ក្រោមការដឹកនាំរបស់លោក Félix Dalmás គ្រូបង្វឹកថ្មីជនជាតិអាហ្សង់ទីន Nick Taylor បានបង្ហាញខ្លួនជាលើកទី៥ ជួយក្រុមជម្រើសជាតិកម្ពុជា ក្នុងជំនួនមិត្តភាពអន្តរជាតិ ទល់និងបង់ក្លាដេស នារាត្រីថ្ងៃទី ១៥ ខែមិថុនា ឆ្នាំ២០២៣ ដោយក្រុមកម្ពុជា បានចាញ់បង់ក្លាដេស ក្នុងលទ្ធផល ១ទល់និង០។
ខ្សែប្រយុទ្ធ កូនកាត់ខ្មែរ-អាមេរិក ស្ថិតក្នុងបញ្ជីឈ្មោះកីឡាករជម្រើសជាតិ ដោយលើកទី១ ក្រោមការដឹកនាំរបស់លោក Keisuke Honda ត្រូវបានកោះហៅកាលពីថ្ងៃទី១៣ ខែកញ្ញា ឆ្នាំ២០២២ ក្នុងជំនួន“មិត្តភាពអន្តរជាតិ MinebearMitsumi” ទល់នឹងក្រុមជម្រើសជាតិបង់ក្លាដែស នៅថ្ងៃទី២២ ខែកញ្ញា ឆ្នាំ២០២២ ដោយកាលនោះកម្ពុជា បានរងបរាជ័យ ក្នុងលទ្ធផល ១ទល់និង០។
ខាងក្រោមនេះជាការបង្ហាញខ្លួនទាំង ៥លើករបស់ Nick Taylor ក្នុងក្រុមជម្រើសជាតិកម្ពុជា៖
- លើកទី១៖ កម្ពុជា ០-១ បង់ក្លាដេស ប្រកួតមិត្តភាពអន្តរជាតិ ថ្ងៃទី២២ ខែកញ្ញា ឆ្នាំ ២០២២
- លើកទី២៖ កម្ពុជា ៣-២ ហ្វីលីពីន ពានរង្វាន់ AFF Mitsubishi Electric Cup 2022 ថ្ងៃទី២០ ខែធ្នូ ឆ្នាំ២០២២
- លើកទី៣៖ កម្ពុជា ៥-១ ប្រ៊ុយណេ ពានរង្វាន់ AFF Mitsubishi Electric Cup 2022 ថ្ងៃទី២៩ ខែធ្នូ ឆ្នាំ២០២២
- លើកទី៤៖ កម្ពុជា ១-៣ ថៃ ពានរង្វាន់ AFF Mitsubishi Electric Cup 2022 ថ្ងៃទី០២ ខែមករា ឆ្នាំ២០២៣
- លើកទី៥៖ កម្ពុជា ០-១ បង់ក្លាដេស ប្រកួតមិត្តភាពអន្តរជាតិ ថ្ងៃទី១៥ ខែមិថុនា ឆ្នាំ២០២៣
ដោយឡែកសម្រាប់ការបង្ហាញខ្លួនចំនួន ៥លើកឲ្យក្រុមកម្ពុជា Nick Taylor រកបាន ១គ្រាប់ ដោយការទាត់បាល់ពិន័យ ១១ម៉ែត្រ ប្រកួតទល់និងក្រុមប្រ៊ុយណេ ក្នុងពានរង្វាន់ AFF Mitsubishi Electric Cup 2022 កាលពីថ្ងៃទី២៩ ខែធ្នូ ឆ្នាំ២០២៣ ដោយកម្ពុជាបានយកឈ្នះក្នុងលទ្ធផល ៥ទល់និង១។
គួរបញ្ជាក់ថា បច្ចុប្បន្ន Nick Taylor មានវ័យ២៤ឆ្នាំ មានកម្ពស់១.៧៨ម៉ែត្រ កំពុងប្រកពអាជីពក្នុងក្លិបបាល់ទាត់ព្រះខ័នរាជស្វាយរៀង នៅរដូវកាលឆ្នាំ២០២៣ បន្ទាប់ពីផ្ទេរចេញពីក្រុម Orlando City B នៃលីគលំដាប់ទី៣ MSL Next Pro របស់ប្រទេសសហរដ្ឋអាមេរិក។ កីឡាករកូនកាត់ខ្មែរ-អាមេរិក ដែលមានម្តាយជាជនជាតិខ្មែរ និងឪពុកជនជាតិអាមេរិក គឺជាអតីតថ្នាលយុវជនរបស់ក្រុម Dallas Texans, New Mexico Lobos, SMU Mustangs និង UCF Knights មុនផ្លាស់មកកាន់ Orlando City B នៅដើមឆ្នាំ ២០២២៕
