កាលពីថ្ងៃ ពុធ តុលាការនៃប្រទេសក្វាតេម៉ាឡា បានកាត់ទោស លោក Jose Zamora វ័យ ៦៦ឆ្នាំ ជាអ្នកកាសែតជើងចាស់ដ៏ល្បីឈ្មោះដែលតែងតែរិះគន់រដ្ឋាភិបាល ឲ្យជាប់ពន្ធនាគាររយៈពេល ៦ឆ្នាំ ពីបទលាងលុយកខ្វក់ នៅក្នុងករណីដែលក្រុមអ្នកការពារសិទ្ធិមនុស្ស បានចាត់ទុកសាលក្រមនេះ ជាការវាយប្រហារលើសេរីភាពនៃការបញ្ចេញមតិ។ នេះបើយោងតាមការចេញផ្សាយដោយសារព័ត៌មាន Reuters នាថ្ងៃ ព្រហស្បតិ៍ ទី១៥ ខែមិថុនា ឆ្នាំ២០២៣។
តុលាការបាននិយាយថា លោក Zamora ក៏ត្រូវរងការផាកពិន័យជាប្រាក់ប្រហែល ៣៨,៣០០ដុល្លារផងដែរ។ តុលាការបាននិយាយថា លោក Zamora ធ្លាប់ត្រូវបានពីបទចោទប្រកាន់ពីបទបង្ខូចកេរ្តិ៍ឈ្មោះ និង ការលួច ប៉ុន្ដែគ្រានោះលោកត្រូវបានដោះលែងវិញ។
ដោយឡែក លោក Zamora បាននិយាយថា ករណីប្រឆាំងនឹងរូបលោកបែបនេះ គឺជាការធ្វើទុក្ខបុកម្នេញផ្នែកនយោបាយ ដោយប្រធានាធិបតីក្វាតេម៉ាឡា លោក Alejandro Giammattei ដោយសារតែសេចក្ដីរាយការណ៍នៅក្នុងកាសែត El Periodico របស់លោក បានផ្សាយអំពីអំពើពុករលួយដែលពាក់ព័ន្ធនឹងប្រធានាធិបតី និងសម្ព័ន្ធមិត្តជិតស្និទ្ធរបស់លោក ត្រូវបានបិទកាលពីខែឧសភា។
យោងតាមការិយាល័យរបស់អគ្គមេធាវី លោក Zamora ត្រូវបានគេចោទប្រកាន់ថា បានទទួលប្រាក់ចំនួន ៣៨,៤៦១ដុល្លារ ដើម្បីផ្តល់ហិរញ្ញប្បទានដល់ប្រព័ន្ធផ្សព្វផ្សាយរបស់លោក ដែលមិនត្រូវបានបញ្ចូលជាទៀងទាត់ទៅក្នុងប្រព័ន្ធធនាគារ។
នាយកអង្គការឃ្លាំមើលសិទ្ធិមនុស្សអាមេរិក អ្នកនាង Juanita Goebertus បាននិយាយថា «ការស្នើសុំការកាត់ទោសរយៈពេល ៤០ឆ្នាំ គឺពិតជាមិនសមហេតុផល និងបង្ហាញពីភាពសាហាវឃោរឃៅដែលសារព័ត៌មានកំពុងត្រូវបានធ្វើទុក្ខបុកម្នេញនៅក្នុងប្រទេសក្វាតេម៉ាឡា»។ ការលើកឡើងរបស់ អ្នកនាង Goebertus ទំនងជាចង់សំដៅលើសំណើរបស់ព្រះរាជអាជ្ញាសម្រាប់ការកាត់ទោសដ៏តឹងរ៉ឹងនេះ។
អ្នកនាង Goebertus បានបន្ថែមថា ក្រុមសិទ្ធិមនុស្សមានការព្រួយបារម្ភយ៉ាងខ្លាំង ដែលការិយាល័យរដ្ឋអាជ្ញារបស់ប្រទេសក្វាតេម៉ាឡា កំពុងស៊ើបអង្កេតលើអ្នកកាសែតនានា និង អ្នកកាសែតមកពីអង្គភាព El Periodico ដែលបានរាយការណ៍ពីករណីរបស់លោក Zamora។
សូមជម្រាបថា លោក Zamora បានបង្កើតអង្គភាពកាសែត El Periodico ដែលជាប្រព័ន្ធផ្សព្វផ្សាយស៊ើបអង្កេតឈានមុខគេមួយរបស់ប្រទេសក្វាតេម៉ាឡា ក្នុងឆ្នាំ ១៩៩៦។ លោក ត្រូវបានចាប់ខ្លួនកាលពីខែកក្កដាឆ្នាំ២០២២ ក្នុងអំឡុងពេលនៃការបង្ក្រាបលើព្រះរាជអាជ្ញា ចៅក្រម សកម្មជនសិទ្ធិមនុស្ស អ្នកកាសែត និងមន្ត្រីបក្សប្រឆាំង៕
