ថ្មីៗនេះការចាប់ឆ្នោតបែងចែកពូលនៃព្រឹត្តិការណ៍កីឡាអាស៊ីលើកទី១៩ នៅប្រទេសចិន (2022 Asian Games) ឃើញថាក្រុមបាល់ទះក្នុងសាលបុរសកម្ពុជា ស្ថិតក្នុងពូលជាមួយយក្សឥណ្ឌា និងកូរ៉េខាងត្បូង ខណៈការប្រកួតនឹងចាប់ដំណើរការនៅខែក្រោមនេះ។
បាល់ទះបុរសមានប្រទេសចំនួន១៩ បានចុះឈ្មោះបញ្ជូនក្រុមអត្តពលិករបស់ខ្លួនទៅដណ្តើមមេដាយក្នុងឆ្នាំនេះ ខណៈគណៈកម្មការរៀបចំការប្រកួតបានបែងចែកទៅជា៦ពូលផ្សេងគ្នា។ សម្រាប់កម្មវិធីប្រកួតក្នុងពូល C ដែលមានកម្ពុជា ឥណ្ឌា និងកូរ៉េខាងត្បូង មាន៖
- ១៩/កញ្ញា/២៣ ម៉ោង៦ល្ងាច ឥណ្ឌា ប៉ះ កម្ពុជា ទីលាន China Textile City Sports Centre Gymnasium
- ២០/កញ្ញា/២៣ ម៉ោង៦ល្ងាច កូរ៉េខាងត្បូង ប៉ះ ឥណ្ឌា ទីលាន Linping Sports Centre Gymnasium
- ២១/កញ្ញា/២៣ ម៉ោង២:៣០នាទី កម្ពុជា ប៉ះ កូរ៉េខាងត្បូង ទីលាន Linping Sports Centre Gymnasium
*ម៉ោងនៅខេត្ត Zhejiang លើសម៉ោងនៅកម្ពុជា ១ម៉ោង
តាមគម្រោងក្រុមចំណាត់ថ្នាក់លេខ១និងលេខ២តាមពូលនីមួយៗមានឈ្មោះឡើងទៅវគ្គ១៦ក្រុមចុងក្រោយស្វែងរកកៅអីទៅដណ្តើមមេដាយមាសប្រចាំព្រឹត្តិការណ៍។
ព្រឹត្តិការណ៍ Asian Games រៀបចំឡើងដំបូងនៅឆ្នាំ១៩៥១ ស្របពេលដែលវិញ្ញាសាបាល់ទះបានដាក់ឱ្យប្រកួតប្រជែងពីឆ្នាំ១៩៥៨។ សម្រាប់កម្ពុជា នេះជាលើកទី៣ហើយដែលបញ្ជូនក្រុមបាល់ទះបុរសទៅចូលរួមប្រកួតក្នុងព្រឹត្តិការណ៍កីឡា Asian Games ដោយលើកទី១ នៅឆ្នាំ១៩៦២ ដែលប្រទេសឥណ្ឌូណេស៊ី ធ្វើជាម្ចាស់ផ្ទះ ដោយឈរលេខ៧។ លើកទី២ ក្នុងឆ្នាំ១៩៧០ ដែលប្រទេសថៃ ទទួលធ្វើម្ចាស់ផ្ទះកម្ពុជា ទទួលបានចំណាត់ថ្នាក់លេខ៤ ស្របពេលដែលមេដាយមាសបានទៅជប៉ុន មេដាយប្រាក់បានទៅកូរ៉េខាងត្បូង និងមេដាយសំរឹទ្ធិបានទៅចិន។
តាំងពីដាក់វិញ្ញាសាបាល់ទះចូលក្នុងកីឡាអាស៊ី មកឃើញថាជប៉ុន ឈ្នះមេដាយមាស៨ជំនាន់ម្នាក់ឯង ច្រើនជាងប្រទេសដទៃ ខណៈកូរ៉េខាងត្បូង ជាក្រុមខកចិត្តវគ្គផ្ដាច់ព្រ័ត្រ៧លើក ពោលគឺបានត្រឹមមេដាយប្រាក់ និងធ្លាប់ឈ្នះមេដាយមាស៣លើក ស្មើនឹងយក្សចិន៕
រូបថត៖ Cambodia2023
