ក្រោយបានរួមចំណែកជួយក្រុមយ៉ាងច្រើន ទាំងការប្រកួតក្របខណ្ឌថ្នាក់ជាតិ អន្ដរជាតិ និងជួយក្រុមឲ្យគ្រងតំណែងជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន ៣សម័យកាលជាប់គ្នា ខ្សែប្រយុទ្ធ កែវ សុខផេង ប្រកាសចូលនិវត្តន៍ពីបាល់ទាត់ពិតមែន តែពេលនេះត្រូវបានក្លិបបាល់ទាត់វិសាខា ប្រកាសក្លាយជាទូតសុឆន្ទ:របស់ក្លិបជាផ្លូវការ។ នេះបើយោងតាមការប្រកាស របស់ក្លិបបាល់ទាត់វិសាខា នៅថ្ងៃទី២៣ ខែមិថុនា ឆ្នាំ២០២៣នេះ។
រំលឹកថា កែវ សុខផេង បានប្រកាសចូលនិវត្តន៍ កាលពីថ្ងៃទី០៥ ខែមេសា ឆ្នាំ២០២៣ បន្ទាប់ពីចំណាយពេលអស់រយៈពេល ១១ឆ្នាំ ក្រោយផ្ដើមលេងបាល់ទាត់កម្រិតអាជីពក្នុងក្រុមចំការកៅស៊ូបឹងកេត ឆ្នាំ២០១២ ហើយរួមចំណែកបានចំណាត់ថ្នាក់លេខ៣ ពានសម្ដេចតេជោ ហ៊ុន សែន ថ្នាក់ជាតិ ឆ្នាំ២០១៤។
ក្នុងអាជីបាល់ទាត់ កីឡាករមានប្រភពពីខេត្តក្រចេះ រូបនេះបានបង្ហាញសក្ដានុពលខ្លាំងបំផុត គឺអំឡុងឆ្នាំ២០១៥-២០១៨ នៅតំបន់ប្រយុទ្ធ ដោយមានដៃគូសហការពី ចាន់ វឌ្ឍនាកា និងប្រាក់ មុនីឧត្តម។ ដោយឡែកនៅឆ្នាំ២០១៦ កីក៏រួមចំណែកឈ្នះលេខ៣ដូចគ្នានៅភ្នំពេញក្រោន។
នៅថ្ងៃទី៣០ ខែឧសភា ឆ្នាំ២០១៨ បានចូលរួមជាមួយវិសាខា ហើយនៅឆ្នាំ២០១៩ ប្អូនប្រុសអតីតខ្សែប្រយុទ្ធ កែវ សុខង៉ន បានរួមចំណែកជួយវិសាខាបានលេខ ៣។ ប៉ុន្តែចាប់ពីឆ្នាំ២០២០ដល់២០២២ គេបានរួមចំណែកឈ្នះជើងឯកពានរង្វាន់ សម្ដេចតេជោ ហ៊ុន សែន ថ្នាក់ជាតិ ៣លើកជាប់គ្នានៅវិសាខា ដែលជាកំណត់ត្រាថ្មីមិនធ្លាប់មានពីមុខមក។
ជាមួយគ្នានេះ កែវ សុខផេង ក៏ធ្លាប់បានស្បែកជើងមាសថ្នាក់ជាតិ ក្នុងរដូវកាល២០២១ ផងដែរ ដោយរកបាន៧គ្រាប់។ លើសពីនេះកីឡាកររូបនេះ បានបង្ហាញខ្លួនឲ្យក្រុមជម្រើសជាតិ ដែលរាប់បញ្ចូលការប្រកួតក្រុមជម្រើសជាតិអាយុក្រោម ២២ឆ្នាំផងដែរនោះ បានចំនួន ៥៩លើក និងគ្រាប់បាល់សរុបចំនួន ១៤គ្រាប់។
កីឡាករ កែវ សុខផេង កើតនៅថ្ងៃទី ៣ ខែមិនា ឆ្នាំ១៩៩២ នៅភូមិរការកណ្ដាល សង្កាត់រការកណ្ដាល ក្រុងក្រចេះ ខេត្តក្រចេះ។ បច្ចុប្បន្ន សុខផេង កំពុងលេងអោយក្លឹប វិសាខា ហើយក៏ជាកីឡាករជម្រើសជាតិផងដែរ។ ជាប្អូនប្រុសបង្កើតរបស់កីឡាករ កែវ សុខង៉ន ដែលក៏ជាអតីតកីឡាករជម្រើសជាតិ៕