ក្រុមបាល់ទាត់វិសាខា និងក្រុមអគ្គីសនីកម្ពុជា សុទ្ធតែរកបាន៣ពិន្ទុដូចគ្នា ក្នុងសប្ដាហ៍ទី៨ នៃពានរង្វាន់លីគកំពូលកម្ពុជា Metfone Cambodian League 2021 នៅរសៀលថ្ងៃព្រហស្បតិ៍ ទី១៥ ខែកក្កដា ឆ្នាំ២០២១។
ក្រុមវិសាខា បានយកឈ្នះលើក្រុមអង្គរថាយហ្គឺរ ដោយលទ្ធផល៣ទល់១ លើទីលានកីឡដ្ឋានព្រីនស៍ (ម្តុំហ្រ្គេនភ្នំពេញ)។ កីឡាករកាណាដា Marcus Haber បានរកគ្រាប់បាល់២គ្រាប់បើកឆាកឱ្យវិសាខា នៅនាទី១៤និងនាទីទី២០ មុនចប់តង់ទី១។ ចូលដល់តង់ទី២កីឡាករ ឡុង ភារ៉ាត់ បានរកគ្រាប់បាល់វាយបក១គ្រាប់វិញឱ្យអង្គរថាយហ្គឺរ នៅនាទី៥៦ តែកីឡាករ រ៉ឹម ប៊ុនហៀង បានបន្ថែមគ្រាប់បាល់ទី៣ ឱ្យវិសាខា មុនចប់ការប្រកួត។
ចំណែកក្រុមអគ្គីសនីកម្ពុជា វិញបានយកឈ្នះលើក្រុមម្ចាស់ផ្ទះសូលទីឡូអង្គរ ដោយលទ្ធផល១ទល់០ លើទីលានកីឡដ្ឋាន SRU Stadium ក្នុងខេត្តសៀមរាប។ កីឡាករ ចន្ថា កន្ទាកា បានរកបានគ្រាប់បាល់នៅនាទី៣៦។
គូបន្ទាប់ក្រុមភ្នំពេញក្រោន ត្រូវជួបក្រុមព្រះខ័នរាជស្វាយរៀង នៅវេលាម៉ោង៦ល្ងាច លើទីលានកីឡដ្ឋាន Smart RSN Stadium៕
