សិល្បៈជាតិ៖ តាមការរៀបរាប់របស់លោក វ៉ន សិលា បានឱ្យដឹងថា លោក និងកញ្ញា ជីលី ទេវី កំពុងត្រៀមចេញដំណើរទៅប្រកួតក្នុងកម្មវិធី Mister And Miss Supranational នៅប្រទេស ប៉ូឡូញ នាពេលឆាប់ៗខាងមុខនេះ បន្ទាប់ពីទទួលបានជោគជ័យទាំងស្រុងចំពោះការស្នើសុំទិដ្ឋាការឆ្លងដែនពីប្រទេស ថៃ។
បុរសឯក Mister Supranational Cambodia 2023 រូបនេះបានបង្ហោះសារប្រាប់ទៅកាន់ហ្វេនអ្នកគាំទ្រថា ៖ «អរុណសួស្ដីពុកម៉ែបងប្អូនទាំងអស់គ្នា! ! សូមជម្រាបជូនដំណឹងដល់ពុកម៉ែបងប្អូនឱ្យបានជ្រាបថា ខ្ញុំបាទ សិលា និង ជីលី ពួកខ្ញុំទាំងពីរនាក់ បានទទួល Visa Poland បានដោយជោគជ័យហើយ កាលពីម្សិលមិញនៅប្រទេសថៃ។ អាស្រ័យហេតុដូច្នេះ ពួកខ្ញុំទាំងពីរនឹងចេញដំណើរទៅ Poland ក្នុងពេលឆាប់ៗខាងមុខនេះ»។
យ៉ាងណាមិញ មុនពេលចេញទៅប្រកួតជាផ្លូវការនៅប្រទេសប៉ូឡូញ បេក្ខភាព Mister And Miss Supranational Cambodia ទាំងពីររូបនេះក៏កំពុងធ្វើការហ្វឹកហាត់ត្រៀមខ្លួនយ៉ាងមោះមុតជឿជាក់ ក្នុងការដុតខាត់ទាំងភាសា ហ្វឹកហាត់ដំណើរ និងសមត្ថភាពផ្សេងៗទៀត ជាពិសេសពួកគេក៏បានហាត់និយាយភាសាប៉ូឡូញយ៉ាងស្វាហាប់ ដើម្បីងាយស្រួលក្នុងការទំនាក់ទំនងអំឡុងពេលប្រកួតលើឆាកអន្តរជាតិដែលប្រទេសប៉ូឡូញជាម្ចាស់ផ្ទះឆ្នាំនេះផងដែរ។
សូមជម្រាបថា ការប្រកួត Mister And Miss Supranational គ្រោងនឹងធ្វើឡើងនៅថ្ងៃទី១៥ ខែកក្កដា ឆ្នាំ២០២៣ នៅ Strzelecki Park Amphitheatre ក្នុងទីក្រុង Nowy Sacz ប្រទេសប៉ូឡូញ ដែលមានគូបេក្ខភាពមកពី ៣៩ ប្រទេសបានចូលរួម។ ដូច្នោះហើយអ្នកគាំទ្រទាំងអស់គ្នាកុំភ្លេចរង់ចាំគាំទ្របេក្ខភាពកម្ពុជាយើងឱ្យទទួលបានជ័យជម្នះ៕
