ក្រុមជម្រើសជាតិអ្នកចម្បាំងអង្គរ (Angkor Warriors) របស់កម្ពុជា ធ្វើបានយ៉ាងល្អក្នុងប្រកួតទី៣ នៃវគ្គសន្សំពិន្ទុក្នុងពូល A ដោយបានយកឈ្នះលើ នេប៉ាល់ ក្នុងលទ្ធផល ២ ទល់នឹង ០ កាលពីថ្ងៃទី១១ ខែកក្កដា ។ លទ្ធផលនេះ បានធ្វើឲ្យក្រុមកម្ពុជា កក់កៅអីទៅកាន់ការប្រកួតកម្រិតពិភពលោក IESF World Esport Championships វិញ្ញាសា MLBB ដែលនឹងរៀបចំនៅទីក្រុង IASI ប្រទេស Romania។
ទោះយ៉ាងណា ក្រុមជម្រើសជាតិអ្នកចម្បាំងអង្គរ (Angkor Warriors) របស់កម្ពុជា នៅមានកាតព្វកិច្ចបន្ត ក្នុងការប្រកួតវគ្គ Playoff ដើម្បីដណ្តើមយកពានរង្វាន់ Gamers8 Asian Championship បន្តទៀត ដោយជួបក្រុមជម្រើសជាតិរបស់ប្រទេសហ្វីលីពីន នៅថ្ងៃនេះ វេលាម៉ោង ៦:២០ល្ងាចនេះ។
តារាងនៃការប្រកួតវគ្គ Playoff ៖
សម្រាប់លទ្ធផលប្រកួតទី១ ត្រូវបានបញ្ចប់ដោយ លទ្ធផល ឈ្នះក្រុមមកពីប្រទេសអារ៉ាប់រួម ២-០ ,ប្រកួតទី២ ត្រូវបានបញ្ចប់ដោយ លទ្ធផល ឈ្នះចាញ់ក្រុមមកពី ម៉ុងហ្គោលី ២-០ និងប្រកួតទី៣ ឈ្នះលើ នេប៉ាល់ ក្នុងលទ្ធផល ២ ទល់នឹង ០។
ជុំវិញជ័យជមន្នះឡើងទៅកាន់វគ្គPlayoff នេះដែរកីឡាករ សូ ម៉ារ៉ា ប្រធានក្រុមជម្រើសជាតិអ្នកចម្បាំងអង្គរ (Angkor Warriors) របស់កម្ពុជា បានលើកឡើងថា៖ «ខ្ញុំពិតជាសប្បាយចិត្តដែលទទួលបានកៅអីទៅកាន់ការប្រកួតកម្រិតពិភពលោក នៅប្រទេស Romania ហើយនេះគឺជាលទ្ធផលដែលក្រុមរបស់ពួកយើងបានគ្រោងទុករួចហើយ។ ការចូលរួមប្រកួតនៅ អារ៉ាប៊ីសាអ៊ូឌីត លើកនេះខ្ញុំមានអារម្មណ៍ថាប្លែកនៅឆ្ងាយពីប្រទេសកម្ពុជា និងបានផលលំបាក់បន្តិចបន្តួចចំពោះការហូបចុក និងស្នាក់នៅ»។
ម៉ារ៉ា បន្ថែមថា៖«បើទោះជាក្រុមបានឡើងមកដល់វគ្គនេះក៏ពិតមែនតែពួកយើងមិនសូវពេញចិត្តចំពោះលទ្ធផលនេះនៅឡើយទេ គឺពួកយើងចង់ឈ្នះទាំង៣ប្រកួត តែដោយសារក្រុមរបស់ប្រទេសម៉ុងហ្គោលី គឺពួកគេល្អ មួយវិញទៀតជាក្រុមដែលពួកយើងមិនសូវបានដឹងពីពួកគាត់ ប៉ុន្តែពួកគាត់បានដឹងពីយើងច្រើនដោយសារពួកយើងធ្លាប់បានបង្ហាញខ្លួននៅប្រកួតធំៗច្រើន ជាចំណុចដែលពួកគាត់បានសិក្សាពីយើងបាន»។
ប្រធានក្រុមជម្រើសជាតិរូបនេះ បញ្ជាក់ថា៖«បើមានឱកាសពួកយើងនឹងសងសឹកពួកគាត់(ក្រុមម៉ុងហ្គោលី) នៅក្នុងការប្រកួតវគ្គ Playoff ខណ:ក្រុមរបស់យើងនឹងត្រូវជួបជាមួយក្រុមមកហ្វីលីពីន ដែលជាគូប្រកួតធំជាងគេនៅក្នុងវគ្គនេះ តែយ៉ាងណាពួកយើងនឹងធ្វើឲ្យបានល្អដើម្បីឡើងទៅកាន់វគ្គបន្ត។ ចំពោះក្រុមដែល ម៉ារ៉ា គិតថាជាគូប្រជែងដ៏ខ្លាំងនៅក្នុងវគ្គនេះ គឺក្រុមហ្វីលីពីន និងក្រុមម៉ុងហ្គោលី»។
រំលឹកថា កាលពីថ្ងៃទី២៩ ខែមិថុនា នេះ សហព័ន្ធកីឡាអេឡិចត្រូនិកកម្ពុជា (EFC) បានបញ្ចេញបញ្ជីឈ្នះ ក្រុមជម្រើសជាតិអ្នកចម្បាំងអង្គរ (Angkor Warriors) របស់កម្ពុជា ក្នុងនោះមានសមាសភាពប្រតិភូសហព័ន្ធកីឡាអេឡិចត្រូនិកកម្ពុជារួមមាន៖
១. លោក ជាន ចាន់រ៉ា អគ្គលេខាធិការរង
២. លោក Alvarez Soriano Ralph James គ្រូបង្វឹក
៣. លោក សូ ម៉ារ៉ា កីឡាករ ប្រធានក្រុម
៤. លោក កុសល ពិសិដ្ឋ កីឡាករ
៥. លោក សុខ រដ្ឋ កីឡាករ
៦. លោក ទី ឧត្តម កីឡាករ
៧. លោក វិធូរ សុវិសាល កីឡាករ
គួរបញ្ជាក់ថា ការប្រកួតក្នុងកម្មវិធី Gamers8 Asia Championship ចាប់ផ្តើមពីថ្ងៃទី៨ ដល់ថ្ងៃទី១៤ ខែកក្កដា ឆ្នាំ២០២៣ នៅ រដ្ឋធានី រីយ៉ាត (Riyadh) ព្រះរាជាណាចក្រអារ៉ាប៊ីសាអ៊ូឌីត (Saudi Arabla) ដែលជាផ្នែកមួយនៃការប្រកួតជម្រុះ ដណ្តើមយកកៅអី ព្រឹត្តិការណ៍ 15th IESF World Championship 2023 នឹងត្រូវធ្វើឡើងនៅទីក្រុង IASI ប្រទេសរ៉ូម៉ានី ដែលគ្រោងចាប់ផ្ដើមនៅថ្ងៃទី ថ្ងៃទ២៥ ខែសីហា ដល់ថ្ងៃទី០៣ ខែកញ្ញាឆ្នាំ២០២៣៕
