កីឡដ្ឋានបាល់ទាត់ខេត្តកំពង់ស្ពឺ គ្រោងចាយថវិកាអស់ប្រមាណ៣លានដុល្លារអាមេរិក សាងសង់បានប្រមាណ៣៥ភាគរយហើយគិតត្រឹមពាក់កណ្ដាលខែកក្កដា នេះ ខណៈតាមគម្រោងនឹងបញ្ចប់ដំណាក់កាលទី១ នៅឆ្នាំ២០២២ ខាងមុខ។
កីឡដ្ឋានបាល់ទាត់លក្ខណៈស្ដង់ដារនេះ ស្ថិតនៅតាមបណ្ដោយផ្លូវជាតិលេខ៤៤ ចម្ងាយប្រមាណ៤គីឡូម៉ែត្រ ពីផ្លូវជាតិលេខ៤ នៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ដែលសាងសង់លើផ្ទៃដីជាង៤ហិកតា។
កន្លងមកឯកឧត្តម វ៉ី សំណាង អភិបាលខេត្តកំពង់ស្ពឺ ធ្លាប់បានបញ្ជាក់ថាការកសាងកីឡដ្ឋាននេះយ៉ាងហោចណាស់ចំណាយពេលវេលា យ៉ាងតិច១៥ខែ ចាប់ពីថ្ងៃបុកគ្រឹះទៅ (ថ្ងៃទី២១ ខែកុម្ភៈ ឆ្នាំ២០២១) ឬរួចរាល់អំឡុងមុនចូលឆ្នាំ២០២២។
ការសាងសង់កីឡដ្ឋានបាល់ទាត់នេះ បែងចែក ជា២ដំណាក់កាល ដែលដំណាក់កាលទី១ គឺជាការសាងសង់ ក្លោងទ្វារធំចំនួន២ របងជុំវិញ សួនកុមារ និងទីលានរត់ កន្លែងអង្គុយ VIP ៣,០០០កៅអី ទីលានបាល់ទាត់ ដែលបំពាក់ដោយភ្លើងបំភ្លឺទីលាន រួមជាមួយការរៀបចំបរិវេណជុំវិញ និងដំណាក់កាលទី២ ជាការសាងសង់ កន្លែងអ្នកទស្សនាកើនដល់ ៦,០០០នាក់៕
