ក្រោយទទួលបានសិទ្ធិជាផ្លូវការពីសហព័ន្ធកីឡាហុកគីអាស៊ី ក្រុមកីឡាហុកគីនារីកម្ពុជាបានក្លាយជាបេក្ខភាពមួយ ត្រៀមចូលរួមប្រកួតក្នុងព្រឹត្តិការណ៍កីឡាអាស៊ី លើកទី១៩ (ASIAN Games) ដែលគ្រោងនឹងធ្វើឡើងនៅទីក្រុង Hangshou សាធារណរដ្ឋប្រជាមានិតចិន ដែលប្រព្រឹត្តិទៅចាប់ពីថ្ងៃទី២៣ ខែកញ្ញា ដល់ថ្ងៃទី០៨ ខែតុលា ឆ្នាំ២០២៣។
លោក កាំង សុធា អគ្គលេខាធិការ សហព័ន្ធកីឡាហុកគីកម្ពុជាគូសបញ្ជាក់ថា៖ «ក្រុមជម្រើសជាតិហុកគីនារីកម្ពុជាបានក្លាយជាបេក្ខភាពមួយក្នុងចំណោមបេក្ខភាពជាច្រើនទៀត ក្នុងអាស៊ីទាំងមូល សម្រាប់ការប្រកួតកីឡាអាស៊ី ឆ្នាំ២០២៣ គឺដោយសារក្រុមហុកគីនារីកម្ពុជាបានឆ្លងកាត់ការប្រកួតអន្តរជាតិនានា កន្លងមក បូករួមទាំងការទទួលធ្វើម្ចាស់ផ្ទះ កីឡាស៊ីហ្គេម លើកទី៣២ ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ដោយក្រុមកម្ពុជាទទួលបានមេដាយសំរឹទ្ធលើវិញ្ញា សាហុកគីនារីនេះ»។
ក្រោយពីវត្តមានប្រភេទកីឡាហុកគី នៅកម្ពុជា ជិត២០ឆ្នាំមកនេះ លោក កាំង សុធា បានបង្ហាញពីការខិតខំប្រឹងប្រែងក្នុងការអភិវឌ្ឍប្រភេទកីឡាអូឡាំពិកមួយនេះកាន់តែមានល្អប្រសើរបន្តិចម្តងៗ បើទោះបីជាការអភិវឌ្ឍនេះមានដំណើរយឺតក្តី ក៏លោកចាត់ទុកថា នេះជាមោទនភាពមួយ ដែលយើងដើរឆ្ពោះទៅមុខជានិច្ចមិនថយក្រោយ ពោលគឺពីការប្រកួតអន្តរជាតិពីការចាញ់គ្រាប់ច្រើនមកគ្រាប់តិច ហើយពេលខ្លះមានស្មើ ហើយក៏មានឱកាសឈ្នះខ្លះ។
រំលឹកថា នៅក្នុងព្រឹត្តិការណ៍ប្រកួតកីឡា ស៊ីហ្គេម លើកទី៣២ ក្នុងនាមជាម្ចាស់ផ្ទះ ជាប្រវត្តិសាស្រ្តដំបូង គឺប្រភេទកីឡាហុកគីទទួលបានមេដាយសំរឹទ្ធ ដែលជាក្តីសង្ឃឹម និងមោទនភាព បន្ត ដំណើរឆ្ពោះទៅមុខមិនរាថយ។
គួរបញ្ជាក់ថា កីឡាអាស៊ី គឺជាព្រឹត្តិការណ៍ពហុកីឡាដ៏ធំជាងគេប្រចាំទ្វីបអាស៊ី ដែលធ្វើឡើងរៀងរាល់៤ឆ្នាំម្តង ដោយកីឡាអាស៊ីនេះបានប្រារព្ធបាន១៨លើក ស្មើនឹង ៧២ឆ្នាំមកហើយ ខណៈព្រឹត្តិការណ៍បន្ទាប់ លើកទី១៩ នឹងធ្វើឡើងនៅទីក្រុមទីក្រុង Hangshouសាធារណរដ្ឋប្រជាមានិតចិន ដោយម្ចាស់ផ្ទះមួយនេះបានប្រកាសពីចំនួន ៤០ប្រភេទកីឡា ស្មើនឹង ៤៨២វិញ្ញាសា៕
ប្រភព៖ AKP