សិល្បៈជាតិ៖ លើកនេះជាលើកទីពីរហើយដែលបេក្ខនារីតំណាងប្រទេសកម្ពុជាកញ្ញា លីវ ជីលី មានឱកាសតំណាងកម្ពុជាចេញទៅប្រកួតនៅឆាកអន្តរជាតិ ប៉ុន្តែកញ្ញានៅតែមិនអាចឈ្នះមកុដ Miss Supranational 2023 បាន។ ចំពោះរឿងនេះមានអ្នកចេញមកផ្ដល់ដំបូន្មានដល់កញ្ញាដោយប្រាប់ពីមូលហេតុដែលកញ្ញាមិនអាចយកឈ្នះចិត្តគណៈកម្មការប្រកួតបាន។
សូមអាន៖ លីវ ជីលី បោះសម្ដីមានសមត្ថភាពចិញ្ចឹមខ្លួនឯង មិនត្រូវការអ្នកមកជួយចិញ្ចឹម!
អតីត Miss Grand Cambodia ឆ្នាំ២០២0 កញ្ញា លីវ ជីលី ឬ ជីលី ទេវី ទទួលបានឱកាសមាសម្ដងទៀតក្រោយកញ្ញាត្រូវបានជ្រើសរើសជាបេក្ខភាពបវរកញ្ញា Miss Supranational Cambodia 2023 តំណាងកម្ពុជាចេញទៅប្រកួតនៅប្រទេសប៉ូឡូញ។ បេក្ខនារីតំណាងកម្ពុជារូបនេះបានហោះចាកចេញពីប្រទេសកម្ពុជាកាលពីថ្ងៃទី២៥ខែមិថុនា ឆ្នាំ២០២៣ កន្លងទៅ។ លើកនេះកញ្ញានៅតែមិនអាចទទួលបានជ័យជំនះ ហើយមិនជាប់សូម្បីតែចូលដល់ Top ណាមួយនោះឡើយ។ ការរបូតមកុដលើកនេះកញ្ញាមិនត្រឹមតែទទួលបាននូវការលើកទឹកចិត្តពីអ្នកគាំទ្រឡើយ ប៉ុន្តែកញ្ញាក៏ទទួលរងនូវពាក្យរិះគន់រហូតសាមីខ្លួនបានចេញមកបង្ហាញពីចំណាប់អារម្មណ៍ខ្លួនថា៖ «ខ្ញុំយល់អំពីវិស័យបវរកញ្ញាកាន់តែច្បាស់នៅពេលនេះអ្នកយល់លើកដៃ អ្នកឆ្ងល់អាចសួរខ្ញុំបានឯងខំតស៊ូចង់ងាប់ចង់រស់ហើយនេះក៏ជាលើកចុងក្រោយផងដែរស្បថយាយមែន»។
ការចេញមកលើកឡើងរបស់កញ្ញា លីវ ជីលី នេះមានទាំងអ្នកគាំទ្រលើកទឹកចិត្តចំពោះការខិតខំប្រឹងប្រែងរបស់កញ្ញា និងអ្នកដែលមិនគាំទ្រ ក្នុងនោះក៏មានអ្នកផ្ដល់មតិជាដំបូន្មានដល់កញ្ញា ព្រមទាំងបានលើកពីមូលហេតុនិងកត្តាធ្វើឱ្យស្រីស្អាតតំណាងកម្ពុជារូបនេះមិនអាចយកឈ្នះចិត្តគណៈកម្មការក្នុងការប្រកួតលើកនេះផងដែរ ដោយសារព័ត៌មានសូមបកប្រែមិនផ្លូវការដូចតទៅ៖ «អរគុណដែលបានតំណាងឱ្យប្រទេសកម្ពុជានៅលើឆាកអន្តរជាតិបង។ ប៉ុន្តែរឿងមួយដែលខ្ញុំចង់ប្រាប់បងថាជាបវរកញ្ញាមិនមែនគ្រាន់តែសំដៅលើភាពស្រស់ស្អាតមួយមុខប៉ុណ្ណោះទេប៉ុន្តែបងត្រូវបង្ហាញសមត្ថភាពគ្រប់យ៉ាងឱ្យគេគ្រប់គ្នាបានឃើញ។ ខ្ញុំសង្កេតឃើញថានៅពេលបងឡើងបង្ហាញសមត្ថភាពនៅលើវេទិកាអន្តរជាតិ ពេលបងកំពុងតែប្រកួតលើវិញ្ញាសាណាមួយនោះ បងតែងតែ Live នៅលើបណ្ដាញសង្គម ហើយគណៈកម្មការគេប្រាកដជាកត់ចំណាំបងទុកថាបងបានធ្វើអ្វីខ្លះ ហើយបង្កឱ្យកើតមានបញ្ហាអ្វី ម្យ៉ាងអ្វីដែលបងបានធ្វើវាក៏បង្ហាញពីសមត្ថភាពបងផងដែរ ជាងនោះទៀតវាក៏ជាកត្តាមួយបានផ្ដល់ឱកាសឱ្យទៅបេក្ខនារីដទៃ»។
បើក្រឡេកទៅមើល Comment វិញគេឃើញថាអ្នកគាំទ្រមួយចំនួនបានលើកទឹកចិត្តនិងកោតសរសើរចំពោះការលះបង់របស់កញ្ញា លីវ ជីលី ព្រោះអ្នកគាំទ្រទាំងអស់នោះបានដឹងថាកញ្ញាបានប្រើកញ្ចប់ថវិកាផ្ទាល់ខ្លួនរហូតខ្ទង់មើលដុល្លារ ត្រៀមលក្ខណៈសម្បត្តិគ្រប់ ដើម្បីចេញទៅប្រកួតលើកនេះ។ ក្នុងចំណោមការលើកឡើងជាច្រើននោះគេចាប់អារម្មណ៍ឃើញថា លីវ ជីលី បានចូលទៅឆ្លើយឆ្លងជាមួយនឹងអ្នកគាំទ្ររបស់ខ្លួនដែលមានអត្ថន័យថាការរបូតមកុដរបស់ខ្លួនលើកនេះ មិនគ្រាន់តែទៅលើសមត្ថភាពនោះទេ ប៉ុន្តែអាស្រ័យដោយមានរឿងទឹកលុយជាកត្តារួមផ្សំ ដែលធ្វើឱ្យមានមតិវិភាគខ្លះលើកឡើងថាកញ្ញាប្រហែលចង់សំដៅដល់មិនមានស្ពន់សឺជួយឧបត្ថម្ភលុយសម្រាប់ការចេញប្រកួត ប៉ុន្តែអ្នកខ្លះទៀតបែរជាយល់ថាកញ្ញាប្រហែលជាអស់ទឹកចិត្តដែលខំចាយលុយខ្លួនឯងដើម្បីការប្រកួតហើយបែរជានៅរងនូវមតិរិះគន់ទៀត? ខណៈដែលអ្នកខ្លះទៀតយល់ថាកញ្ញាអាចនឹងអន់ចិត្តដែលសន្ទុះបោះឆ្នោតគាំទ្រខ្លួនមិនមានសន្ទុះខ្លាំងដូចកាលចេញទៅប្រកួតនៅប្រទេសថៃ។ ចំពោះករណីនេះដែរ សារព័ត៌មានត្រយង បានទំនាក់ទំនងទៅសាកសួរកញ្ញា លីវ ជីលី ដើម្បីស្រាយបំភ្លឺ ប៉ុន្តែមិនអាចទំនាក់ទំនងបាន។
គួររំលឹកឡើងវិញថាកញ្ញា លីវ ជីលី ធ្លាប់ជាប់ជាបេក្ខភាពតំណាងប្រទេសកម្ពុជារួចម្ដងមកហើយកាលពីឆ្នាំ២០២០ នៅក្នុងកម្មវិធី Miss Grand Internationalដោយកាលណោះកញ្ញាបានឈានចូលដល់ Top20 តាមរយៈការ Vote គាំទ្រយ៉ាងភ្លូកទឹកភ្លូកដីពីសំណាក់អ្នកគាំទ្រនៅកម្ពុជា៕
សូមទស្សនាព័ត៌មាននេះជាវីដេអូខាងក្រោម
