សិល្បៈជាតិ៖ អ្នកនាង គង់ សុជាតិ បានបង្ហោះសារប្រាប់សាធារណជនឱ្យដឹងថា អ្នកនាងពិតជាមានមោទកភាពយ៉ាងខ្លាំងចំពោះកូនស្រីអ្នកនាង ដែលពេលថ្មីៗនេះកូនស្រីដណ្ដើមបានមេដាយសិស្សពូកែចំនួន ៩ ពីប្រទេសកូរ៉េក្នុងកម្មវិធី WSC Seoul Global Round 2023 ដែលជាកម្មវិធីប្រកួតសិស្សពូកែលំដាប់អន្តរជាតិ។
អាចនិយាយបានថា ជាជោគជ័យថ្មីសម្រាប់កម្ពុជាដែលមានកញ្ញា ម៉ៅ សាល់ភាពណេលលី ហៅក្រៅ Nemo មានអាយុ១៨ឆ្នាំ តំណាងឱ្យសិស្សពូកែកម្ពុជាចូលរួមប្រកួតប្រជែងនៅប្រទេសកូរ៉េ ក្នុងនោះកញ្ញាបានចាកចេញពីប្រទេសកម្ពុជាទៅប្រកួតនៅថ្ងៃទី១២ ខែកក្កដា ឆ្នាំ២០២៣។ កន្លងមក កាលពីឆ្នាំ ២០១៩ កញ្ញាក៏ធ្លាប់ចូលរួមប្រកួតនៅក្នុងកម្មវិធីនេះនៅប្រទេសអូស្ត្រាលីឈ្នះបានមេដាយមាស និងប្រាក់ចំនួន ៤ គ្រឿង។
អ្នកនាង គង់ សុជាតិ បានរៀបរាប់យ៉ាងដូច្នោះនៅលើបណ្ដាញសង្គមហ្វេសប៊ុក៖ «មានមោទកភាពណាស់ដែលកូនស្រីរបស់ម្តាយជាក្មេងស្រីដែលពូកែហើយឆ្លាតលើកនេះមកដល់ប្រទេសកូរ៉េក្នុងកម្មវិធីប្រួត WSC Seoul Global Round 2023 ទទួលបានមេដាយ ៩ ហើយនៅមានបន្តទៀត សូមពាក្យជូនពរម្នាក់មួយមកអ៊ំពូមីងទាំងអស់គ្នា»។
ក្រៅពីបញ្ចប់ការប្រកួតយ៉ាងស្វិតស្វាញរួចមក គេមើលឃើញថា អ្នកនាង គង់ សុជាតិ និងកូនស្រីក៏បានធ្វើដំណើរតាមតំបន់ទេសចរណ៍ល្បីៗនៅលើក្នុងប្រទេសកូរ៉េផងដែរ។ សម្រាប់មជ្ឈដ្ឋានមហាជនវិញ ក៏បានលើកសរសើរអំពីសមត្ថភាពនៃការចិញ្ចឹមកូនរបស់អ្នកនាង គង់ សុជាតិ ដោយបានបណ្ដុះបណ្ដាលកូនស្រីឱ្យទទួលបានការសិក្សាខ្ពង់ខ្ពស់ និងក្លាយជាទំពាំងស្នងឫស្សីដ៏ល្អថែមទៀតសម្រាប់ប្រទេសជាតិ។
គួររំលឹកថា អ្នកនាង គង់ សុជាតិ និងអតីតស្វាមីលោក ម៉ៅ សាល់ភាព មានកូនប្រុសម្នាក់ឈ្មោះ ម៉ៅ សាល់ភាពបុត្រ និងកូនស្រីឈ្មោះ ម៉ៅ សាល់ភាពណេលលី។ ក្រោយចែកផ្លូវគ្នាជាមួយអតីតស្វាមី អ្នកនាង គង់ សុជាតិ បានរៀបការជាមួយលោក ជា វិបុល មានកូនស្រីម្នាក់ឈ្មោះ ជាសុជាតិ នារីដូរី។
សូមជម្រាបថា កម្មវិធី World Scholar’s Cup គឺជាការប្រកួតសិស្សពូកែលំដាប់អន្តរជាតិ ដែលមានសិស្សចូលរួមប្រកួតពីបណ្ដាប្រទេសជាច្រើនជុំវិញពិភពលោក ក្នុងការប្រកួតល្បងប្រាជ្ញាអំពីប្រវត្តិសាស្ត្រ ការសិក្សាសង្គម សិល្បៈ និងតន្ត្រី អក្សរសាស្ត្រ ប្រព័ន្ធផ្សព្វផ្សាយ វិទ្យាសាស្ត្របច្ចេកវិទ្យា និងផ្នែកគណិតសាស្ត្រជាដើម៕
