សិល្បៈអន្តរជាតិ៖ តារាចម្រៀងដ៏ល្បីម្ចាស់បទ «WAP» នាង Cardi B ក៏មានវាសនាមិនខុសពីមិត្តរួមអាជីពដូចគ្នាដែរ គឺនាងបានក្លាយជាតារារងគ្រោះព្រោះវប្បធម៌គប់វត្ថុដាក់តារាពេលសម្ដែង Concert ពីសំណាក់អ្នកដែលទៅទស្សនាផ្ទាល់។ ប៉ុន្តែតារារូបនេះមិនស្លូតប៉ុន្មាននោះទេ ព្រោះនាងមិនព្រមក្លាយជាជនរងគ្រោះតែម្ខាងនោះទេ ក្រោយពេលត្រូវគេជះទឹកដាក់ នាងបានសងវិញភ្លាមៗដោយគប់មេក្រូដែលនាងកាន់ត្រលប់ទៅហ្វូងមនុស្សដែលកំពុងឈរទស្សនាវិញ។ ចំពោះករណីនេះធ្វើឱ្យមានកើតជារឿងចម្រូងចម្រាសពេញបណ្ដាញសង្គម Twitter ដោយមានទាំងអ្នកកាន់ជើងនិងអ្នកចេញមកសមមុខ Cardi B។
បើមើលតាមរយៈវីដេអូឃើញថា អ្នកដែលជះទឹកដាក់នាងនោះដូចជាមិនទាន់ត្រូវនោះឡើយ ប៉ុន្តែ Cardi B មិនបាននៅស្ងៀមនោះទេ គឺនាងបានឈប់ច្រៀងហើយគប់មេក្រូនៅដៃទៅវិញ ចំណែកអង្គរក្សដែលចាំការពារនៅលើឆាកក៏ចុះចាប់និងបណ្ដេញអ្នកទស្សនារូបនោះចេញពីកន្លែងប្រគំតន្ត្រី ហើយអង្គរក្សបានយកមេក្រូឱ្យតារារូបនេះច្រៀងបន្តឡើងវិញ។
ការតបស្នងត្រលប់របស់ Cardi B ទៅកាន់បុគ្គលខ្វះសីលធម៌ បញ្ចេញអាកប្បកិរិយាពាលដាក់នាងបែបនេះ ត្រូវបានអ្នកលេងបណ្ដាញសង្គម Twitter លើកយកទៅវិភាគ និងជជែកវែកញែកគ្នាឥតសំចៃមាត់។ ទស្សនៈចំនួន២បានប្រឆាំងគ្នាចំពោះទង្វើរបស់ Cardi B ដោយមានមួយក្រុមយល់ឃើញថា តារារូបនេះមិនគួរតបតទៅវិញដោយកំរោលនិងហិង្សាបែបនោះទេ ព្រោះមិនប្រាកដថាគប់ត្រូវអ្នកជះទឹកដាក់នាងនោះទេ អាចត្រូវអ្នកផ្សេងបណ្ដាលឱ្យរងរបួស ខណៈអ្នកខ្លះទៀតថានាងគួរតែមានចិត្តត្រជាក់ជាងនេះ ទុកឱ្យអង្គរក្សជាអ្នកចាត់ចែងប្រសើរជាង។
ចំណែកអ្នកដែលយល់ស្របចំពោះការតបតរបស់ Cardi B បានលើកឡើងវិញថា ទោះជា Cardi B ជាតារាជាបុគ្គលល្បី តែនាងក៏ជាមនុស្សធម្មតា ចេះខឹង ចេះឈឺចាប់ដូចគ្នា បើគេធ្វើចរិតពាលដាក់នាង នាងមានសិទ្ធិការពារខ្លួន វាមិនខុសនោះទេ ការដែលនាងតបតទៅហ្វេនដែលជះទឹកដាក់នាង ព្រោះកន្លងមកមានតារាជាច្រើនដែលរងរបួសដោយសារតែវប្បធម៌ពាលរបស់អ្នកទស្សនាការប្រគំតន្ត្រីបែបនេះ ហើយបើមិនរួមគ្នាទប់ស្កាត់ទេ វានឹងកាន់តែលេចចេញជារូបភាពកាន់តែអាក្រក់ឡើងៗ ដូច្នេះការធ្វើបែបនេះរបស់ Cardi B ក៏ជាសារមួយដាស់តឿនដល់អ្នកដែលចង់ធ្វើបែបនេះឱ្យមានការញញើតខ្លះៗដែរ។
គួរដឹងថាក្រៅពី Cardi B នៅមានតារាល្បីៗលំដាប់ពិភពលោកជាច្រើនដួងទៀតដែលធ្លាប់ជួបបទពិសោធន៍ជូរចត់មិនខុសពីនាងរួមមាន៖ «Latto, Harry Styles , Drake , Bebe Rexha , Ava Max, Kelsea Ballerini, និង Pink»៕
ទស្សនារូបភាពវីដេអូ Cardi B គប់ក្បាលមេក្រូដាក់អ្នកគាំទ្រខាងក្រោមនេះ
ប្រភព៖ latimes.com