លោក យន់ សំបូរ បានទទួលមរណភាពកាលពីថ្ងៃទី១៣ កក្កដា កន្លងទៅនេះ នៅខេត្តសៀមរាប បន្ទាប់លោកបានជាសះស្បើយជំងឺកូវីដ១៩ រយៈពេល១៣ថ្ងៃ។
លោក យន់ សំបូរ ជាប្រធានអង្គការព័ន្ធកិច្ចអប់រំកុមារកម្ពុជា បានទទួលមរណភាពដោយសារតែប្រព័ន្ធដង្ហើមរបស់លោករងការវាយប្រហារធ្ងន់ធ្ងរពីវីរុសកូវីដ១៩ អំឡុងពេលសម្រាកព្យាបាលជំងឺនៅខេត្តសៀមរាប បើទោះបានជាសះស្បើយពីជំងឺនេះ អស់រយៈពេល១៣ថ្ងៃហើយក្ដី។
គណនីហ្វេសបុ៊កឈ្មោះ Sopheak Vat ត្រូវជាសាច់ញាតិរបស់អ្នកជំងឺបានឲ្យដឹងថា លោក យន់ សំបូរ បានចូលសម្រាកព្យាបាលជំងឺកូវីដ១៩ នៅមន្ទីរពេទ្យខេត្តសៀមរាប កាលពីថ្ងៃទី១៨ ខែមិថុនា កន្លងទៅ។ បន្ទាប់ពីទទួលបានការព្យាបាលហើយ លោក សំបូរ បានជាសះស្បើយ ១០០% កាលពីថ្ងៃទី៣០ ខែមិថុនា ២០២១ ព្រមទាំងបានបញ្ចប់ការធ្វើចត្តាឡីស័ក។ ក៏ប៉ុន្ដែ ដោយសារស្ថានភាពជំងឺរបស់លោកធ្ងន់ធ្ងរ បានធ្វើឲ្យលោកមានជំងឺប្រព័ន្ធផ្លូវដង្ហើម ឬសួតរ៉ាំរ៉ៃ ទើបណ្ដាលឲ្យលោកទទួលមករណភាព នៅថ្ងៃទី១៣ កក្កដា។
លោក យន់ សំបូរ គឺជាស្ថាបនិកមួយរូប ដែលជាអ្នកបង្កើតអង្គការព័ន្ឋកិច្ចអប់រំកុមារកម្ពុជា ឡើងតាំងពីឆ្នាំ២០១១ រហូតមកដល់បច្ចុប្បន្ន លោកបានជួយកុមារជាច្រើននាក់ ពិសេសនៅទីក្រុងប៉ោយប៉ែត ប៉ុន្តែពេលនេះ អង្គការរបស់លោក បានបន្តបេសកម្មនៅខេត្តសៀមរាបវិញ។ ទោះបី មិនបានលេចធ្លោនៅក្នុងសង្គមក៏ដោយ ក៏លោកនិងក្រុមគ្រួសារ នៅតែបន្តព័ន្ធកិច្ចនេះ ដោយក្តីស្រលាញ់ នឹងបានលះបង់សេចក្តីសុខរបស់ខ្លួន ដើម្បីកុមារកម្ពុជា ឲ្យបានរៀនសូត្រ ៕
