សិល្បៈអន្តរជាតិ៖ គេអាចនិយាយថាបាន តួស្រី ហាន់ ជីអ៊ុន ឬ Song Hye Kyo សព្វថ្ងៃនេះគឺជាកំពូលតារាសម្ដែងរបស់ប្រទេសកូរ៉េដែលស្ថិតនៅក្នុងតារាង A-list ដែលមានអ្នកគាំទ្រច្រើនជាងគេបំផុតហើយ។
តារាស្រីរូបនេះក៏ទើបតែទទួលបានភាពជោគជ័យពីការទទួលពានរង្វាន់ចំនួនពីរគឺ Baeksang 2023 និង Blue Dragon 2023។ ទោះជាតារាស្រីរូបនេះមានឥទ្ធិពលយ៉ាងណាក៏ដោយ ក៏ប៉ុន្តែរឿងអាស្រូវរបស់នាងលែងលះអតីតស្វាមី Song Joong Ki នៅតែជាចំណីមាត់របស់អ្នកសារព័ត៌មាន និងជាប្រធានបទគួរឱ្យចង់តាមដានបន្តពីជីវិតឯកជនរបស់នាងនាពេលចុងក្រោយនេះ។
យ៉ាងណាមិញ Song Hye Kyo បានផ្ដល់បទសម្ភាសន៍មួយនៅក្នុងកម្មវិធីទទួលពានរង្វាន់ Baeksang លើកទី 59 ដែលបានធ្វើឡើងនៅប្រទេសកូរ៉េ។ តួស្រីនៅក្នុងរឿងភាគ The Glory ទាំងពីររដូវកាលរូបនេះ បានចែករំលែកអំពីជីវិតឯកជនភាពរបស់នាងក្រោយលែងលះអតីតស្វាមីអស់រយៈពេលជិត ៣ ឆ្នាំមកហើយ។ ក្រោយសម្រេចលែងលះបែកផ្លូវគ្នាដើរផ្លូវរៀងខ្លួនៗ នាងទទួលស្គាល់ថា ខ្លួននាងពិតនឿយហត់ និងមានសញ្ញាគួរឱ្យព្រួយបារម្ភចំពោះស្ថានភាពសុខភាព ដែលរងសម្ពាធការងារលើសកំណត់។
Song Hye Kyo បានសារភាពស្ថានភាពសុខភាពរបស់នាងយ៉ាងក្រៀមក្រំថា បន្ទាប់ពីបញ្ចប់កម្មវិធីទទួលពាននេះហើយ នាងត្រូវទៅហោះទៅកាន់ទីក្រុងញូវយ៉ក ដើម្បីបំពេញការងារពីមួយកន្លែងទៅមួយកន្លែងទាំងគ្មានពេលសម្រាក និងជាពិសេសនឿយហត់ចំពោះការចេញដំណើរនាព្រឹកព្រលឹម ។ តារាងការងាររបស់នាងនៅបរទេសគឺមានច្រើនណាស់ ដែលតម្រូវឱ្យនាងតាំងចិត្តតស៊ូជម្នះគ្រប់ការងារទាំងអស់។ ហើយនៅពេលត្រឡប់ពីញូវយ៉កវិញ នាងប្រាកដណាស់បាក់កម្លាំងខ្លាំងជាមិនខាន។
ដោយឡែក សម្ដីរបស់ ហាន់ ជីអ៊ុន រៀបរាប់នៅពេលនោះ ក៏បានធ្វើឱ្យអ្នកនៅក្នុងស្ទូឌីយូទាំងអស់យល់អំពីអារម្មណ៍លំបាករបស់នាង និងខ្លោចចិត្តអាណិតនាងខ្លាំងណាស់។ Song Hye Kyo បន្តរៀបរាប់ទៀតថា ប្រសិនបើនាងបានសម្រាកមួយសប្ដាហ៍ នោះផ្លូវចិត្តរបស់នាងនឹងបានធូរស្បើយជាក់ជាមិនខាន ហើយនាងក៏បានចាប់ផ្ដើមបន្តការងារថ្មីទៀតដោយគ្មានក្ដីព្រួយបារម្ភ។ ទោះជាយ៉ាងណាក៏ដោយ ទឹកមុខរបស់ Song Hye Kyoស្រទន់ដ៏ទន់ភ្លន់របស់នាង ហាក់មើលទៅនាងដូចជាមានក្ដីសុខនៅពេលបាននិយាយបន្ធូរអារម្មណ៍ក្នុងពេលសម្ភាស។
សូមជម្រាបថា បទសម្ភាសន៍របស់ Song Hye Kyo ត្រូវបានចែកចាយពាសពេញបណ្ដាញសង្គមដោយគ្មានលាក់បាំង ហើយអ្នកលេងបណ្ដាញសង្គមភាគច្រើនលើកឡើងថា Song Hye Kyo ប្រហែលជានាងមានសម្ពាធឯកាចំពោះដំណឹងរៀបការរបស់អតីតស្វាមី Song Joong Ki ដែលពេលនេះអតីតស្វាមីនាងក៏កំពុងសោយសុខជាមួយស្នេហាថ្មីយ៉ាងមានសុខភមង្គល និងកំពុងមានដំណក់ឈាមកូនដំបូងនៅក្នុងផ្ទៃភរិយាថ្មីទៀតផងដែរ៕