កញ្ញា អ៊ូ បញ្ញាសុកិត្យា នាយិកាគ្រប់គ្រងក្លិបរបស់ក្លិបបាល់ទាត់វិសាខា កាលពីល្ងាចថ្ងៃទី៦ ខែកក្កដា បានចេញដំណើរទៅបន្ដការសិក្សាលើកទី៣ នៃវគ្គ «គ្រប់គ្រងបាល់ទាត់ – Football Management នៃ UEFA Academy» ដែលរៀបចំដោយសហព័ន្ធកីឡាបាល់ទាត់អឺរ៉ុប (UEFA) នៅប្រទេសស្វីស។
កញ្ញា អ៊ូ បញ្ញាសុកិត្យា រំពឹងថា៖ ការចូលរួមសិក្សាត្រីមាសទី៣ នៃវគ្គ «គ្រប់គ្រងបាល់ទាត់ – Football Management នៃ UEFA Academy» នឹងទទួលបានជោគជ័យ ក៏ដូចជាផ្លែផ្កាថ្មីៗបន្ថែម តាមរយៈសៀវភៅមួយក្បាលទៀត។ កញ្ញាមានសុទិដ្ឋិនិយមថា៖«ខ្ញុំសង្ឃឹមថា ការចូលរួមសិក្សាត្រីមាសទី៣ នឹងទទួលបានកាន់តែច្រើនថែមទៀត»។
កញ្ញា អ៊ូ បញ្ញាសុកិត្យា គឺជាស្រ្តីជនជាតិខ្មែរដំបូងបង្អស់ដែលបានសិក្សាផ្នែកគ្រប់គ្រងបាល់ទាត់នៅឯប្រទេសស្វីស ខណៈដែលលោក លី ហ៊ាង អគ្គលេខាធិការក្លិបបាល់ទាត់ភ្នំពេញក្រោន បានឆ្លងកាត់វគ្គសិក្សានេះដោយជោគជ័យ នៅខែមិថុនា ឆ្នាំ២០២២ កន្លងទៅ។
សូមបញ្ជាក់ថាវគ្គសិក្សា UEFA ខាងលើ មានរយៈពេល ១ឆ្នាំ ដែលបានចាប់ផ្ដើមសិក្សាត្រីមាសទី១ តាំងពីខែកញ្ញា ឆ្នាំ២០២២ ។ ក្នុងនាមស្ដ្រីខ្មែរដំបូង ដែលទទួលបានឱកាសចូលរួមសិក្សាវគ្គដ៏មានសារៈសំខាន់នេះ កញ្ញា អ៊ូ បញ្ញាសុកិត្យា បានសម្ដែងការសប្បាយរីករាយ និងថ្លែងអំណរគុណជាខ្លាំង ចំពោះលោកជំទាវប្រធានក្លិប កែ សួនសុភី ដែលបានផ្ដល់ឱកាសដល់កញ្ញា ដើម្បីសិក្សារៀនសូត្រ ដកស្រង់បទពិសោធន៍ និងចំណេះដឹងថ្មីៗ សម្រាប់អភិវឌ្ឍន៍ខ្លួន ពិសេសដើម្បីបន្ដរួមចំណែកដឹកនាំ និងអភិវឌ្ឍន៍ក្លិបឲ្យកាន់តែរីកចម្រើន៕