នៅរសៀលថ្ងៃពុធ ទី២៦ ខែកក្កដា ឆ្នាំ២០២៣ Thiago Teixeira (ឈ្មោះខ្មែរ ហៅសែន ចន្ទរិទ្ធីគុនខ្មែរ) ប្រកាសចាកចេញពីក្លិបប្រដាល់ Kun Khmer International Fighters របស់ឧកញ៉ា ស្រី ចាន់ថន ជាផ្លូវការ។
សែន ចន្ទរិទ្ធីគុន បានថ្លែងថា៖«ខ្ញុំសូមជម្រាបជូនអ្នករាល់គ្នាថា ខ្ញុំបានសម្រេចចិត្តចាកចេញពីអ្នកប្រដាល់គុនខ្មែរអន្តរជាតិ។ តាមពិតខ្ញុំចាកចេញជាងមួយខែមុន។ ខ្ញុំជឿថាវាដល់ពេលហើយដើម្បីស្វែងរកឱកាសថ្មីៗ និងស្វែងរកបញ្ហាប្រឈមថ្មីៗនៅកន្លែងផ្សេង»។
Thiago បន្តទៀតថា៖«បច្ចុប្បន្ននេះ ខ្ញុំបើកចំហរដើម្បីបង្កើតភាពជាដៃគូថ្មី ហើយខ្ញុំទន្ទឹងរង់ចាំយ៉ាងអន្ទះសារក្នុងការស្វែងរកគម្រោង និងបុគ្គលផ្សេងទៀតដែលខ្ញុំអាចសហការជាមួយ។ សូមឱ្យសិល្បៈក្បាច់គុនរបស់យើងរីកចម្រើន»។
ជាចុងក្រោយ Thiago Teixeira និយាយថា៖«ខ្ញុំសូមជូនពរដោយស្មោះអស់ពីដួងចិត្តអ្នកទទួលបានជោគជ័យជាបន្តបន្ទាប់និងការពេញចិត្តយ៉ាងខ្លាំងនៅក្នុងការខិតខំរបស់អ្នក។ ដោយស្មោះអស់ពីចិត្តពី Rithy Kun»៕
គួរដឹងថាកាលពីព្រឹកថ្ងៃសៅរ៍ ទី៨ ខែមេសាឆ្នាំ២០២៣ សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា បានឧបត្ថម្ភជាថវិកា២០,០០០ដុល្លារ និងផ្ដល់សញ្ជាតិខ្មែរ ដល់កីឡាករប្រដាល់ជនជាតិប្រេស៊ីល រូបនេះ។
កីឡាករ Thiago Teixeira មានឈ្មោះបោះសំលេងនៅក្នុងស្រុកខ្មែរ បន្ទាប់ពីរូបគេបានឡើងប្រកួតដណ្តើមខ្សែក្រវាត់ ខ្សែក្រវាត់គុនខ្មែរពិភពលោក IPCC Kun Khmer World Champion នៅរាត្រីថ្ងៃទី១១ ខែកុម្ភៈ ឆ្នាំ២០២៣ កន្លងទៅ ជាមួយកីឡាករ ធឿន ធារ៉ា លើប្រភេទទម្ងន់ ៧៧គីឡូក្រាម។ ធឿន ធារ៉ា បានវាយកែងបណ្តាលឱ្យអ្នកប្រយុទ្ធ Thiago Teixeira មានរបួសបែបធំ រហូតគ្រូពេទ្យបញ្ឈប់ការប្រកួតនៅគ្រានោះ។ តាំងពីពេលនោះមក មហាជនបានស្គាល់ថា Thiago Teixeira ជានរណា?
មហាជនខ្មែរបានបង្ហាញក្ដីស្រលាញ់ដល់កីឡាករ Thiago រហូតរូបគេមិនអាចឈានជើងត្រឡប់ទៅកាន់ប្រទេសថៃ បានវិញ ដែលទីនោះជាទីកន្លែងរូបគេហ្វឹកហាត់ប្រដាល់រហូតប្រកួតបានជាង១០០លើក និងឈ្នះខ្សែក្រវាត់មួយចំនួនផងដែរ។
រហូតដល់ថ្មីៗនេះThiago Teixeira បានធ្វើឱ្យគ្រប់គ្នា មានការភ្ញាក់ផ្អើល និងកោតសរសើរខ្លាំង បន្ទាប់ពីរូបគេ បានផ្តួលកីឡាកររបស់អង់គ្លេស Joe Craven ឱ្យសន្លប់ក្នុងទឹកទី២ ដើម្បីក្លាយជាម្ចាស់ខ្សែក្រវាត់កម្រិតពិភពលោក WMO (World Muaythai Organization) សម្រាប់ការប្រកួតតំណាងឱ្យកម្ពុជា ជាលើកដំបូង កាលពីថ្ងៃទី២ ខែមេសា ឆ្នាំ២០២៣ នៅប្រទេសអាល្លឺម៉ង់៕