រសៀលថ្ងៃទី១២ ខែមិថុនា ឆ្នាំ២០២៣ នេះ ឯកឧត្ដម ឧត្ដមសេនីយ៍ឯក យិត ភីរៈ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ នឹងអញ្ជើញដឹកនាំកិច្ចប្រជុំជាមួយប្រតិភូ គ្រូបង្វឹក កីឡាករ កីឡាការិនី ត្រៀមចេញទៅប្រកួតក្នុងព្រឹត្តិការណ៍កីឡានគរបាល និងកងពន្លត់អគ្គីភ័យ (World Police & Fire Games) ពិភពលោកលើកទី២០ នៅទីក្រុង Winnipeg ប្រទេស Canada។
អគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ បញ្ជូនកីឡា ចំនួន ៤៨នាក់ លើ ០៩ប្រភេទកីឡា ទៅចូលរួមប្រកួតប្រជែងដណ្ដើមមេដាយ រួមមាន៖ វាយសី, វាយកូនឃ្លីលើតុ,យូដូ, ជឺជីតស៊ូ, ហែលទឹក, ការ៉ាតេ, បាល់ទះក្នុងសាល, បាល់ទះឆ្នេរខ្សាច់, ចំបាប់ និង ចំបាប់កាច់ដៃ។
សូមជម្រាបជូនថា ព្រឹត្តិការណ៍កីឡានគរបាល និងកងកម្លាំងពន្លត់អគ្គិភ័យពិភពលោក លើកទី២០ ឆ្នាំ២០២៣ នៅប្រទេសកាណាដា នឹងចាប់ផ្តើមធ្វើឡើងពីថ្ងៃទី២៨ ខែកក្កដា ដល់ថ្ងៃទី៦ ខែសីហា ឆ្នាំ២០២៣។
គួរបញ្ជាក់ថា សម្រាប់ព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោកលើកទី១៩ កាលពីឆ្នាំ២០២២ នៅទីក្រុង Rotterdam ប្រទេសហូឡង់កន្លងទៅ កម្ពុជាដណ្តើមបានមេដាយសរុបចំនួន ៣៣គ្រឿង ក្នុងនោះមេដាយមាស ១៥គ្រឿង មេដាយប្រាក់ ៨គ្រឿង និងមេដាយសំរឹទ្ធ ១០គ្រឿង៕