អាជ្ញាធរបាននិយាយថា ទូកនេសាទដែលដឹកជនចំណាកស្រុក ១គ្រឿង បានក្រឡាប់ និងលិចនៅឆ្នេរសមុទ្រភាគខាងត្បូងប្រទេសក្រិក កាលពីថ្ងៃពុធ ដោយបានបណ្តាលឲ្យមនុស្សយ៉ាងហោចណាស់ ៧៩នាក់ស្លាប់ និងជាច្រើននាក់ទៀតបានបាត់ខ្លួននៅក្នុងគ្រោះមហន្តរាយដ៏អាក្រក់បំផុតមួយក្នុងឆ្នាំនេះ។ នេះបើយោងតាមការចេញផ្សាយដោយសារព័ត៌មាន NBC News នាថ្ងៃ ពុធ ទី១៤ ខែ មិថុនា ឆ្នាំ២០២៣។
នាវាឆ្មាំឆ្នេរសមុទ្រ កងទ័ពជើងទឹក និងនាវាពាណិជ្ជករ បានចេញដំណើរសម្រាប់ប្រតិបត្តិការស្វែងរក និងជួយសង្គ្រោះ ដែលរួមមានយន្តហោះ និងឧទ្ធម្ភាគចក្រផងដែរ។
អាជ្ញាធរបាននិយាយថា មនុស្សចំនួន ១០៤នាក់ ត្រូវបានជួយសង្គ្រោះមកទល់ពេលនេះ បន្ទាប់ពីទូកបានលិចពេញ១យប់ ក្នុងដែនទឹកអន្តរជាតិចម្ងាយប្រហែល ជាង ៧២ម៉ែត្រភាគនិរតីនៃតំបន់ Peloponnese ភាគខាងត្បូងនៃប្រទេសក្រិក។ កន្លែងនេះ គឺនៅជិតតំបន់ជ្រៅបំផុតមួយនៃសមុទ្រមេឌីទែរ៉ាណេ។
គេមិនច្បាស់ទេថា តើអ្នកដំណើរប៉ុន្មាននាក់អាចកំពុងតែនៅក្នុងទឹក ឬ ជាប់នៅក្នុងកប៉ាល់ដែលលិចនោះ ប៉ុន្តែរបាយការណ៍ដំបូងមួយចំនួនបានណែនាំថា មនុស្សរាប់រយនាក់ប្រហែលជានៅលើនោះ។ ប៉ុន្ដែអ្នករស់រានមានជីវិតចំនួន ៤នាក់ ត្រូវបានបញ្ជូនទៅមន្ទីរពេទ្យដោយមានរោគសញ្ញានៃការថយចុះកម្តៅ។
នៅឯកំពង់ផែភាគខាងត្បូងនៃទីក្រុង Kalamata មនុស្សរាប់សិបនាក់ផ្សេងទៀត ត្រូវបានគេនាំទៅកាន់តំបន់ជម្រកដែលបង្កើតឡើងដោយសេវារថយន្តសង្គ្រោះបន្ទាន់ និង ទីភ្នាក់ងារជនភៀសខ្លួនរបស់អង្គការសហប្រជាជាតិ ដើម្បីទទួលបានសម្លៀកបំពាក់ និង ការយកចិត្តទុកដាក់ផ្នែកវេជ្ជសាស្ត្រ។
ឆ្មាំឆ្នេរសមុទ្រក្រិកបាននិយាយថា សាកសពចំនួន ៧៩នាក់ ត្រូវបានរកឃើញមកទល់ពេលនេះ។ ឆ្មាំសមុទ្របាននិយាយថា អ្នកនៅរស់រានមានជីវិតមកពីប្រទេស អេហ្ស៊ីបមានចំនួន ៣០នាក់, មកពីប៉ាគីស្ថាន ១០នាក់, មកពីស៊ីរី ៣៥នាក់ និង មនុស្ស ២នាក់ទៀតមកពីប៉ាឡេស្ទីន។
ទូកដែលធ្វើដំណើរឆ្ពោះទៅប្រទេសអ៉ីតាលីនេះ ត្រូវបានគេជឿថា បានបើកចេញពីតំបន់ Tobruk ភាគខាងកើតប្រទេសលីប៊ី។
ឆ្មាំឆ្នេរសមុទ្រអ៉ីតាលី បានជូនដំណឹងជាលើកដំបូងដល់អាជ្ញាធរក្រិក និង ទីភ្នាក់ងារការពារព្រំដែនសហភាពអឺរ៉ុប Frontex អំពីនាវាជិតមកដល់កាលពីថ្ងៃអង្គារ។
ទីភ្នាក់ងារចំណាកស្រុករបស់អង្គការសហប្រជាជាតិ IOM បាននិយាយថា របាយការណ៍ដំបូងបានឲ្យដឹងថា មានមនុស្សរហូតដល់ ៤០០នាក់នៅលើទូកនោះ។
បណ្តាញសកម្មជនបាននិយាយថា ខ្លួនបានទទួលការហៅទូរស័ព្ទពីទូកមួយនៅក្នុងតំបន់ដូចគ្នា ដែលអ្នកដំណើរបាននិយាយថា មនុស្ស ៧៥០នាក់ នៅលើទូកនោះ ប៉ុន្តែវាមិនច្បាស់ថា តើនោះជាទូកដែលបានលិច ឬអត់នោះទេ។
បន្ទាប់ពីការប្រកាសអាសន្នដំបូងនោះ ឧទ្ធម្ភាគចក្ររបស់ ទីភ្នាក់ងារការពារព្រំដែនសហភាពអឺរ៉ុប Frontex និង នាវាពាណិជ្ជករចំនួន ២ បានប្រទះឃើញទូកដែលកំពុងធ្វើដំណើរទៅភាគខាងជើងក្នុងល្បឿនលឿន នេះបើយោងតាមឆ្មាំឆ្នេរសមុទ្រក្រិក។ ទន្ទឹមនោះ ឧទ្ធម្ភាគចក្រ និងនាវាជាច្រើនគ្រឿង ត្រូវបានបញ្ជូនទៅកាន់តំបន់នោះ។
សូមជម្រាបថា ប្រទេសនោះបានធ្លាក់ចូលទៅក្នុងភាពវឹកវរ បន្ទាប់ពីការបះបោរដែលគាំទ្រដោយអង្គការណាតូ ដែលបានផ្តួលរំលំ និង សម្លាប់មេដឹកនាំផ្តាច់ការដ៏យូរ គឺ លោក Moammar Gadhafi ក្នុងឆ្នាំ២០១១។ អ្នកជួញដូរមនុស្សបានទទួលផលប្រយោជន៍ ហើយបានធ្វើឲ្យប្រទេសលីប៊ី ក្លាយជាចំណុចចេញដំណើរដ៏សំខាន់មួយសម្រាប់មនុស្សដែលព្យាយាមធ្វើចំណាកស្រុក ទៅដល់តំបន់ អឺរ៉ុបតាមទូករបស់អ្នករត់ពន្ធ៕
