អត្តពលិក គ្រូបង្វឹក ជម្រើសជាតិកម្ពុជា និងប្រតិភូដឹកនាំ បានចាកចេញពីព្រះរាជាណាចក្រកម្ពុជា នៅព្រឹកថ្ងៃអង្គារ ទី២០ ខែកក្កដា ឆ្នាំ២០២១ វេលាម៉ោង ០៩:៣៥ នាទីព្រឹក តាមច្រកអាកាសយានដ្ឋានអន្តរជាតិភ្នំពេញ ដោយទៅប្តូរជើងហោះហើរនៅសិង្ហបុរី សិនមុនឆ្ពោះទៅកាន់ប្រទេសជប៉ុន ដើម្បីចូលរួមក្នុងព្រឹត្តិការណ៍កីឡាអូឡាំពិក The Summer Olympics នៅក្នុងទីក្រុងតូក្យូ ។
ឯកឧត្តម វ៉ាត់ ចំរើន នាយបេសកកម្ម ដឹកនាំក្រុមកម្ពុជា ទៅចូលរួមក្នុងព្រឹត្តិការណ៍កីឡាអូឡាំពិកនេះដោយធ្វើដំណើរប្រមាណ១០ម៉ោងទើបទៅដល់ ពោលគឺទៅដល់ជប៉ុន។ ក្រុមកម្ពុជា នឹងទៅដល់សិង្ហបុរី នៅម៉ោង១២:៤០នាទីថ្ងៃត្រង់ ដើម្បីប្តូរជើងហោះហើរ ដោយរង់ចាំ១ម៉ោងទើបបានបន្តដំណើរទៅទីក្រុងតូក្យូ។ ចេញពីសិង្ហបុរី ទៅរហូតដល់ម៉ោង៩:៥០នាទីយប់ទើបទៅដល់ប្រទេសជប៉ុន។
អត្ថបទពាក់ព័ន្ធ៖អត្តពលិកកម្ពុជា ចេញទៅប្រកួតអូឡាំពិកនៅប្រទេសជប៉ុន មុនពិធីបើក៣ថ្ងៃ
អត្តពលិកកម្ពុជាទាំង៣រូបនោះមាន កីឡាការិនីហែលទឹក ឃឿន ប៊ុនពេជ្រមរកត ហែលក្នុងវិញ្ញាសាហែលទឹក៥០ម៉ែត្រសេរីនារី។ កីឡាករហែលទឹក ហែម ប៉ុច ក្នុងវិញ្ញាសាហែលទឹក៥០ម៉ែត្រសេរីបុរស។ កីឡាករអត្តពលកម្ម ប៉ែន សុគង់ នឹងរត់ល្បឿនចម្ងាយ១០០ម៉ែត្របុរស។
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ ការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕