ទីបំផុតទៅ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា បានចារឯកភាពថារាជរដ្ឋាភិបាលយល់ព្រមឱ្យគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប)ពង្រីកការប្រគល់មុខងារអប់រំតាមបែបវិមជ្ឈការដូចដែលបានអនុវត្តនៅតាមរដ្ឋបាលក្រុង ស្រុក ក្នុងខេត្តបាត់ដំបង ទៅអនុវត្តនៅតាមរដ្ឋបាលក្រុង ស្រុក ខណ្ឌ ទូទាំងប្រទេស។ នេះបើតាមសេចក្ដីជូនដំណឹងរបស់ទីស្ដីការគណៈរដ្ឋមន្រ្តី ផ្ញើជូនសម្ដេចក្រឡាហោម ស ខេង ឧបនាយករដ្ឋមន្រ្តី និងជាប្រធាន គ.ជ.អ.ប។ ការអនុវត្តវិមជ្ឈការមួយនេះនឹងត្រូវធ្វើឡើងចាប់ពីដើមឆ្នាំ២០២៤តទៅ។
មុខងារអប់រំដែលត្រូវផ្ទេរឱ្យស្ថិតក្រោមការគ្រប់គ្រងរបស់រដ្ឋបាលក្រុង ស្រុក ខណ្ឌ ទូទាំងប្រទេសនោះ គឺសំដៅលើការគ្រប់គ្រងទាំងស្រុង ការអប់រំកុមារតូច ចាប់ពីមត្តេយ្យដល់បឋមសិក្សា និងការអប់រំក្រៅប្រព័ន្ធ។ រដ្ឋបាលក្រុង ស្រុកទាំង១៤ បានអនុវត្តសាកល្បងមុនគេចាប់ពីឆ្នាំ២០២០មក។ តាមរយៈការផ្ទេរនេះ រដ្ឋបាលក្រុង ស្រុក ខណ្ឌ ជាអ្នកទទួលខុសត្រូវដោយផ្ទាល់លើសិទ្ធិអំណាចគ្រប់គ្រងធនធានមនុស្ស រាប់ចាប់ពីការតែងតាំង ផ្លាស់ប្ដូរ ប្រធានការិយាល័យអប់រំ បុគ្គលិកអប់រំ គ្រូបង្រៀន គ្រូកិច្ចសន្យា និងថវិកាក្នុងដែនរដ្ឋបាល ការបើកប្រាក់ខែ និងការចំណាយផ្សេងៗ ខណៈកន្លងមក កិច្ចការទាំងនេះអនុវត្តតាមបែបវិសហមជ្ឈការ ពោលគឺថ្នាក់ក្រោមទទួលគ្រប់គ្រងចាត់ចែងតាមការបញ្ជាពីថ្នាក់លើ។ សម្រាប់ក្រសួង អប់រំ យុវជន និងកីឡា នឹងទទួលខុសត្រូវលើគោលនយោបាយអប់រំ រួមមានការជ្រើសរើស និងបណ្ដុះបណ្ដាលគ្រូ និងការរៀបចំកម្មវិធីសិក្សាជាដើម។
កាលពីថ្ងៃទី១១ ខែតុលា ឆ្នាំ២០២២ ក្នុងពិធីបញ្ចុះបឋមសិលាសាងសង់សមិទ្ធផលវិទ្យាល័យ សម្ដេចក្រឡាហោម ស ខេង តាគ្រាម ស្ថិតក្នុងខេត្តបាត់ដំបង សម្ដេចក្រឡាហោម ស ខេង មានប្រសាសន៍ជាមុនថា«ខ្ទង់ថវិការដ្ឋដែលបែងចែកសម្រាប់ការគ្រប់គ្រងបឋមសិក្សា និងមត្តេយ្យនៅបាត់ដំបងនេះ មានន័យថាលុយនេះលែងស្ថិតក្នុងកញ្ចប់ថវិកាក្រសួងអប់រំទៀតហើយ គឺវាស្ថិតក្នុងកញ្ចប់ថវិកាក្រុងឬស្រុកនោះតែម្ដង ក្នុងហោប៉ៅចៅហ្វាយស្រុក ចៅហ្វាយក្រុង នេះបើនិយាយឱ្យចំ។ ប៉ុន្តែក៏មិនមែនជាលុយចៅហ្វាយស្រុក ចៅហ្វាយក្រុងដែរ វាជាលុយប្រជាពលរដ្ឋក្នុងស្រុក ឬក្រុងនោះ។ អ៊ីចឹងមួយផ្នែក ក្រុង ស្រុកគាត់មានប្រាក់ក្នុងហោប៉ៅអភិវឌ្ឍសាសារៀន ដោយមិនលំបាកសុំពីក្រសួងអប់រំដូចមុន ហើយមួយផ្នែកទៀតក៏គាត់អាចមានលុយដោយពឹងផ្អែកលើប្រភពចំណូលពីសប្បុរសជន»។
សូមបញ្ជាក់ថាកំណែទម្រង់នេះត្រូបានចាត់ទុកជាប្រវត្តិសាស្រ្តថ្មីមួយទៀតក្នុងកំណែទម្រង់វិមជ្ឈការ និងវិសហមជ្ឈការនៅកម្ពុជា។ កាលពីចុងឆ្នាំ២០១៩ រាជរដ្ឋាភិបាលតាមរយៈយន្តការ គ.ជ.អ.ប ក៏បានផ្ទេរការគ្រប់គ្រងវិស័យសុខាភិបាលឱ្យរដ្ឋបាលរាជធានី ខេត្តដែរ។ ទីបំផុត រដ្ឋបាលថ្នាក់ក្រោមជាតិលំដាប់ខ្ពស់មួយនេះ មានលទ្ធភាពគ្រប់គ្រាន់ក្នុងការប្រយុទ្ធប្រឆាំងនឹងជំងឺកូវីដ-១៩ ហើយរាជរដ្ឋាភិបាលក៏ទទួលស្គាល់អំពីលទ្ធផលគាប់ប្រសើរនៃការអនុវត្តវិជ្ឈការវិស័យសុខាភិបាលនេះដែរ។ រាជរដ្ឋាភិបាលក៏បានវិមជ្ឈការអំណាចអនុម័តសិទ្ធិវិនិយោគតម្លៃក្រោម៥លានដុល្លារឱ្យរដ្ឋបាលរាជធានី ខេត្ត ផងដែរ។ រាជរដ្ឋាភិបាលក៏បានស្នើវិសោធនកម្មច្បាប់ដើម្បីបង្កើនចំនួនគណៈអភិបាលរាជធានី ខេត្ត ក្រុង ស្រុក ខណ្ឌ ដែលជាផ្នែកមួយនៃការគាំទ្រនយោបាយវិមជ្ឈការនេះ៕
