ក្រុមបាតុករមួយក្រុមដែលភាគច្រើនជិះកង់ និងម៉ូតូ បានប្រមូលផ្តុំគ្នានៅមុខទីស្នាក់ការគណបក្សភឿថៃ និងគណបក្សភូមិចៃថៃ កាលពីល្ងាចថ្ងៃអាទិត្យ ដើម្បីថ្កោលទោសចំពោះការបង្កើតរដ្ឋាភិបាលថ្មី ជាមួយគណបក្សដែលមានទំនាក់ទំនងនឹងយោធា។ នេះបើយោងតាមការចេញផ្សាយដោយសារព័ត៌មាន Bangkok Post នាថ្ងៃអាទិត្យ ទី១៣ ខែសីហា ឆ្នាំ២០២៣។
ប្រជាពលរដ្ឋដែលប្រើប្រាស់យានជំនិះប្រមាណ៥០គ្រឿង បានមកប្រមូលផ្តុំគ្នាដំបូងនៅស្ថានីយ BTS Mo Chit លើផ្លូវ Phahon Yothin នៅម៉ោងប្រហែល ១:៣០នាទីរសៀល។ មេដឹកនាំបាតុកម្ម បានរិះគន់គណបក្សទាំង២ ចំពោះការសហការជាមួយគណបក្សនយោបាយ ដែលទាក់ទងនឹងរដ្ឋប្រហារកាលពីខែឧសភា ឆ្នាំ២០១៤។
ប្រហែលមួយម៉ោងក្រោយមក ពួកគេបានគោលដៅទៅទីស្នាក់ការគណបក្ស Bhumjaithai ដែលស្ថិតនៅលើផ្លូវនោះដូចគ្នា ប៉ុន្ដែពេលទៅដល់ការិយាល័យកណ្ដាលនៅម៉ោងប្រហែល ៣រសៀល ទីស្នាក់ការបានបិទទ្វារ និងយាមដោយប៉ូលីស។
ក្រុមអ្នកតវ៉ានៅទីនោះបានរិះគន់គោលនយោបាយរបស់គណបក្ស Bhumjaithai ទាក់ទងនឹងការទប់ស្កាត់វិបត្តិ Covid-19 និងធ្វើឲ្យរុក្ខជាតិកញ្ឆាមានភាពស្របច្បាប់។
ក្រោយចាកចេញពីទីស្នាក់ការរបស់គណបក្សភូមិចៃថៃ ក្រុមបាតុករធ្វើដំណើរទៅទីស្នាក់ការគណបក្សភឿថៃ តាមផ្លូវ Phetchaburi នៅម៉ោងប្រហែល ៤និង៤៥នាទីរសៀល ហើយកន្លែងនោះក៏ត្រូវបានបិទទ្វារផងដែរ។
នៅទីនោះ ពួកគេបានបោះចោល និងបំផ្លាញវត្ថុអនុស្សាវរីយ៍របស់ភឿថៃ រួមទាំងស្ទីគ័រ ពែង ប្រតិទិន និងអាវរបស់គណបក្ស។ ពួកគេក៏បានទាមទារឲ្យគណបក្សភឿថៃ ផ្សះផ្សារឡើងវិញនូវភាពជាដៃគូសម្ព័ន្ធរបស់ខ្លួនជាមួយនឹងគណបក្សចលនាឆ្ពោះទៅមុខ ដែលឈ្នះការបោះឆ្នោតជាសកលផងដែរ។
សូមជម្រាបថា គណបក្សភឿថៃ ជាប់លំដាប់ទី២ នៃការបោះឆ្នោតសកលកាលពីថ្ងៃទី១៤ ខែឧសភា ជាមួយនឹងអាសនៈសភាចំនួន១៤១ ខណៈគណបក្ស Bhumjaithai ជាប់លំដាប់ថ្នាក់ទី៣ ដោយមាន៧១អាសនៈ។ ហើយគណបក្សទាំង២ បានប្រកាសពីកិច្ចខិតខំប្រឹងប្រែងបង្កើតរដ្ឋាភិបាលថ្មីរួមគ្នា បន្ទាប់ពីគណបក្សភឿថៃ បានដកខ្លួនចេញពីគណបក្សសម្ព័ន្ធភាពនៃក្រុមចម្រុះពីមុនរបស់ខ្លួន ដែលបានឈ្នះអាសនៈពីសភាចំនួន ១៥១អាសនៈ៕
