអាមេរិក លោក ចូណាថាន ហ្គូតមេន (Jonathan Goodman) នៅក្នុងតុលាការសហព័ន្ធក្នុងទីក្រុង ម៉ាយ៍អាមី (Miami) បង្កើតការតស៊ូផ្លូវច្បាប់ដែលទំនងជាសេណារីយ៉ូនៅប៉ុន្មានខែខាងមុខនេះ នៅពេលដែលគាត់ធ្វើយុទ្ធនាការដើម្បីឈ្នះតំណែងជាប្រធានាធិបតីនៅក្នុងការបោះឆ្នោតនាខែវិច្ឆិកា ឆ្នាំ២០២៤។
លោក ត្រាំ ដែលពាក់ឈុតពណ៌ខៀវ និងក្រវ៉ាត់កពណ៌ក្រហម បានងឿងឆ្ងល់ ហើយផ្អៀងទៅលើកៅអី ប៉ុន្តែមិនបាននិយាយអ្វីក្នុងអំឡុងពេលសវនាការរយៈពេល ៤៧នាទីនោះទេ។ លោកត្រូវបានអនុញ្ញាតឲ្យចាកចេញពីតុលាការដោយគ្មានលក្ខខណ្ឌ ឬការរឹតត្បិតការធ្វើដំណើរឡើយ ហើយមិនចាំបាច់មានមូលបត្របំណុលទេ។
ចៅក្រមអាមេរិក លោក ហ្គូតមេន បានសម្រេចថា លោក ត្រាំ មិនត្រូវបានអនុញ្ញាតឲ្យមានទំនាក់ទំនងជាមួយសាក្សីដែលមានសក្តានុពលក្នុងសំណុំរឿងនោះទេ។
ទាក់ទិននឹងបញ្ហានេះជំនួយការរបស់លោក ត្រាំ គឺលោក វ៉ល៍ ណូតតា (Walt Nauta) ដែលត្រូវបានចោទប្រកាន់ក្នុងសំណុំរឿងនេះផងដែរ បានបង្ហាញខ្លួននៅក្នុងតុលាការជាមួយនឹងលោក ត្រាំ ប៉ុន្តែនឹងមិនត្រូវអនុញ្ញាតឲ្យចូលសវនាការរហូតដល់ថ្ងៃទី២៧ ខែមិថុនា ដោយសារតែលោក ណូតតា មិនមានមេធាវីក្នុងស្រុក។
បន្ទាប់ពីសវនាការ លោក ត្រាំ បានដើរចេញពីតុលាការ ឆ្ពោះទៅភោជនីយដ្ឋានមួយ ដើម្បីជួបជាមួយអ្នកគាំទ្ររបស់លោក។ លោកនិយាយថា ការចោទប្រកាន់នេះ គឺជារឿងក្លែងបន្លំ និង ជារឿងនយោបាយ ហើយថា សហរដ្ឋអាមេរិក គឺជាប្រទេសពុករលួយ។ លោកបានថ្លែងថា៖ «យើងមានរដ្ឋាភិបាលដែលនៅក្រៅការគ្រប់គ្រង»។ សហគមន៍ជនជាតិគុយបា-អាមេរិកនៅរដ្ឋផ្លរីដា គឺជាប្លុកបោះឆ្នោតរបស់គណបក្សសាធារណរដ្ឋដ៏ច្រើននៅក្នុងរដ្ឋប្រកួតប្រជែងខាងនយោបាយ។
ដោយឡែកអ្នកគាំទ្រលោក ត្រាំ បានស្រែកថា «យើងស្រឡាញ់ Trump» នៅពេលដែលលោកបានចាកចេញពីតុលាការនៅម៉ោង ៣:៥៥នាទីល្ងាច(ម៉ោងកក្នុងស្រុក)។
យ៉ាងណាម៉ិញ អាជ្ញាធរបានត្រៀមខ្លួនសម្រាប់ទប់ទល់អំពើហឹង្សាដែលអាចកើតមាន ដោយរំលឹកឡើងវិញនូវការវាយប្រហារកាលពីថ្ងៃទី៦ ខែមករា ឆ្នាំ២០២១ មកលើវិមានកាពីតូលរបស់សហរដ្ឋអាមេរិក ប៉ុន្តែអភិបាលក្រុង ម៉ាយ៍អាមី (Miami) លោក ហ្វ្រេនស៊ីស ស៊ូអារ៉េស (Francis Suarez) បានប្រាប់អ្នកយកព័ត៌មានថា មិនមានបញ្ហាសន្តិសុខអ្វីនោះទេ។
កាលពីខែមេសា លោកបានសារភាពថា មិនមានកំហុសចំពោះការចោទប្រកាន់របស់រដ្ឋក្នុងទីក្រុងញូវយ៉ក ដែលផ្តើមចេញពីការបង់ប្រាក់បំបិតមាត់ទៅឲ្យតារាថតកុនកូនជ្រូកម្នាក់ (តារាអាសអាភាស)។
ទោះជាយ៉ាងណាក៏ដោយ លោក ត្រាំ បានប្រកាសម្តងហើយម្តងទៀតអំពីភាពគ្មានកំហុសរបស់គាត់ ហើយបានចោទប្រកាន់រដ្ឋបាលរបស់ប្រធានាធិបតីប្រជាធិបតេយ្យបច្ចុប្បន្ន លោក ចូ បៃដិន ថា បានកំណត់គោលដៅលើរូបលោក។
លោក ត្រាំ បានប្រឈមមុខនឹងបទល្មើសចំនួន៣៧ រួមទាំងការលាក់បាំងឯកសារការពារជាតិ សមត្ថភាពយោធារបស់ប្រទេសផ្សេងៗ និង អាថ៌កំបាំងនុយក្លេអ៊ែរផងដែរ។ កាលពីខែសីហាឆ្នាំមុន ភ្នាក់ងារ FBI បានរឹបអូសឯកសាររាប់រយ ពីអចលនទ្រព្យរបស់លោក នៅរដ្ឋ Florida។
សូមជម្រាបថា លោក ត្រាំ គឺជាអតីតប្រធានាធិបតីដំបូងគេដែលត្រូវបានចោទប្រកាន់ពីបទឧក្រិដ្ឋកម្មសហព័ន្ធ។ ការចូលខ្លួនមកបំភ្លឺនៅតុលាការនាពេលនេះ ជាដំណើរការក្ដីនៅបន្ទប់សវនាការលើកទី២ សម្រាប់លោក Trump ក្នុងរយៈពេលប៉ុន្មានខែថ្មីៗនេះ៕
