សិល្បៈអន្តរជាតិ៖ Katy Perry ត្រូវបានព័ត៌មានវាយប្រហារមកលើរូបនាងជាច្រើនណាស់នៅក្នុងរដូវកាលថ្មីនៃកម្មវិធី«American Idol» រហូតដល់មានពាក្យចចាមអារ៉ាមថា នាងនឹងដើរចេញពីកៅអីគណៈកម្មការនៅក្នុងឆ្នាំនេះ បន្ទាប់ពីក្រុមផលិតករបានកាត់តវីដេអូរបស់នាងឱ្យមើលទៅដូចជា Judge ដែលមានមាត់ឆៅហើយត្រូវជាប់ក្នុងបញ្ជីខ្មៅរបស់អ្នកគាំទ្រ។
យ៉ាងណាមិញ ជាផ្លូវការនៃការប្រកាស «American Idol» រដូវកាលថ្មីនេះ គឺពិតជាធ្វើឱ្យហ្វេនសប្បាយចិត្តឡើងវិញ ខណៈដែលកម្មវិធីបានប្រកាសថា គណៈកម្មការទាំង៣រូប ពីរដូវកាលទី ៧ នឹងត្រឡប់មកវិញធ្វើជាគណៈកម្មការនៅក្នុងរដូវកាលទី ២២ នេះជាថ្មីម្ដងទៀត។ ក្នុងនោះគណៈកម្មការរួមមាន Lionel Richie, Katy Perry និង Luke Bryan ដែលពួកគេទាំង ៣នាក់ ធ្លាប់ប៉ះគ្នាម្ដងរួចមកហើយនៅឆ្នាំ ២០១៨ ជាពេលដែលការចាក់បញ្ចាំងត្រូវបានផ្លាស់ប្ដូរពីទូរទស្សន៍ FOX ទៅកាន់ទូរទស្សន៍ ABC ។
តែយ៉ាងណាមិញ សម្រាប់អ្នកគាំទ្រវិញពិតជារំភើបចិត្តណាស់ ហើយគិតថា រដូវកាលនេះពិតជាអស្ចារ្យខ្លាំងតែម្ដងសម្រាប់ពួកគេនៅពេលបង្ហាញវត្តមានគណៈកម្មការកំពូលទាំង ៣រូបខាងលើនេះ ជាពិសេសវត្តមានរបស់ Katy Perry។ ម្នាក់ៗសរសេរឡើងនៅលើបណ្ដាញសង្គមថា «រំភើបណាស់ដែលមានគណៈកម្មការដ៏អស្ចារ្យក្នុងរដូវកាលពី៧បានវិលមកវិញ»។ មានអ្នកខ្លះទៀតពេញចិត្តចំពោះវត្តមានរបស់ Katy Perry ដោយបានសរសេរថា «Yesssss!!! ខ្ញុំសប្បាយចិត្តដែល Katy Perry ត្រឡប់មកវិញ» និងមានខ្លះទៀតសរសេរថា «ខ្ញុំស្រលាញ់ Katyហើយសប្បាយចិត្តដែលនាងត្រលប់មកវិញ!» និងមានខ្លះទៀតបញ្ចេញអារម្មណ៍ក្ដៅក្រហាយជំនួសនាង។
សូមជម្រាបថា សម្រាប់ពិធីករដែលនឹងចូលខ្លួនមកធ្វើឱ្យកម្មវិធី«American Idol» រដូវកាលថ្មីនេះមានភាពរីករាយយ៉ាងពុះកញ្ជ្រោលនោះគឺ លោក Ryan Seacrest ។ Ryan Seacrest ជាពិធីករបានចូលមកជំនួសតំណែងរបស់ពិធីករល្បី Pat Sajak នៅពេលដែលលោកបានប្រកាសអំពីការចូលនិវត្តន៍លែងកាន់កាប់កម្មវិធីទូរទស្សន៍ទៀតនារដូវក្ដៅនេះ រួមទាំងកម្មវិធីហ្គេមទូរទស្សន៍អាមេរិកដែលមានឈ្មោះថា Wheel of Fortune ផងដែរ។ កម្មវិធី«American Idol» នឹងមានចាក់ផ្សាយនៅដើមខែ សីហា ខាងមុខនេះហើយចាក់បញ្ចាំងនៅលើទូរទស្សន៍ ABC៕