Sofia Cheung គឺជាតារាល្បីនៅ IG មានចំនួន Follower ជាង១៧.២K ព្រោះតែ Influencer បែបផ្សងព្រេងរូបនេះចូលចិត្តឡើងភ្នំ ជិះទូកកាយ៉ាក់ និងធ្វើសកម្មភាពផ្សេងៗនៅគ្រប់ទីកន្លែង ដោយមានរូបថត និងការរៀបរាប់ក្នុង IG Bio បង្ហាញស្រាប់។
Influencer ដែលជាតារា IG ល្បី Sofia Cheung វ័យ៣២ ឆ្នាំបានជួបគ្រោះថ្នាក់រហូតដល់បាត់បង់ជីវិតដោយសារតែធ្លាក់ជ្រោះក្នុងពេលដែលនាងកំពុងតែថតរូប Selfie ខ្លួនឯង។ យោងតាមសេចក្ដីរាយការណ៍ Sofia Cheung បានចេញទៅកម្សាន្តនៅ Ha Pak Pai សួនកម្សាន្តធម្មជាតិមួយជាមួយនឹងមិត្តរបស់នាង មុននឹងហេតុការណ៍នឹកស្មានមិនដល់នេះបានកើតឡើង។
នៅក្នុងហេតុការណ៍នោះ Sofia បានបាត់បង់ជំហរនៅពេលដែលនាងឈរនៅកំពូលមាត់ជ្រោះហើយក៏បានធ្លាក់ចូលទៅក្នុងជ្រោះដែលមានកម្ពស់១៦ហ្វីត ភ្លាមៗនោះមិត្តភក្ដិរបស់នាងទូរស័ព្ទទៅក្រុមសង្គ្រោះដើម្បីបញ្ជូនទៅសង្គ្រោះនៅមន្ទីរពេទ្យហុងកុងតែគួរឱ្យស្ដាយគ្រូពេទ្យមិនអាចសង្គ្រោះជីវិតបាន។
នារីជាតារាលើ Social Media រូបនេះតែងតែចែករំលែករូបភាពព្រឺព្រួចប្រឈមនឹងគ្រោះថ្នាក់ នៅលើបណ្ដាញសង្គម ហើយដោយសារតែមូលហេតុនេះទើបនាងមានឈ្មោះបោះសំឡេង។ ផុសចុងក្រោយរបស់នាងនៅ Instagram បានសរសេរថា៖ «ថ្ងៃល្អកំពុងតែមកហើយ ថ្ងៃល្អគឺថ្ងៃសៅរ៍ និង ថ្ងៃអាទិត្យ»
ក្រោយដំណឹងនៃមរណភាពរបស់កញ្ញាត្រូវបានផ្សព្វផ្សាយតាមសារព័ត៌មាន និងត្រូវបានចែករំលែកលើបណ្ដាញសង្គម ហ្វេនៗដែលជាអ្នកគាំទ្របានចូលមកចែករំលែកនូវមរណទុក្ខនិងសូមឱ្យដួងវិញ្ញាណនាងទៅកាន់ទីស្ងប់៕
