គ្រូបង្គោលក្លិបTiffy Army លោក ភា សុភ័ត្រ្តា បង្ហាញចំណាប់អារម្មណ៍ជុំវិញការត្រៀមជួបក្លិបព្រះខ័នរាជស្វាយរៀង នាចុងសប្តាហ៍នេះថា៖ «ជាក់ស្តែងគឺយើងមានពេលវេលាខ្លី ប៉ុន្តែយើងនឹងព្យាយាមធ្វើឲ្យអស់ពីលទ្ធភាពតាមដែលអាចធ្វើទៅបានក្នុងការជួបជាមួយក្រុមខ្លាំងមួយក្នុងលីគកំពូលកម្ពុជាយើងគឺព្រះខ័នរាជស្វាយរៀង នាចុងសប្តាហ៍នេះ»។
លោក ភា សុភ័ត្រ្កា បានបន្តថា៖«វិញត្រឡប់មកកាន់ក្រុមTiffy Army វិញនេះ មានរយ:ពេលត្រឹមតែ ៣សប្ដាហ៍ មុនដល់ថ្ងៃប្រកួតដំបូងដែលនឹងត្រូវជួបជាមួយក្រុមព្រះខ័នរាជស្វាយរៀង ដូចនេះការវិលត្រឡប់មកនេះ ខ្ញុំមិនទាន់បានរៀបចំ Pre-Sesion ជាហេតុធ្វើឲ្យមានក្ដីកង្វល់ជាច្រើន ព្រោះវាត្រូវបកមកធ្វើតាមរបត់លេងរបស់ខ្ញុំវិញ។ អីចឹងពេលវេលាខ្លី ប៉ុន្តែយើងនឹងព្យាយាមធ្វើឲ្យអស់ពីលទ្ធភាពតាមដែលអាចធ្វើទៅបានក្នុងការជួបជាមួយក្រុមខ្លាំងមួយក្នុងលីគកំពូលកម្ពុជាយើងគឺព្រះខ័នរាជស្វាយរៀង នាចុងសប្តាហ៍នេះ»។
លោក ភា សុភ័ត្រ្តា បន្ថែមថា៖ «នេះក៏ជាការប្រកួតដ៏សំខាន់មួយដែលជាជំនួបដំបូងរបស់ក្រុម Tiffy Army នឹងធ្វើដំណើរទៅមុខរហូតបើយើងធ្វើបានល្អ ឬមិនល្អទាំងលទ្ធផល និងចង្វាក់លេងរបស់ក្រុម គឺយើងត្រូវការប្រើពេលវេលាបន្ថែមទៀត ២ទៅ៣ប្រកួត ដើម្បីពង្រឹងក្រុមឲ្យបានល្អ ដូចនេះការប្រកួតដំបូងរបស់យើងគឺសំខាន់សម្រាប់ជំរុញកម្លាំងចិត្តរបស់កីឡាករ»។
រំលឹកថា កាលពីថ្ងៃទី១៨ កក្កដា កន្លងទៅ សមាគមកីឡាបាល់ទាត់កងយោធពលខេមរភូមិន្ទ Tiffy Army FC បានប្រកាសតែងតាំងលោក ភា សុភ័ត្រ្តា ជាគ្រូបង្គោលថ្មី សម្រាប់លីគកំពូលកម្ពុជា Cambodian Premier League រដូវកាល ២០២៣-២៤។ ហើយនេះជាលើកទី២ហើយ ដែលលោក កាន់តំណែងជាគ្រូបង្វឹកនៅក្លិបបាល់ទាត់ Tiffy Army FC (ពីមុនហៅ ក្រសួងការពារជាតិ)។
គួរឲ្យដឹងថា ជំនួបដំបូងរបស់ក្រុមបាល់ទាត Tiffy Army នឹងជួបព្រះខ័នរាជស្វាយរៀង នៅថ្ងៃអាទិត្យ ទី០៦ ខែសីហា ឆ្នាំ២០២៣ ក្នុងពានរង្វាន់ Cambodian Premier league រដូវកាល ឆ្នាំ២០២៣-២០២៤ ខណ:ក្រុមដែលប្រកួតបើកឆាក គឺក្រុមបាល់ទាត់វិសាខា នឹងត្រូវជួបក្រុមគិរីវង់សុខសែន ខណៈក្រុមបាល់ទាត់ព្រៃវែង ត្រូវប៉ះ ណាហ្គាវើលដ៍ នៅថ្ងៃសៅរ៍ ទី៥ ខែសីហា ឆ្នាំ២០២៣។
គួរបញ្ជាក់ថា សម្រាប់ការប្រកួតក្របខណ្ឌលីគកំពូលកម្ពុជា Cambodian Premier League រដូវកាលថ្មី នឹងចាប់ផ្ដើមការប្រកួតពីថ្ងៃទី០៥ ខែសីហា ឆ្នាំ២០២៣ រហូតដល់ថ្ងៃទី១២ ខែឧសភា ឆ្នាំ២០២៤ ដែលមានសមាជិកចំនួន១០ក្រុមចូលរួម មានភ្នំពេញក្រោន ,វិសាខា, ព្រះខ័នរាជស្វាយរៀង, បឹងកេត, ណាហ្គាវើលដ៏, កងយោធពលខេមរភូមិន្ទ, អង្គរថាយហ្គឺរ, គិរីវង់សុខសែនជ័យ និង ២ក្រុមទើប ឡើងមកពីលីគទី២ គឺក្រុម ISI ដង្កោសែនជ័យ និងក្រុមព្រៃវែងអេហ្វស៊ី៕
