សមាគមបាល់ទះវិសាខា នឹងចេញទៅប្រកួតក្នុងព្រឹត្តិការណ៍ Johor Bahru-Mayor’s Cup 2023 នៅប្រទេសម៉ាឡេស៊ី នៅរសៀលថ្ងៃនេះ។ ព្រឹត្តិការណ៍នេះមានការចូលរួមពីក្លិបមកពី ៧ចូលរួម។ ការប្រកួតគ្រោងចាប់ផ្ដើមចាបពីថ្ងៃទី២២ ដល់ថ្ងៃទី២៥ ខែមិថុនា ឆ្នាំ២០២៣ នៅសាល MBJB Arena។
ជុំវិញដំណើរទៅកាន់ប្រទេសម៉ាឡេស៊ីលើកនេះ លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានលើកឡើងថា៖ «នេះគឺជាផែនការរបស់សហព័ន្ធក្រោយចប់ព្រឹត្តិការស៊ីហ្គេម ២សប្ដាហ៍។ ក្នុងនាមសហព័ន្ធកីឡាបាល់ទះកម្ពុជា យើងធ្វើយ៉ាងណាឲ្យ កីឡាករកម្ពុជាយើងប្រឡូកក្នុងការប្រកួតអន្ដរជាតិឲ្យបានច្រើន ដូចជាជំនួបមិត្តភាព ដើម្បីជំរុញដុសខាតសមត្ថភាពកីឡាករតាមបណ្ដាក្លិបពិសេសក្លិបវិសាខានិងក្រសួងមហាផ្ទៃ ដែលសម្បូរដោយធនធានកីឡាករជម្រើសជាតិត្រៀមការប្រកួតអន្ដរជាតិនានា»។
លោកបានបន្ថែមថា៖«កម្ពុជានៅតែមានមហិច្ឆតាឈានឆ្ពោះទៅសម្រេចមេដាយមាសស៊ីហ្គេម ប៉ន្តែវាមិនងាយស្រួលទេព្រោះដឹងហើយថា ប្រទេសឥណ្ឌូនេស៊ីខ្លាំងណាស់។ ហេតុនេះដើម្បីអាចដណ្ដើមមេដាយមាសបានទាល់តែយើងជំរុញការអភិវឌ្ឍន៍កីឡាករបន្ថែមទៀត។មួយទៀត គឺការត្រៀមស៊ីហ្គេម លើកទី៣៣ ឆ្នាំ២០២៥ នៅប្រទេសថៃ»។
រំលឹកថា មុនចេញទៅប្រកួតក្នុងព្រឹត្តិការណ៍ Johor Bahru-Mayor’s Cup 2023 នៅប្រទេសម៉ាឡេស៊ី សមាគមបាល់ទះវិសាខាបានធ្វើការប្រកួតកម្ដៅសាច់ដុំជាមិត្តភាពជាមួយសមាគមកីឡាបាល់ទះ
ក្រសួងមហាផ្ទៃកាល ពីថ្ងៃទី១៦ ខែមិថុនា កន្លងទៅ និងបានបញ្ចប់ដោយវិសាខាឈ្នះ៣សិតទល់២សិត(២៥-២២,២៥-២៣, ២២-២៥, ២១-២៥ និង ១៦-១៤៕
