អ្នកលេងគុនខ្មែរ ព្រំ សំណាង ដែលមានរហ័សនាម ហៅថា ជាងកាត់សក់ដៃឯក ឬជង្គង់ពិឃាត នឹងត្រៀមប៉ះ អ្នកប្រដាល់ភូមា Dave Leduc នៅថ្ងៃទី៥ ខែវិច្ឆិកា ឆ្នាំ២០២៣ ដោយ ប្រកួតរុំអំបោះឆៅ វា.យតែ ១ទឹក ៩នាទី នៅសង្វៀនថោន។
យោងតាមការបញ្ជាក់យ៉ាងច្បាស់ពីសំណាក់កីឡាករ Dave Leduc បានឱ្យដឹងថា រូបគេនឹងធ្វើដំណើរមកប្រទេសកម្ពុជា ដើម្បីប្រកួតទល់នឹងកីឡាករ ព្រំ សំណាងរបស់កម្ពុជា។
ព្រំ សំណាង ដែលមានប្រវត្តិប្រកួត ១៥០ដងចាញ់តែ ១០ដងនិងទទួលជ័យជម្នះដោយធ្លាប់ផ្តួលដៃគូឲ្យសន្លប់ ចំនួន៧ លើកជាប់ៗគ្នា នឹងត្រៀមជួបប្រកួតជាផ្លូវការជាមួយជើង ឯកឡេតវីពិភពលោក Dave Leduc ដោយប្រើលក្ខន្តិកៈក្បាច់ Lethwei តែម្តង ពោលគឺមិនប្រើហ្គង់ដៃ អាចបុកក្បាលគ្នាបាន សម្រាករបួស ២នាទី និងទាល់តែវ៉ៃដៃគូឲ្យសន្លប់ទើបមានអ្នកឈ្នះហើយគ្មានចៅក្រមដាក់ពិន្ទុឡើយ។
ព្រំ សំណាង ត្រូវបានមហាជន ទូទាំងប្រទេសកម្ពុជា កោតសរសើរមិនណាយ ចំពោះកាវាយដ៏ល្អរបស់គេ ដោយអ្នកប្រដាល់វ័យ ៣៦ឆ្នាំរូបនេះ ចិត្តធំ មិនចេះខ្លាច មិនចេះញញើត ព្រមទាំងចូលវាយមិនចេះបន្ធូរដៃឱ្យដៃគូនោះឡើយ។
ព្រំ សំណាង បានទាញយកប្រជាប្រិយភាព ក៏ដូចជាបេះដូងអ្នកស្រឡាញ់គុនខ្មែរពេញ១ប្រទេស ក្រោយពីរូបគេបានបង្ហាញសមត្ថភាពប្រកួតឈ្នះដៃគូខ្លាំងជាច្រើននាក់ ពិសេសការឈ្នះខ្សែក្រវ៉ាត់លើសង្វៀន Thai Fight និងបន្តឈ្នះនៅក្នុងស្រុកជាមួយកីឡាករអន្តរជាតិខ្លាំងៗជាច្រើនទៀត។
គួរឱ្យដឹងថា នៅក្នុងព្រឹត្តិការណ៍កីឡារស៊ីហ្គេម លើកទី៣២ ឆ្នាំ២០២៣ ដែលប្រទេសកម្ពុជា ជាម្ចាស់ផ្ទះ កីឡាករព្រំ សំណាង ដណ្តើមបានមេដាយមាស ១គ្រឿងថែមទៀតផថ លើប្រភេទកីឡាគុនខ្មែរ វិញ្ញាសារ ៨១គីឡូក្រាម ដោយកាលនោះ រូបគេយក កីឡាករ Tun Tun Min របស់មីយ៉ាន់ម៉ា ដោយពិន្ទុ នៅវគ្គផ្តាច់ព្រ័ត្រ ។
សរុបមេដាយដែលកម្ពុជា ទទួលបានលើប្រភេទកីឡាគុនខ្មែរ ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ សរុបចំនួន ១៩គ្រឿង ក្នុងនោះមេដាយមាសចំនួន ១៤គ្រឿង ប្រាក់៣ និងសំរិទ្ធចំនួន២គ្រឿង។
សូមជម្រាប់ថា កីឡាករព្រំ សំណាង មានស្រុកកំណើតនៅភូមិក្រាំងចេក ឃុំចំបក់ ស្រុកភ្នំស្រួច ខេត្តកំពង់ស្ពឺ បច្ចុប្បន្នមានវ័យ ៣៦ឆ្នាំ មានទម្ងំ ៨០គីឡូក្រាម និងមានកម្ពស់ ១.៨៣មែត្រ ចូលប្រឡូកក្នុងវិស័យគុនខ្មែរតាំងពីឆ្នាំ២០១០ មកម្លេះ៕
