សិល្បៈជាតិ៖ ថ្មីៗនេះលោក ប៊ឺត សំរេច ចេញវីដេអូថា លោកមិនញញើតនឹងធ្វើតេស្ត DNA បញ្ជាក់ថាលោកជាតំណក់ឈាមពិតរបស់លោក ស៊ីន ស៊ីសាមុត នោះទេ។
ប្រធានបទលោក ប៊ឺត សំរេច ទម្លាយថាខ្លួនជាតំណក់ឈាមពិតរបស់លោក ស៊ីន ស៊ីសាមុត និងបានលាក់បាំងរឿងនេះអស់រយៈពេលជាច្រើនឆ្នាំនោះ គឺនៅតែជាប្រធានបទក្ដៅនៅលើបណ្ដាញសង្គមហ្វេសប៊ុកដែលមានអ្នកបន្តវែកញែកមិនដាច់ រហូតដល់អ្នកស្រាវជ្រាវខ្លះថានឹងឱ្យលោកធ្វើតេស្ដ DNA ខ្លះទៀតប្រកាសថានិងបើកការស្រាវជ្រាវប្រវត្តិពិតរបស់លោកឱ្យកាន់តែច្បាស់ដើម្បីបញ្ជាក់ពីការពិត។
អតីតកីឡាករ ប៊ឺត សំរេច បានសម្រក់ទឹកភ្នែកនិយាយនៅក្នុងវីដេអូបង្ហោះនៅលើបណ្ដាញសង្គមថា ការដែលលោកចេញមកបកស្រាយ និងនិយាយការពិតនេះ គឺលោកមិនចង់បានអ្វីនោះទេ លោកស៊ូទ្រាំមកជាង ៤៩ ឆ្នាំហើយ។ លោកបន្តថា លោកមិនចង់បរិយាយអ្វីទេ គ្រាន់តែចង់ឱ្យមហាជនបានដឹងថា លោកគឺកូនប្រុសរបស់ម្ដាយ ដែលគាត់ធ្លាប់រួមរស់រួមមេត្រីជាមួយលោក ស៊ីន ស៊ីសាមុត និងបន្សល់ទុកតំណក់ឈាមមួយនេះ។ លោកថា ជីវិតលោករស់មកវេទនាយូរណាស់ហើយ លោកមិនចង់តោងកាលីប ឬតោងល្បី ឬចង់បានទ្រព្យសម្បត្តិអ្វីនោះទេ។
លោក ប៊ឺត សំរេច និយាយទៀតថា ដោយសារតែម្ដាយរបស់លោកសូមអង្វរលោកឱ្យនិយាយរឿងនេះ ព្រោះគាត់មានវ័យកាន់តែចាស់ហើយ គាត់ពិតជាស្ដាយបើមិនបានទម្លាយរឿងនេះ។ លោកបន្តថា អ្នកទាំងអស់គ្នាមិនយល់ពីអារម្មណ៍ដែលកំព្រាឪពុក កំព្រាម្ដាយដូចជារូបលោកនោះទេ ហើយលោកទម្លាយពីរឿងនេះក៏ព្រោះតែលោកចង់បំពេញបំណងម្ដាយរបស់លោកផងដែរ។ លោកថា លោកមិនដែលចង់បានទ្រព្យសម្បត្តិអ្វីពីខាងលោក ស៊ីន ស៊ីសាមុត នោះទេ បើទោះលោកគ្មានទ្រព្យយ៉ាងណាក៏ដោយ។ លោកគ្រាន់តែចង់បានសេចក្ដីសុខចំពោះក្រុមគ្រួសារ និងចង់ឃើញសាច់ឈាមប្អូនរបស់លោកដែលនៅសល់ទទួលបានសេចក្ដីសុខតែប៉ុណ្ណោះ។
លោក ប៊ឺត សំរេច ក៏បានបញ្ជាក់បន្ថែមទៀតថា រឿងទាំងអស់ដែលលោកបានទម្លាយនោះ គឺជារឿងពិត មិនបានប្រឌិត មកបំពុលសង្គមទេ។ លោកថា លោកចង់ជួបមុខអ្នកដែលចោទប្រកាន់លោក រួចទៅធ្វើតេស្ដ DNA ឈាមជាមួយនឹងលោកផ្ទាល់ ដើម្បីបញ្ជាក់ភាពស្អាតសំដែលលោកមាន។ លោកថា លោកមិនព្រមាននោះទេ ប៉ុន្តែបើលោកពិតជាតំណក់ឈាមពិតរបស់លោក ស៊ីន ស៊ីសាមុត មែននោះ អ្នកដែលចោទប្រកាន់លោកគឺត្រូវទទួលខុសត្រូវចំពោះរឿងនេះ៕
យ៉ាងណាមិញ លោក ប៊ឺត សំរេច ចុងក្រោយថា សម្រាប់អ្នកដែលចង់ជួបលោក និងក្រុមគ្រួសារក្នុងការស្វែងរកការពិត លោកថាលោកស្វាគមន៍គ្រប់ពេលវេលា។ លោកថា ការឈឺចាប់នៅក្នុងចិត្តនេះគឺធ្វើឱ្យលោកចងចាំមិនភ្លេចនោះទេ លោកមានកេរ្តិ៍ឈ្មោះជាកីឡាករល្បីមួយរូបដែរ ដូច្នោះហើយលោកមិនលក់កិត្តិយសមកប្រឌិតរឿងបែបនេះដូចគេចោទប្រកាន់នោះទេ៕