សិល្បៈអន្តរជាតិ៖ អតីតអគ្គនាយកប្រតិបត្តិរបស់ Paramount and 20th Century Fox បានចេញមកព្រមានថាឧស្សាហកម្មហូលីវូដនឹងធ្លាក់ចូលក្នុងគ្រោះអាសន្ន ប្រសិនបើមិនមានដំណោះស្រាយណាមួយចំពោះកូដកម្មលើកនេះទេ។
យោងតាមសារព័ត៌មាន The Variety ក្រុមហ៊ុនផលិតភាពយន្តដ៏ធំរបស់អាមេរិក Hollywood កំពុងតែប្រឈមនឹងបញ្ហាប្រទាំងប្រទើសលើការធ្វើកូដកម្មរបស់បុគ្គលិកជាប្រវត្តិសាស្ត្រ។ នៅក្នុងបញ្ហានេះដែរលោក Barry Diller ដែលជាអតីតអគ្គនាយកប្រតិបត្តិរបស់ Paramount and 20th Century Fox CEO បានចេញមកព្រមានចំពោះបញ្ហាទៅកាន់ក្រុមហ៊ុន Hollywood ឱ្យប្រញាប់រកដំណោះស្រាយឱ្យបានមុនថ្ងៃទី១ ខែកញ្ញា បើមិនដូច្នេះទេនោះ ច្បាស់ជាជួបនឹងគ្រោះអាសន្នដួលរលំជាក់ជាមិនខាន។ នៅក្នុងឱកាសបង្ហាញវត្តមាននៅក្នុងកម្មវិធី Face The Nation លោក Diller បានមានប្រសាសន៍ថាប្រសិនបើមិនមានការបញ្ជាក់ពីពេលវេលាដោះស្រាយនេះឱ្យច្បាស់ទេនោះ អ្នកទស្សនាប្រាកដជានឹងគ្មានភាពទស្សនាឡើយនៅខណៈដែលរដូវកាល Christmas កាន់តែខិតជិតមកដល់។
លោកបានមានប្រសាសន៍ពន្យល់យ៉ាងដូច្នេះថា៖ «គ្មានភាពយន្តមានន័យថាបាត់បង់ចំនួនអ្នកចុះឈ្មោះទស្សនា ហើយចំណូលដែលទទួលបានពីភាពយន្ត និងពីឧស្សាហ៍ទូរទស្សន៍ច្បាស់ជាជួបផលប៉ះពាល់។ ការពន្យារពេលដោះស្រាយបញ្ហាមិនអាចបញ្ចៀសការវាយប្រហារបាននោះទេ។
សហព័ន្ធវិទ្យុនិងទូរទស្សន៍សហរដ្ឋអាមេរិក បានចូលរួមជាមួយនឹងសហជីពគាំទ្រខាងអ្នកសម្ដែង អ្នកនិពន្ធ និងអ្នកដឹកនាំរឿង ធ្វើកូដកម្មក្រោយការចរចារយៈពេល៥សប្ដាហ៍កន្លងមកជាមួយនឹងសហជីពខាងផលិតករម្ចាស់ក្រុមហ៊ុន ខាងតំណាងផលិតកម្មនិងទូរទស្សន៍ បរាជ័យ ព្រោះតែមិនព្រមឯកភាពត្រង់ចំណុចសំខាន់ជាងគេបំផុត អំពីរឿងប្រាក់ខែ និងប្រាក់ឧបត្ថម្ភ។
កាលបរិច្ឆេទដោះស្រាយបញ្ហានេះត្រូវបានដាក់នៅថ្ងៃទី១ ខែកញ្ញា ប៉ុន្តែលោក Barry Diller បានលើកឡើងថា ប្រសិនបើគ្មានការទុកចិត្តគ្នាទេនោះ នឹងធ្វើឱ្យកើតមានមហន្តរាយយ៉ាងធំចំពោះឧស្សាហកម្មមួយនេះនៅទីបញ្ចប់។ «និយាយទៅដូចជាខ្ញុំកំពុងតែយំប្រាប់ទេវតា ប៉ុន្តែនៅក្នុងស្ថានភាពដ៏តានតឹងនេះ វាអាចទៅរួចដែលឧស្សាហកម្មភាពយន្តទាំងមូលនឹងត្រូវដួលរលំ។»
អតីតអគ្គនាយករូបនេះបានលើកឡើងដែរថាបញ្ហាដែលបង្កឱ្យកើតមានកូដកម្មជាប្រវត្តិសាស្ត្រនេះគឺបណ្ដាលមកពីគំលាតប្រាក់បៀវត្សរ៍រវាងប្រធានគ្រប់និងតួសម្ដែង។មួយវិញទៀតគឺបណ្ដាលមកពីក្រុមហ៊ុនហូលីវូដទាមទារប្រើប្រាស់បញ្ហាសិប្បនិមិត្តមកជំនួសមនុស្ស ជំនួសអ្នកសម្ដែង និង អ្នកសរសេរ។ល។
គួររំលឹកឡើងវិញថាកូដកម្មដ៏ធំនិងដំបូងជាប្រវត្តិសាស្ត្រនេះកើតឡើងអាស្រ័យដោយសារតែតារាតូចតាច មិនសូវមានកេរ្តិ៍ឈ្មោះ បានប្រាក់ខែតិច ហើយច្រើនតែរស់នៅខ្វះមុខខ្វះក្រោយដូច្នេះពួកគេកើតមានការបារម្ភចំពោះបច្ចុប្បន្ននិងអនាគត ដែលបណ្ដាលមកពីកើតមានហានិភ័យនៃការប្រើប្រាស់បច្ចេកវិទ្យាទំនើបបញ្ញាសិប្បនិមិត្ត មកជំនួសមនុស្ស ជំនួសអ្នកសម្ដែង និងអ្នកសរសេរ។ មួយវិញទៀតការផលិតកុនដោយប្រើប្រាស់បច្ចេកទេស AI នឹងកាត់បន្ថយការងាររបស់មនុស្ស ដូចជាតួនាទីរបស់តួសម្ដែង អ្នកបញ្ចូលសំឡេង អ្នកនិពន្ធសាច់រឿង ដូច្នេះទើបពួកគេមិនសុខចិត្តទាល់តែសោះ និងបានធ្វើបាតុកម្ម កុបកម្ម និងកូដកម្ម តាំងពីខែឧសភា និងមិថុនា កន្លងមក៕
ប្រភព៖ Variety, Kenh14
