ម្ដងជាពីរដងរួចមកហើយដែលកញ្ញា លីវ ជីលី Miss Grand Cambodia បានចេញមកបកស្រាយនិងនិយាយពីបញ្ហាដើមទ្រូងរបស់កញ្ញាថាមិនធ្លាប់កែកុននោះទេតែជាដើមទ្រូងធម្មជាតិ Original ពីកំណើត ដូចជានៅក្នុងកម្មវិធី 3 Fun កញ្ញាបានរំលឹកដល់បញ្ហាដើមទ្រូងនេះសារជាថ្មីម្ដងទៀត។
កញ្ញា លីវ ជីលី និងកញ្ញា សៃ ហ្វុន ត្រូវបានកម្មវិធី 3 Fun អញ្ជើញចូលរួមជាតារាកិត្តិយសដោយនៅក្នុងកម្មវិធីដែលមានរយៈពេលជាង ១ម៉ោងនោះតារាកិត្តិយសដែលជា Miss Grand Cambodia និង Miss Queen Cambodia បានជជែកពីការហ្វឹកហាត់ ការត្រៀមខ្លួន និងចែករំលែកបទពិសោធផ្សេងៗទៅវិញទៅមក ជាពិសេស លីវ ជីលី ដែលរៀមច្បងធ្លាប់បានចេញទៅប្រកួតមុននោះក៏ត្រូវបានសិស្សប្អូន សៃ ហ្វុន សាកសួរពីសំនួរដែលនឹងត្រូវសួរពេលចូលក្នុងបន្ទប់សម្ភាសន៍ជាដើម។
ប៉ុន្តែរឿងមួយដែលនៅតែជាការចាប់អារម្មណ៍សម្រាប់មហាជននៅឡើយទោះជាសាមីខ្លួនកញ្ញា លីវ ជីលី ធ្លាប់បានចេញមកបកស្រាយភ្លាមៗ ក្រោយការប្រកួតបានចប់ហើយក្ដី គឺបញ្ហាដើមទ្រូងរបស់កញ្ញា ដែលមានមតិមួយចំនួនបានលើកឡើងថាជារបស់កែច្នៃ កែកុន មិនមែនពីធម្មជាតិ ព្រមទាំងមតិរិះគន់មួយចំនួនទៀត។ សម្រាប់បញ្ហានេះ កម្មវិធី 3 Fun ដែលមានពិធីករ អៀ វិច្ឆ័យ អ្នកនាង គង់ ចាន់ស្រីមុំ អ្នកនាង ផេនខេក ក៏បានរំលឹកសាកសួរដោយចាក់វីដេអូនោះដែលបង្កើតឱ្យមានពាក្យរិះគន់ផ្សេងៗនោះឡើងវិញផងដែរ។
កញ្ញា លីវ ជីលី ដែលពីមុនមកធ្លាប់ធ្វើការងារជាអ្នកចលនទ្រព្យមួយរូបនោះ ក្រោយកម្មវិធីចាក់វីដេអូប្រៀបធៀបការប្រកួតដំបូងនៅខ្មែរ និងការប្រកួតនៅថៃថាមានការរីកចំរើន និងខុសប្លែកគ្នាច្រើន ជីលីបានលាន់មាត់ខ្លួនឯងថា «អូយ! ឃើញឈុតទឹកមាសនេះកញ្ញាខ្លាចណាស់» ព្រោះឈុតនេះរងការរិះគន់ច្រើន។ ទស្សនាវីដេអូរួមគ្នាបណ្ដើរ កញ្ញាក៏បានបកស្រាយនិងអះអាងបណ្ដើរដែរថាដើមទ្រូងកញ្ញាគឺជាដើមទ្រូងពីកំណើត ដើមទ្រូងធម្មជាតិ ប៉ុន្តែកាលដែលមានការរិះគន់កើតឡើងបានដោយសារតែឈុតនោះមិនសូវស៊ីជាមួយនឹងកញ្ញា ម្យ៉ាងទៀតពេលដែលកញ្ញាទៅទិញឈុតមកពាក់នោះក៏មិនបានពាក់សាកមើលឱ្យបានល្អិតល្អន់ដែរ ដោយសារតែប្រញាប់ហាត់សមដើម្បីត្រៀមក្នុងការប្រកួតពេក។
ក្នុងនោះកញ្ញានិយាយបានរៀបរាប់ទាំងអស់សំណើចខ្លួនឯងដែរថា កញ្ញាក៏មានការភ្ញាក់ផ្អើលដូចគ្នាព្រោះពេលកញ្ញាប្រកួតនោះគឺកញ្ញាមិនបានដឹងខ្លួននោះទេ លុះត្រាតែចប់កម្មវិធីទើបកញ្ញាបានត្រលប់មកមើលវីដេអូវិញទើបដឹង ហើយក៏បានឃើញមានការរិះគន់ច្រើនគួរសមផងដែរ ដោយមានអ្នកខ្លះនិយាយថា តិចផ្ទុះទៅត្រូវមុខគណៈកម្មការ អ្នកខ្លះទៀតថា លោតផ្លោតៗជាដើម ប៉ុន្តែកញ្ញានៅតែអះអាងដដែលថាដើមទ្រូងកញ្ញាមិនមានការកែកុនណាមួយនោះឡើយគឺធម្មជាតិ១០០ភាគរយ។ [ទស្សនាក្នុងកម្មវិធី 3 Fun ចាប់ពីនាទីទី ២៣.១២ តទៅ ]
ស្ដាប់តាមការបកស្រាយរបស់កញ្ញា លីវ ជីលី ម្ដងជាពីរដងហើយ អ្នកដែលធ្លាប់បានរិះគន់ដើមទ្រូងកញ្ញាប្រហែលជាលែងរិះគន់ ទៀតហើយ ព្រោះកញ្ញាបញ្ជាក់ហើយថា ដោយសារតែទិញឈុតមកស្លៀកមិនបានពិនិត្យឱ្យល្អិតល្អន់ព្រោះតែប្រញាប់ពេក។ សម្រាប់រឿងកញ្ញា លីវ ជីលី ក៏ជាឧទាហរណ៍មួយល្អដែរសម្រាប់មិត្តនារីក្នុងការជ្រើសរើសឈុតស្លៀកពាក់ ត្រូវតែមានការប្រុងប្រយ័ត្នព្រោះឈុតខ្លះលើករាសី តែឈុតខ្លះពាក់ទៅអាចនាំបញ្ហាដល់អ្នកពាក់ក៏ថាបានដែរ៕
ទស្សនាវីដេអូសម្ភាសន៍ពេញពីកម្មវិធី 3 Fun ខាងក្រោមនេះ៖