តារាចម្រៀង Original ជា CEO និង Founder ផលិតកម្ម Makod Media មកុដមេឌា លោក អ៊ាម វន្នី បានផុសតាមរយៈបណ្ដាញសង្គមនៅថ្ងៃអង្គារ ទី ២០ ខែកក្កដា ឆ្នាំ២០២១ នេះថា កូនប្រុសសម្លាញ់ចិត្តលោក ឈ្មោះ វន្នី ជេស្ទីន វ័យ ៩ឆ្នាំទទួលបានចំណាត់ថ្នាក់លេខ១ ក្នុងកម្មវិធី ប្រកួតនិទានរឿងប្រចាំឆ្នាំ២០២១ ក្នុងចំណោមសិស្សសាលាទាំង២០សាខា។
បង្ហាញពីក្ដីរំភើបរីករាយចំពោះលទ្ធផលដ៏គាប់ប្រសើរដែលកូនប្រុសរបស់ខ្លួនសម្រេចបានលោក អ៊ាម វន្នីបានធ្វើការបង្ហោះផ្ទាំងជ័យលាភីដែលមានរូបថតកូនរបស់ខ្លួនជាមួយនឹងចំណាត់ថ្នាក់ ព្រមទាំងវីដេអូនិទានរឿង «កង្កែបក្នុងអណ្ដូង» ដែលជារឿងធ្វើឱ្យកុមារា ជេស្ទីន ឈ្នះចំណាត់ថ្នាក់លេខ១។
បន្ទាប់ពីលោកបានធ្វើការផុសសំណេរ រូបភាព និង វីដេអូ បង្ហាញពីសមត្ថភាព និង ទេពកោសល្យរបស់កូនប្រុស និងលទ្ធផលដែលកូនលោកសម្រេចបាននោះ បានធ្វើឱ្យមិត្តភក្ដិនិងបណ្ដាញសង្គម ដែលជាសិល្បករ តន្ត្រីករ តារាចម្រៀង តារាសម្ដែង រួមនឹងមហាជនដែលជាអ្នកគាំទ្រលោកជាច្រើនបានចូលមកអបអរសាទរគ្រប់ៗគ្នា។
កូនប្រុសរបស់លោក កុមារា វន្នី ជេស្ទីន បច្ចុប្បន្នគឺជាសិស្សថ្នាក់ទី៣ នៅសាខាទី៦ ចំការដូង បាននិទានរឿងព្រេងមួយដែលមានចំណងជើង កង្កែបក្នុងអណ្ដូង ហើយក៏ជានិទានដែលធ្វើឱ្យកូនប្រុសតារារូបនេះបានជាប់ចំណាប់ថ្នាក់ជ័យលាភី៕
