ពិតជាមិនធម្មតា ដោយមានការអញ្ជើញពីរដ្ឋបាលវិទ្យុ និងទូរទស្សន៍ជាតិ (NRTA) នៃសាធារណៈរដ្ឋប្រជាមានិតចិន តាមរយៈក្រសួងព័ត៌មានកម្ពុជា រដ្ឋាភិបាលប្រជាជននៃខេត្តយូណាន និង ទូរទស្សន៍ខេត្តយូណាន តារាសម្តែងលោក ជា លាងឈែ និងពិធីករ លោក ជា តិចហុក បានបង្ហាញនូវវប្បធម៌ និងទេពកោសល្យយ៉ាងអស្ចារ្យនៅលើឆាកអន្តរជាតិ នៅទឹកដីសាធារណៈរដ្ឋប្រជាមានិតចិន។
ថ្មីៗនេះ តារាសម្តែងលោក ជា លាងឈែ និងពិធីករលោក ជា តិចហុក ចូលរួមសម្តែងនៅក្រៅប្រទេសក្នុងព្រឹត្តិការដ៏ធំមួយ ជាមួយតារាឆ្នើមៗតំណាងប្រទេសផ្សេងៗជាច្រើនក្នុងកម្មវិធីសប្តាហ៍សោតទស្សន៍ ឡានឆាង មេគង្គ លើកទី៤ (The 4th Lancang – Mekong Audiovisual Week )។ ប្រទេសដែលចូលរួមកម្មវិធីនេះមានម្ចាស់ផ្ទះចិន កម្ពុជា មីយ៉ាន់ម៉ា វៀតណាម ថៃ និងវៀតណាម។
ជាការកត់សម្គាល់ តារាកម្ពុជាទាំង២រូបនេះ បានបង្ហាញនូវផ្ទាំងទស្សនីយភាពវប្បធម៌ខ្មែរ និង ការប្រើប្រាស់ភាសារចិន សម្លៀកបំពាក់ខ្មែរ យ៉ាងស្រស់សង្ហានៅឆាកអន្តរដោយមានការផ្សព្វផ្សាយនៅកញ្ចក់ទូរទស្សន៍ចិន ពោលទទួលបានការគាំទ្រច្រើន ក្រោយបុរសសង្ហាទាំងពីររូបនេះ បានបង្ហាញនូវអ្វីដែលជារបស់ខ្មែរ អោយមិត្តអន្តរជាតិ ជាពិសេសម្ចាស់ផ្ទះចិនបានឃើញ និងបានស្គាល់។
កម្មវិធី ដែលមានការចូលរួមរៀបចំដោយក្រសួងព័ត៌មានកម្ពុជា ទូរទស្សន៍ជាតិកម្ពុជា រួមជាមួយស្ថាប័នសាព័ត៌មានត្រយង ដែលកំពុងមានឈ្មោះបោះសម្លេងនៅកម្ពុជា បានចូលរួម មានឈ្មោះថា The 4th Lancang – Mekong Audiovisual Week មានការចូលរួមតំណាងពីប្រទេសជាច្រើន ដែលក្នុងនោះប្រទេសចិនជាម្ចាស់ផ្ទះ។
សូមជម្រាបថា តាមរយៈកម្មវិធីមួយនេះ អាចឲ្យបរទេសជាពិសេសមិត្តចិនបានស្គាល់កម្ពុជា កាន់តែច្បាស់តាមរយៈការពាំនាំវប្បធម៌អរិយធម៌របស់កម្ពុជា។ លោក ជា លាងឈែ បានសម្តែងក្តីសប្បាយរីករាយថា ខ្លួនពិតជារំភើបយ៉ាងខ្លាំង ក្រោយបានចូលរួមសម្តែងក្នុងកម្មវិធីមួយនេះ ព្រមទាំងបានច្រៀងបទ «ជយោ! មិត្តភាពកម្ពជា-ចិន» អមដោយសម្លៀកបំពាក់ខ្មែរ យ៉ាងស្រស់ស្អាតនេះអោយលើវេទិកាអន្តរជាតិ។ យ៉ាងណាក្តី នេះជាលើកទី២ដែល លាងឈែ បានឡើងឆាកកម្មវិធីនៅសាធារណៈរដ្ឋប្រជាមានិតចិន។
ចំណែកលោក ជា តិចហុក វិញបានចាត់ទុកកម្មវិធី សប្តាហ៍សោតទស្សន៍ ឡានឆាង-មេគង្គ លើកទី៤ គឺការផ្លាស់ប្តូរ និងការរៀនសូត្រទៅវិញទៅមកក្នុងចំណោមអរិយធម៌នៃប្រទេសតាមដងទន្លេមេគង្គ និងដើម្បីគាំទ្រកិច្ចសហប្រតិបត្តិការប្រព័ន្ធផ្សព្វផ្សាយ អនុវត្តការសហការផលិតព័ត៌មាន ធ្វើឱ្យស៊ីជម្រៅ ការសម្របសម្រួលខ្លឹមសារ ប្រាប់រឿងរ៉ាវរស់រវើកលើកកម្ពស់ការរួមបញ្ចូលប្រព័ន្ធផ្សព្វផ្សាយ ពង្រឹងការស្រាវជ្រាវ និងអភិវឌ្ឍន៍ សម្រាប់ការអនុវត្តបច្ចេកវិទ្យាទំនាក់ទំនងដែលកំពុងរីកចម្រើន និងចែករំលែកសមិទ្ធិផលនៃបដិវត្តន៍វិទ្យាសាស្ត្រ និងបច្ចេកវិទ្យា»។
លោកបន្តថាលើសពីនេះបានជំរុញឲ្យបណ្ដាលប្រទេសជាសមាជិកកសាងម៉ាកយីហោថ្មីនៃកិច្ចសហប្រតិបត្តិការប្រព័ន្ធផ្សព្វផ្សាយក្នុងចំណោមប្រទេសតាមដងទន្លេមេគង្គ និងជំរុញការកសាងសហគមន៍ជាមួយនិងអនាគតរួមគ្នាសម្រាប់ប្រទេសក្នុងតំបន់។
តារារបស់កម្ពុជា រូបនេះបានបន្តថា ក្នុងកម្មវិធីដ៏ធំមួយនេះសម្លៀកបំពាក់ដែលលោកគ្រងមួយឈុតបែបជាប្រពៃណីខ្មែរ គឺជាការពាំនាំនូវអ្វីដែលជារបស់ខ្មែរ អោយបរទេសបានឃើញ ខណៈឈុតមួយនេះ ជាការរៀបចំនិងឌីហ្សាញដោយលោកផ្ទាល់ ជាពិសេសការរចនាម៉ូតតែម្ដង ដែលរៀបចំឡើងយ៉ាងផ្ចិតផ្ចង់ជាទីបំផុត។
លោក ជា តិចហុក មានជំនាញខ្ពស់ក្នុងការប្រើប្រាស់ភាសាចិន និងជំនាញជាពិធីករ ហើយក៏ជានិស្សិតឆ្នើមនៅមហាវិទ្យាល័យគរុកោសល្យខេត្តយូណានប្រទេសចិន ស្របពេលដែលលោក តែងតែតំណាងជាតិចូលរួមកម្មវិធីអន្តរជាតិជាច្រើន ជាមួយសិល្បករ និងសិល្បៈការនី ទាំងស្រុក និងក្រៅស្រុក។
កម្មវិធីសប្តាហ៍សោតទស្សន៍ ឡានឆាង-មេគង្គ លើកទី៤ បានប្រារព្ធ នៅរាត្រីថ្ងៃទី១៦ ខែសីហា ឆ្នាំ២០២៣ ថ្មីៗនេះក្នុងគោលបំណងលើកកម្ពស់ការផ្លាស់ប្តូរ និងការរៀនសូត្រទៅវិញទៅមកក្នុងចំណោមអរិយធម៌នៃប្រទេសតាមដងទន្លេមេគង្គ ជាបន្តបន្ទាប់ គាំទ្រកិច្ចសហប្រតិបត្តិការប្រព័ន្ធផ្សព្វផ្សាយដើម្បីអនុវត្តការសហការផលិតព័ត៌មាន៕
អត្ថបទ៖ នី ម៉េងងី
