បើត្រលប់ថយក្រោយទៅដល់អំឡុងឆ្នាំ១៩៩៩-២០០០ ពោលគឺកាលពីជាង២០ឆ្នាំមុន បុរសមុខសង្ហា មូន ម៉ារ៉ា គឺជារាជបុត្រក្នុងបេះដូងអ្នកគាំទ្រព្រោះតែសំឡេងច្រៀងដ៏ផ្អែមល្ហែម និងអត្ថន័យបទចម្រៀងសែនចាក់ដោតបេះដូង ធ្វើឱ្យបទចម្រៀងរបស់លោកមួយបទណា ក៏ទទួលបានការគាំទ្រយ៉ាងខ្លាំងពីសំណាក់មហាជននិយមស្ដាប់បទចម្រៀង។
ថ្វីត្បិតតែបច្ចុប្បន្នម្ចាស់បទ «កាដូឥតន័យ» មានវ័យរាងជ្របន្តិច មានក្រុមគ្រួសារ និងមានអាជីវកម្មផ្សេងៗក្នុងដៃ លែងមានបទចម្រៀង និពន្ធថ្មីៗចេញមកបម្រើអារម្មណ៍អ្នកគាំទ្រទៀតក្ដី តែជារឿយៗបុរសដែលមានបេះដូងសិល្បៈពេញទំហឹងរូបនេះ ក៏នៅតែមិនទៅណាឆ្ងាយចោលអ្នកគាំទ្ររបស់លោកនោះទេ ព្រោះលោកតែងតែផុសបទចំរៀងដែលលោកលើកយកមកច្រៀងឡើងវិញចែកជូនអ្នកគាំទ្រដែលនៅតែនឹករលឹកដល់សំឡេងលោកបានស្ដាប់កម្សាន្ត បំបាត់ភាពអផ្សុក ថែមទាំងលោកក៏នៅមានការងារក្នុងផ្នែកសិល្បៈផ្សេងៗជាហូរហែមិនបានទៅឆ្ងាយពីវិស័យនេះនោះឡើយ។
ថ្មីៗនេះដែរលោក មូន ម៉ារ៉ា បានផុសវីដេអូខ្លីមួយនៅលើផេកហ្វេសប៊ុករបស់លោក ដោយវីដេអូនោះគឺជាវីដេអូលោកច្រៀងបទចម្រៀង «ខុសត្រង់ណា?» ដោយមាត់ទទេ ជាមួយនឹងភ្លេង Acoustic យ៉ាងពីរោះប្រៀបដូចជាសំឡេងក្នុងកាសែតម៉ាញ៉េដែលអ្នកគាំទ្រធ្លាប់បានទិញមកចាក់ស្ដាប់មិនមានខុស រហូតអ្នកគាំទ្រលាន់សរសើរថាតារាចម្រៀងរូបនេះគ្រប់ៗគ្នាថា ទោះជាពេលវេលាកន្លងមកយូរយ៉ាងណាក្ដី ទឹកដមសំឡេងរបស់លោកនៅតែផ្អែមអង្រួនអស់បេះដូងអ្នកស្ដាប់ដដែល។
វីដេអូចម្រៀងខាងលើនេះទទួលបានការស្វាគមន៍យ៉ាងខ្លាំងពីសំណាក់ហ្វេនៗលើបណ្ដាញសង្គម ព្រោះមានចំនួនចុចពេញចិត្ត(Like) រហូត ៣,៩K ចំនួនចែករំលែកបន្ត (Share) ៦៦៥ និង ខមមិនពោលសរសើរនិងបង្ហាញពីការនឹករលឹក ហើយបង្ហាញពីចិត្តចង់ស្ដាប់ការបកស្រាយរបស់យ៉ាងច្រើនផងដែរពីបណ្ដាគណនីអ្នកលេងបណ្ដាញសង្គមហ្វេសប៊ុក។
ខាងក្រោមនេះជាការដកស្រង់នូវកាយល់ឃើញខ្លះៗពីខាងក្រោមផុសរបស់បទចម្រៀងរបស់លោក មូន ម៉ារ៉ា កាលពីថ្ងៃទី១៥ ខែកក្កដា ឆ្នាំ២០២១ កន្លងទៅ។
«Love Parents ពិរោះណាស់អាយដលចូលចិត្តសម្លេងបងច្រៀងតាមរាល់ថ្ងៃ»
«សម្បត្តិ កក្តដា កាលនៅយុវវ័យស្រលាញ់ណាស់បទប្រុសមូនម៉ារ៉ាចេះច្រៀងសឹងគ្រប់បទ»
«Long Makara សំលេងបងនៅដដែរកាលឆ្នាំ2000 1999»
«កានីកា កាន់ ស្តាប់តាំងពីអាយុ៦ឆ្នាំរហូតដល់ឥលូវអាយុ២៨ក៏នៅតែស្តាប់ទៀត
️សំខាន់សំលេងពូនៅដដែល៕»
សូមស្ដាប់ការបកស្រាយបទ «ខុសត្រង់ណា?» បែប Acoustic របស់លោក មួន ម៉ារ៉ា ខាងក្រោមនេះ ៖
