ក្រុមអ្នកវាយប្រហារមួយក្រុម នៅប្រទេសបារាំង បានព្យាយាមដុតបំផ្លាញផ្ទះរបស់អភិបាលក្រុង នៅជាយក្រុងប៉ារីស ហើយបានបាញ់កាំជ្រួចទៅលើប្រពន្ធ និងកូនៗ របស់អភិបាលក្រុង ដែលរត់គេចខ្លួនអំឡុងពេលកុបកម្មដ៏ហិង្សាឈានចូលដល់យប់ទី៥ ចាប់តាំងពីមានករណីប៉ូលីសបាញ់សម្លាប់យុវជនម្នាក់កាលពីថ្ងៃ អង្គារ សប្ដាហ៍មុន។ នេះបើយោងតាមការចេញផ្សាយដោយសារព័ត៌មាន BBC នាថ្ងៃ ចន្ទ ទី០៣ ខែកក្កដា ឆ្នាំ២០២៣។
ហេតុការណ៍នេះបានបង្កឱ្យមានការភ្ញាក់ផ្អើលយ៉ាងធំធេង ហើយត្រូវបានគេចាត់ទុកថា ជាការប៉ុនប៉ងមនុស្សឃាត ខណៈនាយករដ្ឋមន្ត្រីនៃប្រទេសបារាំង លោកស្រី Elisabeth Borne បានពិពណ៌នាថា វាមិនអាចអត់ឱនបាន។
ក្នុងឧប្បត្តិហេតុនេះ អភិបាលក្រុង L’Haÿ-les-Roses លោក Vincent Jeanbrun មិននៅផ្ទះទេ ប៉ុន្តែប្រពន្ធរបស់គាត់បានរងរបួសជើង ហើយកូនៗក៏រងរបួសផងដែរ។
យ៉ាងណាម៉ិញ ជនសង្ស័យក្នុងហេតុការណ៍សម្រុកចូលផ្ទះអភិបាលក្រុងនៅទីក្រុង L’Haÿ-les-Roses ភាគខាងត្បូងទីក្រុងប៉ារីស មិនត្រូវបានស្គាល់អត្តសញ្ញាណនោះទេ។
លោក Jeanbrun បាននិយាយថា លោកបាននៅក្នុងការិយាល័យរបស់លោកនៅសាលាក្រុង នៅពេលដែលផ្ទះរបស់លោក រងការវាយប្រហារនៅម៉ោង ០១:៣០នាទី (ម៉ោងក្នុងស្រុក) ពេលដែលភរិយា និង កូនៗកំពុងគេងលក់។
អភិបាលក្រុងបាននិយាយនៅក្នុងសេចក្តីថ្លែងការណ៍មួយថា ក្រុមអ្នកវាយប្រហារបានប្រើរថយន្តមួយគ្រឿង ដើម្បីបើកឆ្លងកាត់ទ្វារផ្ទះរបស់អភិបាលក្រុង L’Haÿ-les-Roses មុនពេលក្រុមកុបកម្មដុតរថយន្ត ដើម្បីឲ្យឆេះរាលដាលដល់ផ្ទះ។
បន្ទាប់មកនៅពេលដែលប្រពន្ធរបស់លោកអភិបាលក្រុង ឈ្មោះ Melanie Nowak ព្យាយាមរត់គេចជាមួយកូនៗ ដែលមានអាយុ៥ និង ៧ឆ្នាំ ពួកគេត្រូវបានវាយប្រហារដោយការបាញ់កាំជ្រួច។
ទាក់ទិននឹងបញ្ហានេះ អភិបាលក្រុង L’Haÿ-les-Roses លោក Jeanbrun បានហៅវាថាជា «ការប៉ុនប៉ងឃាតកម្មនៃភាពកំសាកដែលមិនអាចនិយាយបាន» ។ ខណៈការិយាល័យរដ្ឋអាជ្ញាសាធារណៈ បានចាប់ផ្តើមការស៊ើបអង្កេតលើបទប៉ុនប៉ងមនុស្សឃាតនេះ។
ការវាយប្រហារលើផ្ទះរបស់អភិបាលក្រុង Jeanbrun បានកើតឡើងនៅយប់ទី 5 នៃការតវ៉ាដ៏ហិង្សានៅទូទាំងប្រទេសបារាំងជុំវិញការស្លាប់របស់យុវជន Nahel M អាយុ ១៧ឆ្នាំ ដែលត្រូវបានបាញ់សម្លាប់ដោយប៉ូលីសនៅចន្លោះពេលធ្វើចរាចរណ៍។
ប៉ូលីសប្រហែល ៤៥,០០០នាក់ ត្រូវបានដាក់ពង្រាយនៅក្នុងប្រទេសបារាំងកាលពីថ្ងៃសៅរ៍ ដើម្បីគ្រប់គ្រងការតវ៉ា ហើយក្រសួងមហាផ្ទៃបាននិយាយថា យប់ថ្ងៃសៅរ៍មានភាពស្ងប់ស្ងាត់ជាងមុន ដោយមានការចាប់ខ្លួនក្រុមកុបកម្មតិចជាងមុន។
ទោះយ៉ាងណាក៏ដោយមានការចាប់ខ្លួនមនុស្សជាង ៧០០នាក់ នៅទូទាំងប្រទេស ហើយការដុតភ្លើងជាង ៨០០កន្លែង ត្រូវបានដុតដោយក្រុមកុបកម្មក្នុងអំឡុងពេលយប់។
យ៉ាងណាម៉ិញ លោក Jeanbrun បានជំរុញឱ្យរដ្ឋាភិបាលបារាំង ដាក់ប្រទេសក្នុងភាពអាសន្ន ដើម្បីឆ្លើយតបទៅនឹងកុប្បកម្ម ដែលប្រធានាធិបតី Emmanuel Macron រហូតមកដល់ពេលនេះ បានបដិសេធមិនធ្វើតាមសំណើររបស់លោក។ ទន្ទឹមនោះ មេដឹកនាំបារាំងគ្រោងជួបជាមួយមន្ត្រីកំពូលនៅពេលក្រោយដើម្បីពិភាក្សាអំពីវិបត្តិនេះ។
សូមជម្រាបថា ភាពវឹកវរនេះក៏បានបង្ខំឱ្យប្រធានាធិបតីបារាំង លោក អេម៉ានុយអែល ម៉ាក្រុង ត្រូវផ្អាកគម្រោងបំពេញទស្សនកិច្ចទៅកាន់អាល្លឺម៉ង់ផងដែរ ហើយលោក ម៉ាក្រុង បាននិយាយថា ការស្លាប់របស់យុវជន អាយុ១៧ឆ្នាំនោះ ត្រូវបានប្រើប្រាស់ជាលេស ដើម្បីបង្កអំពើហិង្សានៅក្នុងប្រទេស ហើយលោកបានចាត់ទុកវាថា «ជាការកេងចំណេញផលប្រយោជន៍ មិនអាចទទួលយកបាន លើការស្លាប់របស់រូបគេ»៕
