សិល្បៈជាតិ៖ ទើបតែទទួលតំណែងជា Miss Fabulous Cambodia ថ្មីៗនេះសោះ ស្រាប់តែពេលនេះ កក្កដា សុភ័ណ្ឌ ត្រូវបានក្រុមហ៊ុនដែលរៀបចំកម្មវិធីខាងលើដកចេញពីតំណែង។
អាន៖ កក្កដា សុភ័ណ្ឌ ទទួលតំណែងជា Miss Fabulous Cambodia 2023 ត្រៀមចេញទៅប្រកួតនៅថៃ
មូលហេតុនៃការដកហូតតំណែងលើកនេះត្រូវបានក្រុមហ៊ុនបញ្ជាក់មូលហេតុយ៉ាងខ្លីថា៖ មិនអាចបំពេញតាមគោលការណ៍របស់ក្រុមហ៊ុនបាន។ នេះបើតាមលិខិតដែលទើបតែផ្សាយនឹងបង្ហោះចេញក្ដៅៗ នារាត្រីថ្ងៃទី១៩ ខែមិថុនា ឆ្នាំ២០២៣ នេះ។
ក្រោយត្រូវដកតំណែង Miss Fabulous Cambodia កក្កដា សុភ័ណ្ឌ បានចេញមក Live បកស្រាយនៅលើបណ្ដាញសង្គមហ្វេសប៊ុក ដោយបានទម្លាយពីមូលហេតុការពិតជាច្រើនប្រាប់ទៅមហាជនឱ្យបានដឹងច្បាស់។ កក្កដា សុភ័ណ្ឌ បានអះអាងថា ខ្លួនមិនពេញចិត្តចំពោះក្រុមហ៊ុនដែលប្រើពាក្យថា ដកតំណែង ទាំងដែលការពិតគឺខ្លួនជាអ្នកសូមលាលែងពីតំណែងមួយនេះសោះ។
កក្កដា សុភ័ណ្ឌ បានទម្លាយមូលហេតុថា ខ្លួនមិនសុខចិត្តដោយមានហេតុផល ៣ យ៉ាង។ ទី១ នោះគឺ ខ្លួនបានទិញ license របស់កម្មវិធី Miss Fabulous Cambodia ចំនួន ៣០០០ ដុល្លារ ដោយបានទាំងកញ្ចប់ដូចជា កមុដ ឈាង សំបុត្រយន្តហោះ និងពានរង្វាន់ ព្រមទាំងក្លាយជាបេក្ខភាពតំណាងឱ្យកម្ពុជាទៅចូលរួមប្រកួតក្នុងកម្មវិធី Miss Fabulous នៅប្រទេសថៃ។
ប៉ុន្តែ សុភ័ណ្ឌ បានអះអាងថា ការប្រគល់ប្រាក់ ៣០០០ ដុល្លារ នោះគឺត្រូវឱ្យជាដំណាក់កាល ហើយក្នុង ១ខែ ៥០០ដុល្លារ។ យ៉ាងណាមិញ សុភ័ណ្ឌ បានឱ្យប្រាក់ទៅក្រុមហ៊ុនតែ ៤០០ដុល្លារប៉ុណ្ណោះ ហើយបង្កក ១០០ សិន ក្រោមហេតុផលថា ខ្លួនពិបាករកលុយយកមកបង់បង្គ្រប់។
កក្កដា សុភ័ណ្ឌ បានប្រាប់មូលហេតុទី ២ថា ខ្លួនពិតជាអន់ចិត្តចំពោះអ្នករៀបចំកម្មវិធីដែលប្រគល់ពានរង្វាន់មិនទាន់ពេលវេលា ហើយទាំងមកុដ និងឈាង គឺមិនមានស្អាត និងមានតម្លៃដូចជាអ្វីដែលក្រុមហ៊ុនបានសន្យាចំពោះខ្លួននៅថ្ងៃបំពាក់មកុដនោះទេ។ សុភ័ណ្ឌ បន្តថា ខ្លួនបានចំណាយលុយធ្វើឆៀងប្រណិតមួយថ្មីទៀត ដោយចំណាយអស់ ៥០ ដុល្លារ និងបានទិញប្រអប់ឆៀងថ្មីមួយទៀតអស់ ៥០ ដុល្លារថែមទៀត។
សុភ័ណ្ឌ លើកឡើងទៀតថា ហេតុផលទី ៣ ដែលខ្លួនមិនពេញចិត្តនោះគឺ ការមិនគោរពសន្យា ដោយបានយល់ព្រមគ្នាថា នឹងកាត់ ២០ ភាគរយ នៃលុយដែលទទួលបានការងារច្រើន។ ប៉ុន្តែ សុភ័ណ្ឌ ថា តាំងពីទទួលតំណែងរហូតមកទល់ពេលនេះ ខ្លួនទើបតែទទួលបានការងារត្រឹមតែមួយប៉ុណ្ណោះ ហើយក្រុមហ៊ុនស្រាប់តែទាក់ទងមកកាត់ថ្លៃ ២០ ភាគរយភ្លាមៗ ទាំងដែលការងារនោះមិនបានផ្ដល់កម្រៃរហូតដល់រួចថ្លៃសាំងឡានផងនឹង។
ជាចុងក្រោយ កក្កដា សុភ័ណ្ឌ បានបញ្ជាក់សង្កត់ធ្ងន់ៗថា ខ្លួនសុំឱ្យក្រុមហ៊ុនលុបពាក្យថា ដកតំណែង Miss Fabulous Cambodia ចេញវិញ ដោយជំនួសដោយពាក្យថា ខ្លួនជាអ្នកសូមលាលែងពីតំណែងវិញ ទើបខ្លួនសុខចិត្តនឹងបញ្ចប់រឿងនេះ៕