សិល្បៈជាតិ៖ Ariana Grande កំពុងតែទាក់ទងបង្កាត់ភ្លើងស្នេហ៍ជាមួយនឹង Ethan Slater ដៃគូសម្ដែងភាពយន្ត Wicked ជាមួយគ្នា។ តើនេះជាការពិតដែរទេ?
បើតាមការផ្សាយពីសារព័ត៌មានបរទេស តារាសម្ដែងវ័យ៣០ឆ្នាំបានចាប់ផ្ដើមទាក់ទងជាមួយនឹងតារាសម្ដែងដែលចាប់ដៃគូជាមួយខ្លួនក្រោយពេលដែលនាងបានចែកផ្លូវគ្នាជាមួយនឹងអតីតស្វាមីលោក Dalton Gomez។
ប្រភពបានប្រាប់សារព័ត៌មាន People ថា «Ariana និង Dalton បានបែកផ្លូវគ្នាតាំងពីខែមករាមកម្ល៉េះ។ ហើយថ្មីៗនេះនាងបានចាប់ផ្ដើមទាក់ទងគ្នាជាមួយនឹង Ethan ខណៈដែលតារាប្រុសរូបនេះបានចែកផ្លូវពីភរិយារបស់លោកដូចគ្នា»
ប៉ុន្តែតំណាងពីភាគីតារាទាំងពីរដួងបានបិទមាត់យ៉ាងជិតមិនបានចេញមកឆ្លើយតបចំពោះដំណឹងចចាមអារ៉ាមនេះនោះឡើយ។ នៅក្នុងរឿងនោះ Ariana សម្ដែងជាតួអង្គ Glinda ចំណែកឯ Ethan សម្ដែងជាតួអង្គ Bog។ ភាពយន្តនេះបានចាប់ផ្ដើមថតនៅប្រទេសអង់គ្លេសកាលពីឆ្នាំមុនហើយគ្រោងនឹងចាក់បញ្ចាំងនឹងក្នុងឆ្នាំ២០២៤ខាងមុខនេះ ប៉ុន្តែចំពោះកាលបរិច្ឆេទបញ្ចាំងពិតប្រាកដយ៉ាងណានោះនៅមិនទាន់ដឹងនៅឡើយអាស្រ័យដោយកំពុងកើតមានកូដកម្មប្រឆាំងនឹងផលិតកម្ម ហូលីវូដ។
រឿងរ៉ាវជីវិតគូរបស់របស់អ្នកទាំងពីរបានបែកធ្លាយនិងឈានដល់ការតាមដានពីអ្នកគាំទ្រនិងសាធារណជនអាស្រ័យដោយសារតែការបង្ហាញខ្លួនរបស់នាងនៅក្នុងការប្រកួតតេនីស្ត Wimbledon កាលពីចុងសប្ដាហ៍ តារាស្រីរូបនេះមិនបានពាក់ចិញ្ចៀនរៀបការរបស់ខ្លួននោះឡើយ។
តារាចម្រៀងប៉ុបនិងអតីតស្វាមីវ័យ២៧ឆ្នាំ បានរៀបការកាលពីឆ្នាំ២០២១ ប៉ុន្តែមានប្រភពទម្លាយចេញមកថានៅដើមខែមករាឆ្នាំ២០២៣ ពួកគេបានចែកផ្លូវដើររៀងខ្លួន។
ប្រភពពីខាងក្នុងបានប្រាប់កាសែត The New York Post ថា៖ «ពួកគេបានសម្រេចចិត្តរួមគ្នា។ពួកគេចាប់ផ្ដើមមានការរកាំរកូសតាំងពីមុនខែមករា ប៉ុន្តែពួកគេចង់រក្សាមិត្តភាពជាមិត្តល្អនឹងគ្នា ព្រោះពួកគេគឺជាមិត្តដ៏ល្អចាប់តាំងពីស្គាល់គ្នារហូតមក។ ចំណែកឯក្រុមគ្រួសារនិងមិត្តភក្ដិបានព្យាយាមការពារពួកគេអស់ពីសមត្ថភាព»
គេនៅចាំបានថា Ariana Grande និង Dalton Gomez បានលួចរៀបការស្ងាត់ៗកាលពី២ឆ្នាំមុន នៅ Montecito California ហើយមានភ្ញៀវចូលរួមត្រឹមតែ២០នាក់ប៉ុណ្ណោះ៕
ប្រភព៖ Asiapop