សិល្បៈអន្តរជាតិ៖ នៅក្នុងសប្ដាហ៍ទីពីរនៃខែកក្កដា ឆ្នាំ២០២៣ នេះរឿងរ៉ាវ និងដំណឹងចចាមអារ៉ាមស្នេហារបស់នាង Lisa សមាជិកក្រុម Blackpink កំពុងតែមានការចាប់អារម្មណ៍ខ្លាំងពីសំណាក់អ្នកតាមដាន។ ខណៈដែលភាពស្រពិចស្រពិលរឿងកុងត្រាថ្មីរបស់នាង ជាមួយនឹងផលិតកម្ម YG ក៏មិនទាន់មានការបញ្ជាក់ឱ្យជ្រះស្រឡះនៅឡើយដែរថានឹងបន្តទៀត ឬក៏លើកដៃបាយៗត្រឹមនេះ។
រឿងស្នេហានិងរឿងការងាររបស់តារាចម្រៀងកូរ៉េ ដើមកំណើតមកពីខេត្តបុរីរ៉ាំ នាង Lisa Blackpink កំពុងស្ថិតនៅក្នុងតាមដានយ៉ាងយកចិត្តទុកដាក់ពីសាធារណជន និងអ្នកគាំទ្រ ជាពិសេសបុរសដែលត្រូវបានគេមើលឃើញថា មានសិទ្ធិជាម្ចាស់គ្រងបេះដូង Lisa Blackpink មានប្រវត្តិគ្រួសារមិនធម្មតានោះឡើយ។
បុរសសង្ហាដែលឧស្សាហ៍បង្ហាញខ្លួននៅក្បែរ Lisa ស្ទើគ្រប់ពេលវេលាមានឈ្មោះពិតថា Frédéric Arnault កើតនៅឆ្នាំ១៩៩៥ បច្ចុប្បន្នមានអាយុ២៨ឆ្នាំ ជាកូនប្រុសទីពីររបស់កំពូលមហាសេដ្ឋីបារាំង Bernard Arnault និងភរិយាគឺលោកស្រី Hélène Mercier។
Frédéric ត្រូវបានគេមើលឃើញថាជាអ្នកស្នងមរតកដ៏លេចធ្លោបំផុតប្រចាំត្រកូលអភិជនដែលមានទ្រព្យជិត២៤០ពាន់លានដុល្លារ។ ក្រៅពីកាន់កាប់ Brand ដ៏ធំក្នុងពិភពលោកហើយនោះកំពូលមហាសេដ្ឋីBernard Arnault ក៏បានធ្វើឲ្យមនុស្សជាច្រើនកោតសរសើរផងដែរ ព្រោះលោកមានកូនចំនួន ៥ នាក់ សុទ្ធតែមានសមត្ថភាពឆ្នើម និងជាអ្នកស្នងមរតកដ៏ឥតខ្ចោះប្រចាំក្រុមហ៊ុន។ ក្នុងនោះក៏រួមមានទាំង Frédéric Arnault ដែលកំពុងត្រូវបានគេសង្ស័យថាជាម្ចាស់គ្រងបេះដូងរបស់កញ្ញា Lisa Blackpink ម្នាក់ផងដែរ។
ដ្បិតជាបុគ្គលល្បី ប៉ុន្តែបងប្អូនបង្កើតរបស់ Frédéric ទាំងអស់ រក្សាបាននូវឯកជនភាពនៃជីវិតផ្ទាល់ខ្លួនរបស់ពួកគេ។ បុរសដែលជាទាយាទកំពូលមហាសេដ្ឋីរូបនេះមានសមត្ថភាពនិយាយបាន ៤ ភាសា យ៉ាងស្ទាត់ជំនាញដូចជា បារាំង អង់គ្លេស អ៊ីតាលី និង អាល្លឺម៉ង់។ លើសពីនេះ Frédéric ក៏ជាមនុស្សពហុជំនាញដែលអាចលេងព្យាណូយ៉ាងស្ទាត់និងវាយកូនបាល់បានផងដែរ។
ទោះបីជាគ្រួសាររបស់លោកស្ថិតនៅក្នុងពិភពជំនួញក៏ដោយ Frédéric មានទិសដៅផ្សេងគ្នា ព្រនៅពេលសិក្សាមុខជំនាញគណិតវិទ្យា និងវិទ្យាសាស្ត្រកុំព្យូទ័រនៅ École Polytechnique។
ក្រោយរៀនចប់ ជំនាញគណិតវិទ្យា និងវិទ្យាសាស្ត្រកុំព្យូទ័រនៅ École Polytechnique លោក និងមិត្តភក្តិម្នាក់បានចាប់ផ្តើមបង្កើត ក្រុមហ៊ុនមួយជាមួយគ្នា ដែលជាក្រុមហ៊ុនផ្ដល់សេវាទូទាត់ប្រាក់តាមទូរសព្ទ។ ក្រោយមកក្រុមហ៊ុននេះត្រូវបានលក់ទៅវិញ ដោយលោកចង់ផ្តោតលើការងារពេញម៉ោងឱ្យ TAG Heuer។
នៅអាយុត្រឹមតែ ២៥ ឆ្នាំ យុវជននេះត្រូវបានតែងតាំងជា CEO របស់ TAG Heuer ដែលជាម៉ាកនាឡិកាដ៏ល្បីបំផុតរបស់អាណាចក្រ LVMH ហើយបានធ្វើឱ្យលោកក្លាយជាសមាជិកក្មេងជាងគេទីពីរនៃគ្រួសារ Arnaultដែលបានទទួលតំណែងនោះបន្ទាប់ពីបងប្រុសរបស់លោកឈ្មោះ Alexandre។
ភ្លាមៗបន្ទាប់ពីឡើងកាន់តំណែងជា នាយកប្រតិបត្តិវ័យក្មេងរបស់ TAG Heuer លោក Frédéric បានបង្ហាញទេពកោសល្យរបស់ខ្លួន នៅពេលដោយបាននាំយកកិច្ចសន្យាជាច្រើនដែលមិននឹកស្មានដល់សហការជាមួយក្រុមហ៊ុនរថយន្តប្រណីត Porsche ឬជាមួយកំពូលតារាដែល “ពិបាកអញ្ជើញបំផុត” គឺ Ryan Gosling។
ចំណុចរសើបដែលបណ្ដាលឱ្យមានការសង្ស័យនៃទំនាក់ទំនងរវាងអ្នកទាំងពីរ គឺ Frédéricតែងតែមានវត្តមាននៅក្បែរ Lisa (BLACKPINK) ជាច្រើនដង។ ក្នុងនាមជាអ្នកស្នងមរតករបស់គ្រួសារ Brand ដ៏ធំបំផុតរបស់ពិភពលោក Frédéric Arnault តែងតែបង្ហាញខ្លួននៅក្នុងព្រឹត្តិការណ៍ម៉ូដសំខាន់ៗ និងជួបជាមួយមនុស្សល្បីៗជាច្រើនជុំវិញពិភពលោក។
យ៉ាងណាមិញ កាលពីពេលថ្មីៗនេះ វីដេអូដែលបង្ហាញ មុខលោកនៅជាមួយ Lisa (BLACKPINK) ស្រាប់តែធ្វើឲ្យក្តៅគគុកនិងមានការតាមដានពាសពេញបណ្ដាញសង្គម។ ភ្លាមៗនៅពេលដែលពាក្យចចាមអារ៉ាមស្នេហារបស់អ្នកទាំងពីរបានផ្ទុះឡើង វីដេអូជាច្រើនទៀតដែលថតសកម្មភាពសន្ទនាគ្នា និងជជែកគ្នាលេងក្នុងព្រឹត្តិការណ៍ម៉ូដផ្សេងទៀតក៏ត្រូវបាន “ជីកកកាយ” យកមកទម្លាយ ហើយទទួលបានការចូលមើលរាប់សែនដង។
Lisa គឺជាបុគ្គលល្បីដែលមានប្រជាប្រិយភាពលំដាប់ពិភពលោក ចំណែក Frédéric គឺជាកូនប្រុសមកពីគ្រួសារអភិជន ដូច្នេះគេមើលឃើញថាអ្នកទាំងពីរពិតជាសមគ្នាបំផុត។ មែនទែនទៅទំនាក់ទំនងស្នេហាដែលកំពុងផ្ទុះការចាប់អារម្មណ៍នេះមិនទាន់មានការទទួលស្គាល់ជាផ្លូវការណាមួយនៅឡើយទេ ប៉ុន្តែអ្នកគាំទ្របានគាំទ្រយ៉ាងពេញទំហឹងដោយមិនជំទាស់ប្រសិនបើតារា K-Pop និងបុរសសង្ហាទាយាទ LVMH ពិតជាកំពុងបណ្ដុះពន្លកស្នេហ៍ជាមួយគ្នាមែននោះ៕
