ឆ្មាំសមុទ្រហ្វីលីពីនបាននិយាយថា មនុស្ស ១២០នាក់ នៅលើស្រឡាងដែលបានឆេះនៅលើផ្ទៃសមុទ្រ ក្នុងប្រទេសហ្វីលីពីន ត្រូវបានជួយសង្រ្គោះកាលពីថ្ងៃអាទិត្យ។
ឆ្មាំសមុទ្របាននិយាយថា ស្រឡាង M/V Esperanza Star បានដឹកអ្នកដំណើរសរុបចំនួន ៦៥នាក់ និងបុគ្គលិកស្រឡាងសរុប ៥៥នាក់ បានឆាបឆេះនៅពេលព្រឹកព្រលឹម ខណៈកំពុងធ្វើដំណើរពីកោះ ស៊ីគីច័រ (Siquijor) នៅភាគខាងត្បូងទៅកាន់កោះ បូហូល (Bohol) នៅភាគកណ្ដាលប្រទេស។
រូបថត និង វីដេអូដែលចេញផ្សាយដោយឆ្មាំសមុទ្របង្ហាញឲ្យឃើញថា មានអណ្តាតភ្លើង និង ផ្សែងខ្មៅហុយចេញពីនាវា២ នៅចុងម្ខាងនៃស្រឡាង ខណៈដែលបុគ្គលិកឆ្មាំសមុទ្រនៅលើនាវាមួយទៀត បានប្រើកាណុងបាញ់ទឹកដើម្បីព្យាយាមពន្លត់ភ្លើង។ គេបានឃើញទូកនេសាទមួយ និងកប៉ាល់មួយទៀតនៅក្បែរនោះ។
អ្នកនាំពាក្យម្នាក់បាននិយាយថា ឆ្មាំសមុទ្របានប្រកាសថា ភ្លើងបានរលត់នៅម៉ោងប្រហែល ២នាទីព្រឹក(ម៉ោងក្នុងស្រុក)។ ចំពោះមូលហេតុនៃការឆេះនេះ នៅមិនទាន់ដឹងនៅឡើយទេ។
នាវាឆ្មាំសមុទ្រចំនួន២ ដែលចូលរួមក្នុងប្រតិបត្តិការពន្លត់អគ្គីភ័យ និង ជួយសង្គ្រោះនៅតែស្ថិតតំបន់ជុំវិញនោះ។ យ៉ាងណាម៉ិញ មិនទាន់មានការបញ្ជាក់ពីចំនួនមនុស្សដែលត្រូវបានជួយសង្រ្គោះចេញពីស្រឡាងថា មានចំនួនប៉ុន្មាននាក់ ឬ ក៏អាចមានអ្នកបាត់បង់ជីវិតឬក៏អត់នៅឡើយទេ។
ឧបទ្ទវហេតុតាមសមុទ្រ គឺជារឿងធម្មតានៅក្នុងប្រជុំកោះហ្វីលីពីន ដោយសារតែមានព្យុះជាញឹកញាប់ ស្ថានភាពស្រឡាង កប៉ាល់ ឬ នាវាថែទាំមិនបានល្អ ការផ្ទុកមនុស្សលើសចំណុះ និងការអនុវត្តច្បាប់សុវត្ថិភាពមិនមានការរឹតបន្ដឹង ជាពិសេសនៅតាមខេត្តឆ្ងាយដាច់ស្រយាល។
ឆ្មាំសមុទ្របាននិយាយថា កាលពីខែមីនា អគ្គីភ័យបានឆាបឆេះ ពេញមួយយប់នៅលើស្រឡាងដែលដឹកមនុស្សប្រហែល ២៥០នាក់ ដោយបានបណ្ដាលឲ្យអ្នកដំណើរ និងសមាជិកនាវិកយ៉ាងហោចណាស់ ៣១នាក់ស្លាប់ នៅខេត្តភាគខាងត្បូងកោះ បាស៊ីឡាន់ (Basilan)។
សូមជម្រាបថា កាលពីខែធ្នូ ឆ្នាំ១៩៨៧ ស្រឡាង Dona Paz បានលិចបន្ទាប់ពីបុកជាមួយនាវាដឹកប្រេង ដោយបានសម្លាប់មនុស្សជាង ៤,៣០០នាក់ នៅក្នុងគ្រោះមហន្ដរាយដែនសមុទ្រដ៏អាក្រក់បំផុតរបស់ពិភពលោក៕
