ខ្សែប្រយុទ្ធ ចាន់ វឌ្ឍនាកា បានបង្ហាញខ្លួនជាថ្មី ក្រោយចាយពេល៥៣២ថ្ងៃ ដើម្បីអាចវិលចូលក្នុងក្រុមជម្រើសជាតិកម្ពុជាវិញ បន្ទាប់ពីរបួសដាច់សសៃជង្គង់ ACL ខាងស្ដាំ ដើម្បីជួយក្រុមជម្រើសជាតិ ក្នុងជំនួបទល់ និងបង់ក្លាដេស នារាត្រីថ្ងៃព្រហស្បត្តិ៍ ទី១៥ ខែមិថុនា ឆ្នាំ២០២៣ លើទីលានពហុកីឡដ្ឋានជាតិ ក្នុងរាជធានីភ្នំពេញ ។
ក្រោយចាញ់បង់ក្លាដេស នៅព្រឹកថ្ងៃទី១៦ មិថុនា នេះកីឡាករ ចាន់ វឌ្ឍនាកា បានបង្ហាញចំណាប់អារម្មណ៍របស់ខ្លួន ក្រោយក្រុមជម្រើសជាតិកម្ពុជា ចាញ់បង់ក្លាដេស កាលពីរាត្រីថ្ងៃទិ១៥ មិថុនា ដូច្នេះថា៖«យើងបានដឹងថាមិនមែនជាលទ្ធផលដែលយើងចង់បានពីការប្រកួតម្សិលមិញសូម្បីតែរូបខ្ញុំផ្ទាល់ ប៉ុន្តែអ្វីដែលយើងត្រូវធ្វើបន្តគឺសិក្សាកែប្រែពីកំហុស»។
ខ្សែប្រយុទ្ធរូបនប្ថែមថា៖ «សម្រាប់កីឡាបាល់ទាត់គឺគ្មានកីឡាករម្នាក់ណាអាចធ្វើបានល្អឥតខ្ចោះនោះឡើយ ពួកយើងពិតជាសុំទោស ក៏ដូចជាអរគុណសម្រាប់ការគាំទ្រក្រុមទាំងមូល អ្វីដែលយើងត្រូវចងចាំនោះគឺពាក្យថា ឆន្ទៈ ប្រឹងប្រែង ព្យាយាម អត់ធ្មត់ នឹង ត្រូវចេះមានឈឺចាប់។ ពួកយើងពិតជាអរគុណអ្នកគាំទ្រទាំងអស់គ្នាដែលតែងអត់ធ្មត់ គាំទ្រ នឹង នៅជាមួយពួកយើង»។
ក្រុមបាល់ទាត់ជម្រើសជាតិកម្ពុជា បានបន្តប្រកួតចាញ់ក្រុមជម្រើសជាតិបង់ក្លាដេស ក្នុងជំនួបចុងក្រោយកាលពីថ្ងៃទី១៥ ខែមិថុនា ម្សិលមិញ។ ខណ:កម្ពុជា និងក្រុមបង់ក្លាដេស ធ្លាប់ជួបគ្នា៦លើកហើយទាំងលើកនេះ គិតពីឆ្នាំ២០០៦ មក ខណៈក្រុមបង់ក្លាដេស ឈ្នះបាន៥ លើកនិងស្មើគ្នា១លើក៕