ការប្រកួតជម្រុះពានរង្វាន់បាល់ទាត់ពិភពលោក វគ្គជម្រុះជុំទី១ នៅតំបនអាស៊ី នឹងរៀប ចំពិធីចាប់ឆ្នោតជាផ្លូវការថ្ងៃទី២៧ ខែកក្កដា ឆ្នាំ២០២៣នេះ ស្របពេលដែលការប្រកួតធ្វើឡើងចំនួន២ជើង ក្នុងនោះជើងទី១ ធ្វើឡើងនៅថ្ងៃទី១២ ខែតុលា ឆ្នាំ២០២៣ ហើយជើងទី២ ធ្វើឡើងនៅថ្ងៃទី១៧ ខែតុលា ឆ្នាំ២០២៣។
ព្រឹត្តិការណ៍ពានរង្វាន់បាល់ទាត់ពិភពលោក FIFA World Cup ដែលតែងតែបង្ហាញវត្តមាន៤ឆ្នាំម្តង ត្រូវបានផ្លាស់ប្ដូរ ដោយការជ្រើសរើសក្រុមបង្កើនពី៣២ក្រុម រហូតដល់៤៨ក្រុមឯណោះ បើធៀបនឹងឆ្នាំ២០២២ កន្លងទៅ។ ដោយឡែកសម្រាប់ ឆ្នាំ២០២៦នេះវិញ ព្រឹត្តិការណ៍ FIFA World Cup មានសហរដ្ឋអាមេរិក កាណាដា និងម៉ិកស៊ិក រួមគ្នាជាសហម្ចាស់ផ្ទះ ទាំង៣ប្រទេសតែម្តង។
តើប្រទេសមួយណាដែលអ្នកគិតថានឹងជួបក្រុមកម្ពុជា ក្នុងវគ្គជម្រុះជុំទី១ នៅតំបនអាស៊ី ក្នុងព្រឹត្តិការណ៍ពានរង្វាន់បាល់ទាត់ពិភពលោក FIFA World Cup 2026 ដែលចាប់ឆ្នោតនៅថ្ងៃនេះ៖
កម្មវិធីចាប់ឆ្នោតជាផ្លូវការថ្ងៃទី២៧ ខែកក្កដា ឆ្នាំ២០២៣នេះ វេលាម៉ោង ១:០០រសៀល៖
ខាងក្រោមនេះជាចំនួនកៅអីដែលបណ្តាលទ្វីប នីមួយៗទទួលបានមុនទៅចូលនៅ World Cup ឆ្នាំ២០២៦៖
១. ទ្វីបអាស៊ី ទទួលបាន ៨កៅអី កើនឡើងចំនួន ២កៅអី
២. ទ្វីបអាហ្រ្វិក ទទួលបាន ៩កៅអី កើនឡើងចំនួន ៥កៅអី
៣. ទ្វីបអាមេរិកខាងជើង ទទួលបាន ៣កៅអី (ដកម្ចាស់ផ្ទះ៣ប្រទេស)
៤. ទ្វីបអាមេរិកខាងត្បូង ទទួលបាន ៦កៅអី កើនឡើងចំនួន ២កៅអី
៥. ទ្វីបអឺរ៉ុប ទទួលបាន ១៦កៅអី កើនឡើងចំនួន ៣កៅអី
៦. ទ្វីបអូសេអានី ទទួលបាន ១កៅអី។
ចំណែកក្រុមជម្រើសជាតិកម្ពុជា ក៏នឹងត្រូវចាប់ផ្តើមយុទ្ធការនៃការប្រកួតជម្រុះ ពានរង្វាន់ FIFA World Cup 2026 នៅចុង ឆ្នាំ២០២៣ នេះហើយ ដោយសហព័ន្ធបាល់ទាត់កម្ពុជា បានប្រកាសតែងតាំងគ្រូបង្វឹកថ្មីផងដែរ គឺលោក Felix Damas ជនជាតិអាហ្សង់ទីន ក្រោយការចាកចេញពីសំណាក់លោក Keisuke Honda ដោយបានបំពេញភារកិច្ចជាគ្រូបង្វឹកបាល់ទាត់កម្ពុជាក្រោយព្រឹត្តិការណ៍ស៊ីហ្គេម។
បើមិនមានអ្វីប្រែប្រួលនោះទេ នោះការប្រកួតជុំផ្តាច់ព្រ័ត្រនៃពានរង្វាន់បាល់ទាត់ពិភពលោក FIFA World Cup ២០២៦ នឹងចាប់ផ្តើមនៅខែមិថុនា ដល់ខែកក្កដា ឆ្នាំ២០២៦ ដែលរៀបចំឡើងនៅសហរដ្ឋអាមេរិក កាណាដា និងម៉ិកស៊ិក ដោយមាន ៤៨ក្រុម មកពី៦ទ្វីប ជុំវិញពិភពលោក។
សូមបញ្ជាក់ថា ពានរង្វាន់បាល់ទាត់ពិភពលោក FIFA World Cup បង្តើតឡើងដំបូងនៅឆ្នាំ១៩៣០ គិតមកដល់បច្ចុប្បន្ននេះគឺមានអាយុកាល ៩៣ឆ្នាំហើយ ខណៈដែលក្រុមដែលគ្រងជើងឯកពានរង្វាន់នេះច្រើនជាងគេនោះគឹក្រុមជម្រើសជាតិប្រេស៊ីល បានចំនួន ៥ដង ១៩៥៨, ១៩៦២, ១៩៧០, ១៩៩៤, និង២០០២ តាមពីក្រោយដោយក្រុមជម្រើសជាតិអាហ្សង់ទីន បានចំនួន ៣ដង ពោលគឺឆ្នាំ១៩៧៨, ១៩៨៦ និងចុងក្រោយនេះនៅឆ្នាំ២០២២ ដែលរៀបចំនៅប្រទេសកាតា៕