រដ្ឋាភិបាលសាធារណរដ្ឋប្រជាមានិតចិន បានសំរេចផ្តល់ជំនួយឥតសំណងមានទឹកប្រាក់សរុបចំនួន២,៥លានដុល្លារអាមេរិក ជូនដល់រាជរដ្ឋាភិបាលកម្ពុជាតាមរយ:ក្រសួងសេដ្ឋកិច្ចនិងហិរញ្ញវត្ថុ ដេីម្បីគាំទ្រសកម្មភាពបោសសម្អាតមីន និងសំណល់ជាតិផ្ទុះពីសង្គ្រាមរបស់អង្គភាពសុីម៉ាក់ ស្ថិតនៅកងឯកភាពកំចាត់មីនទី៦ ខេត្តព្រះវិហារ ឧត្តរមានជ័យ ស្ទឹងត្រែង និងកងឯកភាពកំចាត់មីនទី៤ ខេត្តសៀមរាប និងខេត្តកំពង់ធំ ដែលមានកម្លាំងប្រតិបត្តិការសរុបចំនួនជិត៣០០នាក់។ នេះបើយោងតាមការឲ្យដឹងពី លោក ហេងរតនា អគ្គនាយក មជ្ឈមណ្ឌល សកម្មភាព កំចាត់មីន កម្ពុជា (CMAC)។
លោកហេង រតនា បានលើកឡើងទៀតថា គម្រោងខាងលើនេះ មានរយៈពេល១២ខែ ចាប់ពីខែមករាដល់ខែធ្នូ ឆ្នាំ២០២២ និងមានផែនការត្រូវរំដោះផ្ទៃដីចំការមីន និងចំការសំណល់ជាតិផ្ទុះពីសង្គ្រាមចំនួនជាង ១ ៧០០ហិចតា និងសកម្មភាពអប់រំយល់ដឹងពីគ្រោះថ្នាក់ដោយសារមីនចំនួន៧ខេត្ត។
ផ្អែកតាមរបាយការណ៍បានឲ្យដឹងថា ជាលទ្ធផលរយ:ពេល៦ខែ ឆ្នាំ២០២១នេះ គំគម្រោងជំនួយចិនលុបបំបាត់គ្រាប់មីននៅកម្ពុជា ដោយបានរំដោះដីចំការមីន/គ្រាប់សំណល់ជាតិផ្ទុះចំនួនជិត ១ ០៨៣ហិចតា រុករកឃេីញកំទេចគ្រាប់មីននិងសំណល់ជាតិផ្ទុះពីសង្គ្រាមចំនួនជាង ៥ ០០០គ្រាប់។
អគ្គនាយកមជ្ឈមណ្ឌលសកម្មភាពកម្ចាត់កម្ពុជា បានថ្លែងអំណរគុណចំពោះប្រមុខរាជរដ្ឋាភិបាលកម្ពុជា ដែលបានជំរុញសំណេីគាំទ្រថវិកានេះជាមួយប្រធានាធិបតីចិន ហេីយជាបន្តបន្ទាប់រដ្ឋាភិបាលចិនបានឆ្លេីយតបតាមសំណូមពររបស់សម្តេចតេជោ។ «ក្នុងឱកាសនេះដែរ តាងនាមអង្គភាពសុីម៉ាក់ក៏ដូចជនរងគ្រោះដោយសារមីន សូមសំដែងនូវការដឹងគុណជូនចំពោះប្រជាជននិងរដ្ឋាភិបាលចិន ដែលបានគាំទ្រថវិកាមនុស្សមនុស្សធម៌ដ៏មានសារសំខាន់នេះ សំរាប់ទ្រទ្រង់សកម្មភាពអង្គភាពសុីម៉ាក់ក្នុងការរំដោះគ្រាប់មីននិងសំណល់យុទ្ធភណ្ឌពីសង្គ្រាម ផ្តល់សុខសុវត្ថិភាព និងគាំទ្រការអភិវឌ្ឍនៅកម្ពុជា»។ លោក ហេង រតនា បន្ថែម៕