ឯកឧត្តម គួច ចំរើន អភិបាលខេត្តព្រះសីហនុ និងលោកជំទាវ បានផ្ដល់រង្វាន់លើកទឹកចិត្តដល់ក្លិបកីឡាបាល់ទះស្នងការដ្ឋាននគរបាលខេត្តព្រះសីហនុ ចំនួន ១ ០០០០ដុល្លា(មួយមឺនដុល្លា)បន្ទាប់ពីគ្រងជើងនពានរង្វាន់កីឡាបាល់ទះពានរង្វាន់ឯកឧត្តម ស សុខា ឆ្នាំ២០២៣ (Sar Sokha Challenge Cup 2023)។
យោងតាមការបង្ហោះនៅលើកផេកហ្វេសបុកឧត្តមសេនីយ៍ទោ ជួន ណារិន្ទ បានសរសេររៀបរាប់ថា៖ «ខ្ញុំបាទ ជាប្រធានក្លិបកីឡាបាល់ទះរបស់ស្នងការដ្ឋាននគរបាលខេត្តព្រះសីហនុ និងសហការី សូមគោរពថ្លែងអំណរគុណយ៉ាងជ្រាវជ្រៅបំផុត ចំពោះទឹកចិត្តដ៏ថ្លៃថ្លាពីសំណាក់ឯកឧត្តម គួច ចំរើន អភិបាលខេត្តព្រះសីហនុ និងលោកជំទាវ បានផ្ដល់រង្វាន់លើកទឹកចិត្តដល់ក្លិបដែលទទួលជ័យលាភីលេខ១ ពានរង្វាន់ ឯកឧត្តម ស សុខា ឆ្នាំ២០២៣ នាល្ងាចថ្ងៃទី០៦ ០៨ ២០២៣ នៅពហុកីឡដ្ឋានជាតិអូឡាំពិក ទឹកប្រាក់ចំនួន ១០០០០ដុល្លា(មួយមឺនដុល្លា)! (Sar Sokha challenge Cup 2023)»។
ជ័យជម្នះរបស់ក្លិបកីឡាបាល់ទះស្នងការដ្ឋាននគរបាលខេត្តព្រះសីហនុ ក្រោយយកឈ្នះសមាគមបាល់ទះវិសាខា នៅវគ្គផ្ដាច់ព្រ័ត្រទាំងលទ្ធប្រផិតប្រផើយ ក្នុងលទ្ធផល ៣សិតទល់និង២ (២៥-១៦, ១៩-២៥, ២៥-២២, ២៣-២៥, ១៥-១១) នារាត្រីថ្ងៃទី០៦ សីហា នៅសាលវិមាននៃពហុកីឡដ្ឋានជាតិអូឡាំពិក។
ជើងឯក៖ ក្លិបកីឡាបាល់ទះស្នងការដ្ឋាននគរបាលខេត្តព្រះសីហនុ
ក្រុមលេខ២៖ សមាគមបាល់ទះវិសាខា
ក្រុមលេខ៣៖ ក្លិបកីឡាបាល់ទះបញ្ជាការដ្ឋានអង្គរក្ស
ក្រុមលេខ៤៖ ក្លិបកីឡាបាល់ទះខេត្តតាកែវ
ការប្រកួតពានរង្វាន់កីឡាបាល់ទះ ពានរង្វាន់ឯកឧត្តម ស សុខា ឆ្នាំ២០២៣ (Sar Sokha Challenge Cup 2023) កម្មវិធីប្រកួតប្រព្រឹត្តិទៅចាប់ផ្តើមប្រកួតនៅថ្ងៃទី០២ ដល់ថ្ងៃទី០៦ ខែសីហា ឆ្នា ២០២៣ ចំពោះសមាសភាពក្រុមចូលរួមជាផ្លូវការចំនួន ៩ក្លិប/សមាគម៕
